Mahindra : జీఎస్టీ తగ్గింపుతో భారీగా తగ్గిన మహీంద్రా కార్ల ధరలు.. కస్టమర్లకు పండుగే

Mahindra : మహీంద్రా అండ్ మహీంద్రా తమ ఎస్‌యూవీల శ్రేణిపై భారీ తగ్గింపులను ప్రకటించింది. కొత్త జీఎస్టీ నిబంధనల వల్ల కార్ల ధరలు తగ్గడంతో పాటు కంపెనీ రూ.2.56 లక్షల వరకు అదనపు ప్రయోజనాలను కూడా అందిస్తోంది. నవరాత్రుల ప్రారంభంతో ఈ పండుగ ఆఫర్లు కూడా అందుబాటులోకి వచ్చాయి. కొత్త జీఎస్టీ ప్రకారం చాలా ఎస్‌యూవీలపై 40% జీఎస్టీ స్లాబ్ వర్తిస్తుంది. అయితే XUV 3XO, బొలెరో, బొలెరో నియో వంటి మోడల్స్‌పై కేవలం 18% జీఎస్టీ వర్తిస్తుంది. దీంతో వినియోగదారులు తమ డ్రీమ్ ఎస్‌యూవీని తక్కువ ధరకే సొంతం చేసుకోవచ్చు.

మహీంద్రా XUV700పై కొత్త జీఎస్టీ నిబంధనల ప్రకారం రూ.1.43 లక్షల తగ్గింపు లభించింది. దీనికి అదనంగా, కంపెనీ రూ.81,000 వరకు ప్రయోజనాలను అందిస్తోంది. మొత్తం ప్రయోజనం రూ.2.24 లక్షలు. ఇప్పుడు XUV700 ప్రారంభ ధర రూ.13.19 లక్షలు (ఎక్స్-షోరూమ్). థార్ రాక్స్ మోడల్‌పై రూ.1.33 లక్షల తగ్గింపు, రూ.20,000 వరకు అదనపు ఆఫర్లు ఉన్నాయి. దాని కొత్త ప్రారంభ ధర రూ.12.25 లక్షలు.

మహీంద్రా స్కార్పియో-N మోడల్‌పై రూ.1.45 లక్షల తగ్గింపు లభించగా, దీనికి తోడు రూ.71,000 డిస్కౌంట్ ఉంది, మొత్తం రూ.2.15 లక్షల ప్రయోజనం లభిస్తుంది. దీని కొత్త ప్రారంభ ధర రూ.13.20 లక్షలు. స్కార్పియో క్లాసిక్పై రూ.1.01 లక్షల తగ్గింపు, రూ.95,000 వరకు అదనపు ప్రయోజనాలు ఉన్నాయి, మొత్తం రూ.1.96 లక్షల ప్రయోజనం లభిస్తుంది. దీని కొత్త ప్రారంభ ధర రూ.12.98 లక్షలు.

మహీంద్రా థార్ (3-డోర్) మోడల్‌పై రూ.1.35 లక్షల తగ్గింపు, రూ.20,000 వరకు అదనపు ప్రయోజనాలు ఉన్నాయి. మొత్తం రూ.1.55 లక్షల ప్రయోజనం లభిస్తుంది. దీని కొత్త ప్రారంభ ధర రూ.10.32 లక్షలు. XUV 3XO మోడల్‌పై రూ.1.56 లక్షల తగ్గింపుతో పాటు, రూ.90,000 వరకు అదనపు ప్రయోజనాలను అందిస్తున్నారు, మొత్తం రూ.2.46 లక్షల ప్రయోజనం లభిస్తుంది. దీని కొత్త ప్రారంభ ధర రూ.7.28 లక్షలు.

మహీంద్రా బొలెరో, బొలెరో నియో మోడల్స్‌పై రూ.1.27 లక్షల తగ్గింపు, రూ.1.29 లక్షల వరకు అదనపు ప్రయోజనాలు ఉన్నాయి. మొత్తం రూ.2.56 లక్షల భారీ ప్రయోజనం లభిస్తుంది. వీటి కొత్త ప్రారంభ ధర రూ.8.79 లక్షలు. ఈ తగ్గింపులు, ఆఫర్లు వినియోగదారులకు తమకు నచ్చిన మహీంద్రా ఎస్‌యూవీని కొనుగోలు చేయడానికి గొప్ప అవకాశాన్ని అందిస్తున్నాయి.