Bentley : భారత్‌లో బెంట్లే తొలి అధికారిక షోరూమ్ ఓపెన్.. ఎక్కడంటే ?

Bentley : భారతదేశంలో లగ్జరీ కార్ల మార్కెట్‌కు మరింత వెలుగు తెస్తూ బ్రిటిష్ లగ్జరీ వాహనాల తయారీ సంస్థ బెంట్లే ఎట్టకేలకు దేశంలో తన మొదటి అధికారిక షోరూమ్‌ను ప్రారంభించింది. గత రెండు దశాబ్దాలుగా కేవలం దిగుమతుల ద్వారా మాత్రమే విక్రయించబడుతున్న బెంట్లే కార్లకు, ఇకపై భారతీయ కస్టమర్‌లకు నేరుగా డీలర్‌షిప్, ఎక్స్‌పీరియన్స్ సెంటర్‌ను అందుబాటులోకి తెచ్చింది. బెంట్లే కంపెనీ ఇన్ఫినిటీ కార్స్‌తో భాగస్వామ్యం కుదుర్చుకుని ముంబైలోని నారిమన్ పాయింట్‌లో తన మొదటి డీలర్‌షిప్, ఎక్స్‌పీరియన్స్ సెంటర్‌ను ప్రారంభించింది. ఈ అద్భుతమైన షోరూమ్ మెరైన్ డ్రైవ్ సుందరమైన దృశ్యాలకు దగ్గరగా ఉంది. ఇప్పటివరకు దిగుమతుల ద్వారా మాత్రమే బెంట్లే కార్లను కొనుగోలు చేయగలిగిన భారతీయ వినియోగదారులకు, ఇప్పుడు ఈ కొత్త సెంటర్ ఒక ప్రత్యేక అనుభూతిని అందిస్తుంది. కస్టమర్‌లు ఇక్కడ తమకు నచ్చిన కార్లను చూడవచ్చు, ఆర్డర్ చేయవచ్చు. ప్రీమియం సర్వీస్ సౌకర్యాన్ని కూడా పొందవచ్చు. బెంట్లే తన కార్యకలాపాలను భారతదేశంలో స్కోడా ఆటో ఫోక్స్‌వ్యాగన్ ఇండియా ఆధ్వర్యంలో నిర్వహిస్తోంది.

ముంబైలోని ఈ కొత్త షోరూమ్‌లో బెంట్లే మూడు ప్రధాన, అత్యంత ప్రజాదరణ పొందిన లగ్జరీ మోడళ్లు అందుబాటులో ఉంటాయి. అవి కాంటినెంటల్ జీటీ, ఫ్లయింగ్ స్పర్, బెంటయ్‌గా. ఈ మూడు మోడళ్లను భారతదేశంలో ఆర్డర్ చేయవచ్చు. కస్టమర్‌లకు బెంట్లే బ్రాండ్ ప్రపంచాన్ని పరిచయం చేయడానికి ఈ షోరూమ్‌ను ప్రత్యేకంగా డిజైన్ చేశారు. ఇందులో కస్టమ్ కన్సల్టేషన్ స్పేస్, ప్రీమియం సర్వీస్ జోన్, ఎక్స్‌క్లూజివ్ యాక్సెసరీ సెక్షన్ వంటి ఫీచర్లు ఉన్నాయి.

బెంట్లే ప్రస్తుతం తన చారిత్రక మోడళ్లలో ఒకటైన కాంటినెంటల్ జీటీ సూపర్ స్పోర్ట్స్ను తిరిగి తీసుకురావడానికి సన్నాహాలు చేస్తోంది. సూపర్ స్పోర్ట్స్ అనే పేరు మొదట 3-లీటర్ హై-పెర్ఫార్మెన్స్ బెంట్లే కారులో ఉపయోగించబడింది, ఆ తర్వాత 2009లో మొదటి తరం కాంటినెంటల్ సూపర్ స్పోర్ట్స్ రూపంలో తిరిగి వచ్చింది. కొత్త తరం కాంటినెంటల్ జీటీ సూపర్ స్పోర్ట్స్ ఇప్పటివరకు వచ్చిన వాటిలోకెల్లా అత్యంత స్పోర్టి గ్రాండ్ టూరర్గా భావిస్తున్నారు. దీన్ని మ్యాట్ బ్లాక్ ఎక్స్‌టీరియర్, ప్రత్యేక అల్లాయ్ వీల్స్, తక్కువ బరువు కలిగిన బాడీ డిజైన్‌తో తీసుకురానున్నారు. పెర్ఫార్మెన్స్‌ను పెంచడం కోసం కంపెనీ ఇందులో నుంచి కొన్ని ఎలక్ట్రిక్ కాంపోనెంట్స్‌ను తొలగించి, ట్విన్-టర్బోచార్జ్డ్ V8 ఇంజన్‌తో విడుదల చేయనుంది. ఈ ఇంజన్ 600 BHP కంటే ఎక్కువ పవర్‌ను అందించగలదు. ఈ మోడల్ నుంచి ఫ్రంట్-మౌంటెడ్ ఎలక్ట్రిక్ మోటార్లను తొలగిస్తే, ఈ కారు రేర్-వీల్ డ్రైవ్ మోడల్‌గా మారుతుంది. ఇది దీనిని ఒక నిజమైన డ్రైవర్ కార్‌గా నిలబెడుతుంది.