Hero Vida UBX: దేశీయ దిగ్గజ ఆటోమొబైల్ సంస్థ హీరో మోటోకార్ప్ తమ ఎలక్ట్రిక్ పోర్ట్ ఫోలియోను మరింత విస్తరించే పనిలో ఉంది. ఇందులో భాగంగా విడా బ్రాండ్ కింద కొత్త ఎలక్ట్రిక్ మోటార్‌సైకిల్ తయారీ తుది దశకు చేరుకుంది. తాజాగా ఈ కొత్త బైక్ భారత్ రోడ్లపై టెస్టింగ్ జరుపుతుండగా కెమెరా కంట పడింది. భారీ క్యామోఫ్లాజ్ తో కవర్ చేసినప్పటికీ, దీని వీల్ డిజైన్, ఇతర లుక్ చూస్తుంటే ఇది విడా UBX మోడల్ అయి ఉంటుందని స్పష్టమవుతోంది. గతంలో ఈకామ్ షోలలో ప్రదర్శించిన కాన్సెప్ట్ మోడల్ మాదిరిగానే ఇది ఉత్పత్తికి సిద్ధంగా కనిపిస్తోంది.

స్పోర్టివ్ లుక్ మరియు ఆకర్షణీయమైన డిజైన్

ఈ కొత్త ఎలక్ట్రిక్ బైక్ చూడటానికి అచ్చం ఒక స్పోర్టివ్ స్ట్రీట్ బైక్ లాగా ఉంది. దీని ముందు భాగంలో సింగిల్ ఎల్ఈడీ ప్రొజెక్టర్ హెడ్‌ల్యాంప్, స్లీక్ ఎల్ఈడీ ఇండికేటర్లను అమర్చారు. హెడ్‌లైట్ కింద చిన్న చాచుకున్న స్ట్రక్చర్ కూడా ఉంది. బైక్ ముందు భాగంలో యూఎస్‌డీ టెలిస్కోపిక్ ఫోర్కులు, వెనుక వైపు మోనో-షాక్ సస్పెన్షన్ సెటప్ ఇచ్చారు. భద్రత కోసం ముందు అలాగే వెనుక డిస్క్ బ్రేకులను అందించారు. సాధారణ మోటార్‌సైకిళ్లలో ఇంజిన్ ఉండే ప్రాంతంలోనే దీని బ్యాటరీ ప్యాక్‌ను అమర్చడం విశేషం.

సింగిల్ పీస్ సీటుతో పాటు మోడ్రన్ ఫీచర్లు

ఈ బైక్‌లో రైడర్ సౌకర్యం కోసం స్టెప్డ్ సింగిల్-పీస్ సీటును ఇచ్చారు. పూర్తి స్థాయి ఎల్ఈడీ లైటింగ్ సిస్టమ్, మధ్యలో పవర్ఫుల్ ఎలక్ట్రిక్ మోటార్, స్టైలిష్ స్వింగార్మ్ దీని సొంతం. ట్యాంక్ భాగంలో కీ-హోల్ మాదిరిగా డిజైన్ చేశారు. డిజిటల్ టచ్‌స్క్రీన్ టీఎఫ్‌టీ ఇన్‌స్ట్రుమెంట్ క్లస్టర్‌ను కంట్రోల్ చేయడానికి మెరుగైన స్విచ్‌గీర్‌ను అందించారు. వెనుక వైపు పెద్ద టైర్ హగర్ తో పాటు చైన్ డ్రైవ్ సిస్టమ్‌ను అమర్చారు. యువతను ఆకట్టుకునేలా ఈ బైక్ డిజైన్ను అత్యంత సుందరంగా తీర్చిదిద్దారు.

త్వరలోనే మార్కెట్లోకి రానున్న హీరో ఈవీ

హీరో కంపెనీ ఇప్పటికే విడా వీ2, విఎక్స్2 సిరీస్ ఎలక్ట్రిక్ స్కూటర్లతో మార్కెట్లో తన సత్తా చాటుతోంది. ఇప్పుడు ఈ విభాగంలోకి పూర్తి స్థాయి ఎలక్ట్రిక్ మోటార్‌సైకిల్‌ను తీసుకొచ్చి తన దూకుడు పెంచాలని చూస్తోంది. త్వరలోనే ఈ బైక్ లాంచ్ తేదీకి సంబంధించిన అధికారిక ప్రకటన వెలువడే అవకాశం ఉంది. పెట్రోల్ బైకులకు ధీటుగా దూసుకెళ్లనున్న ఈ కొత్త హీరో ఎలక్ట్రిక్ బైక్ ధర ఎలా ఉండనుందనే దానిపై ఆటోమొబైల్ మార్కెట్లో భారీ అంచనాలు నెలకొన్నాయి.

Tags: