Hybrid SUV War : 35కిమీ మైలేజీతో ఏడాదిలో ఎంట్రీ ఇవ్వబోతున్న 3 హైబ్రిడ్ SUVలు ఇవే

Hybrid SUV War : భారతదేశంలో పెరుగుతున్న కాలుష్యం, పెట్రోల్-డీజిల్ ధరల పెరుగుదల కారణంగా ప్రజలు హైబ్రిడ్ ఎస్‌యూవీల వైపు మొగ్గు చూపుతున్నారు. ఈ కార్లు తక్కువ ఇంధనాన్ని ఖర్చు చేస్తాయి.. అత్యద్భుతమైన మైలేజీని అందిస్తాయి. పర్యావరణానికి కూడా సురక్షితమైనవిగా పరిగణించబడతాయి. 2025-2026 సంవత్సరాలలో భారత మార్కెట్‌లోకి మూడు పెద్ద హైబ్రిడ్ ఎస్‌యూవీలు రాబోతున్నాయి.. మారుతి సుజుకి ఫ్రాంక్స్ హైబ్రిడ్, కియా సెల్టోస్ హైబ్రిడ్, మారుతి గ్రాండ్ విటారా 7-సీటర్ హైబ్రిడ్. ఈ మోడళ్లు అధిక మైలేజీ, అడ్వాన్సుడ్ ఫీచర్లతో రానున్నాయి. వాటి పూర్తి వివరాలు తెలుసుకుందాం.

1. మారుతి ఫ్రాంక్స్ హైబ్రిడ్

ఈ జాబితాలో అత్యంత సరసమైన ఎస్‌యూవీగా మారుతి ఫ్రాంక్స్ హైబ్రిడ్ నిలవనుంది. దీని ప్రారంభ ధర సుమారు రూ.8.5 లక్షలు ఉండవచ్చు. కంపెనీ దీనిని తమ మొట్టమొదటి ఇన్-హౌస్ స్ట్రాంగ్-హైబ్రిడ్ సిస్టమ్‎తో అందించనుంది. ఇందులో 1.2-లీటర్ 3-సిలిండర్ Z12E ఇంజిన్‌ను ఎలక్ట్రిక్ మోటార్, 1.5-2 kWh బ్యాటరీతో జత చేస్తారు. ఈ సెటప్ దాదాపు 80-90 bhp పవర్ అందిస్తుంది. ఇది సిరీస్ హైబ్రిడ్ సిస్టమ్ కావడం వల్ల, పెట్రోల్ ఇంజిన్ బ్యాటరీని ఛార్జ్ చేస్తుంది. మోటార్ చక్రాలను నడుపుతుంది. దీని మైలేజ్ దాదాపు లీటరుకు 35కిమీ వరకు ఉంటుంది. కొత్త గ్రిల్, LED లైట్లు, 9-అంగుళాల టచ్‌స్క్రీన్, వైర్‌లెస్ కార్‌ప్లే, డిజిటల్ క్లస్టర్, లెవెల్-1 ADAS వంటి ఫీచర్లు ఇందులో ఉంటాయి.

2. కియా సెల్టోస్ హైబ్రిడ్

కియా సెల్టోస్ హైబ్రిడ్ మోడల్ 2026లో భారత మార్కెట్‌లోకి రానుంది. ఇది కియా నుంచి రానున్న మొట్టమొదటి హైబ్రిడ్ మోడల్ కానుంది. ఇందులో 1.5-లీటర్ పెట్రోల్ ఇంజిన్‌ను ఎలక్ట్రిక్ మోటార్‌తో జత చేస్తారు. ఈ సెటప్ 140 bhp పవర్‌ను, 250 Nm టార్క్‌ను ఉత్పత్తి చేస్తుంది. e-CVT గేర్‌బాక్స్‌తో వచ్చే ఈ ఎస్‌యూవీ లీటరుకు 25-28కిమీ మైలేజీని ఇవ్వగలదు. దీని ప్రారంభ ధర సుమారు రూ.15 లక్షలుగా ఉండే అవకాశం ఉంది. 10.25-అంగుళాల డ్యూయల్ స్క్రీన్, సన్‌రూఫ్, వెంటిలేటెడ్ సీట్లు, లెవెల్-2 ADAS వంటి అధునాతన ఫీచర్లను ఈ కారులో అందిస్తారు.

3. మారుతి గ్రాండ్ విటారా 7-సీటర్ హైబ్రిడ్

మారుతి పాపులర్ గ్రాండ్ విటారా ఎస్‌యూవీ 7-సీటర్ హైబ్రిడ్ మోడల్ 2026లో లాంచ్ కానుంది. పెద్ద ఫ్యామిలీలను దృష్టిలో ఉంచుకుని ఈ కారును తయారు చేస్తున్నారు. ఈ కారులో 1.5-లీటర్ K15C ఇంజిన్‌ను 79 bhp ఎలక్ట్రిక్ మోటార్‌తో కలిపి మొత్తం 115 bhp పవర్ ఉత్పత్తి చేస్తుంది. దీని మైలేజ్ లీటరుకు 25 కిమీ కంటే ఎక్కువ ఉంటుందని అంచనా. దీని ప్రారంభ ధర సుమారు రూ.18.5 లక్షలు ఉండవచ్చు. పెద్ద ఫ్యామిలీ కోసం పొడవైన వీల్‌బేస్, మూడో వరుస సీటు, 9-అంగుళాల స్క్రీన్, హెడ్-అప్ డిస్‌ప్లే, వెంటిలేటెడ్ సీట్లు, ADAS వంటి ఫీచర్లను అందిస్తారు.