Honda: ప్రముఖ జపాన్ ఆటోమొబైల్ దిగ్గజం హోండా భారతీయ మార్కెట్ పై తన పట్టును మరింత బిగించేందుకు సరికొత్త వ్యూహంతో ముందుకు వస్తోంది. ఇందులో భాగంగా రాబోయే రోజుల్లో దేశీయ మార్కెట్ అవసరాలకు తగినట్లుగా ప్రత్యేకమైన మోడళ్లను అభివృద్ధి చేయాలని కంపెనీ నిర్ణయించింది. ముఖ్యంగా 2030 నాటికి భారత మార్కెట్లోకి ఏకంగా 10 కొత్త కార్లను విడుదల చేయాలనే పెద్ద లక్ష్యంతో హోండా ముందుకు సాగుతోంది. ఇందులో సబ్-4 మీటర్ కాంపాక్ట్ ఎస్‌యూవీ మరియు మిడ్-సైజ్ ఎస్‌యూవీ సెగ్మెంట్లకు అత్యంత ప్రాధాన్యత ఇస్తున్నట్లు కంపెనీ వెల్లడించింది.

మారుతి బ్రెజ్జా, హ్యుందాయ్ వెన్యూలకు గట్టి పోటీ

హోండా కంపెనీ ప్రతిష్టాత్మకంగా తీసుకువస్తున్న ఈ సరికొత్త సబ్-కాంప్యాక్ట్ ఎస్‌యూవీ 2028 నాటికి భారతీయ మార్కెట్లో అడుగుపెట్టే అవకాశం ఉంది. ఈ కారు మార్కెట్లోకి వచ్చిన తర్వాత టాటా నెక్సాన్, మారుతి సుజుకి బ్రెజ్జా, హ్యుందాయ్ వెన్యూ, కియా సోనెట్ వంటి పాపులర్ ఎస్‌యూవీలకు ఇది గట్టి పోటీ ఇవ్వనుంది. మన దేశంలోని రోడ్ల పరిస్థితులు, ఇక్కడి కస్టమర్ల అభిరుచులను పూర్తిగా దృష్టిలో ఉంచుకుని ఈ కారును డిజైన్ చేయనున్నారు. సరైన ధర, అద్భుతమైన పర్ఫార్మెన్స్ మధ్య గొప్ప బ్యాలెన్స్ అందించడమే లక్ష్యంగా హోండా ఈ ప్రాజెక్ట్‌ను చేపట్టింది.

పెట్రోల్, హైబ్రిడ్, ఎలక్ట్రిక్ పవర్‌ట్రెయిన్ ఆప్షన్లు

ఈ కొత్త హోండా ఎస్‌యూవీకి సంబంధించి ఇంకా పూర్తి సాంకేతిక వివరాలు అధికారికంగా వెల్లడి కానప్పటికీ, ఇది హోండా గ్లోబల్ స్మాల్ కార్ ప్లాట్‌ఫామ్ లేదా సరికొత్త మాడ్యులర్ ఆర్కిటెక్చర్ పై తయారయ్యే అవకాశం ఉంది. దీనివల్ల భవిష్యత్తులో ఈ కారులో ట్రెండ్‌కు తగినట్లుగా కేవలం పెట్రోల్ ఇంజిన్ మాత్రమే కాకుండా, హైబ్రిడ్, ఎలక్ట్రిక్ ఆప్షన్లను కూడా అందించే వెసులుబాటు ఉంటుంది. జాజ్ వంటి కార్ల నిష్క్రమణ తర్వాత చిన్న కార్ల సెగ్మెంట్‌లో ఉన్న లోటును ఈ కొత్త ఎస్‌యూవీతో భర్తీ చేయాలని హోండా చూస్తోంది.

ఎలివేట్ ఫేస్‌లిఫ్ట్, లగ్జరీ కార్ల రీఎంట్రీ

ఈ కొత్త కాంపాక్ట్ ఎస్‌యూవీ కంటే ముందే హోండా కంపెనీ తన పాపులర్ ఎస్‌యూవీ ఎలివేట్ ఫేస్‌లిఫ్ట్ వెర్షన్‌ను మార్కెట్లోకి తీసుకురానుంది. ఇందులో కొన్ని ఆకర్షణీయమైన డిజైన్ మార్పులు, కొత్త ఫీచర్లు ఉండే అవకాశం ఉంది. దీని తర్వాత హోండా 0 ఆల్ఫా ఎలక్ట్రిక్ ఎస్‌యూవీని కూడా భారత మార్కెట్లోకి ప్రవేశపెట్టే ప్లాన్ ఉంది. అంతేకాకుండా సివిక్, అకార్డ్, సీఆర్-వీ వంటి గ్లోబల్ లగ్జరీ మోడళ్లను కూడా హైబ్రిడ్ వర్షన్లలో తిరిగి భారత్‌కు తీసుకువచ్చే ఆలోచనలో హోండా ఉంది.

Tags: