Mercedes : మెర్సిడెస్ బెంజ్ సంచలనం.. భారత్‌లో సరికొత్త ఏరో ట్రాక్ ఎడిషన్ లాంచ్.. ధర ఎంతంటే ?

Mercedes : జర్మనీ లగ్జరీ కార్ల దిగ్గజం మెర్సిడెస్ బెంజ్ భారత మార్కెట్లోకి ఒక బుల్లెట్ లాంటి కారును వదిలింది. తన పాపులర్ పర్ఫార్మెన్స్ హ్యాచ్‌బ్యాక్ A45 S ఏరో ట్రాక్ ఎడిషన్‎ను తాజాగా లాంచ్ చేసింది. సుమారు మూడేళ్ల విరామం తర్వాత A45 బ్యాడ్జ్ భారత్‌లోకి రీ-ఎంట్రీ ఇవ్వడం విశేషం. స్పీడ్ అంటే పిచ్చి ఉన్నవారికి, అదిరిపోయే లుక్స్ కోరుకునే వారికి ఈ లిమిటెడ్ ఎడిషన్ కారు ఒక వరం లాంటిదని చెప్పొచ్చు. మెర్సిడెస్ తన సరికొత్త AMG A45 S ఏరో ట్రాక్ ఎడిషన్ ధరను రూ. 87 లక్షలుగా (ఎక్స్-షోరూమ్) నిర్ణయించింది. గతంలో వచ్చిన AMG మోడల్ ధర రూ. 92.50 లక్షలుగా ఉండేది. అంటే కొత్త వెర్షన్ పాతదాని కంటే సుమారు రూ. 5.5 లక్షలు తక్కువకే లభిస్తోంది. ఇది ఒక లిమిటెడ్ ఎడిషన్ మోడల్ కావడం వల్ల మార్కెట్లో దీనికి విపరీతమైన డిమాండ్ ఉండే అవకాశం ఉంది. స్పెషల్ కావాలనుకునే కార్ల ప్రేమికుల కోసం కంపెనీ దీనిని ప్రత్యేకంగా డిజైన్ చేసింది.

పర్ఫార్మెన్స్ విషయంలో ఈ కారు ఒక చిన్నపాటి రాకెట్ అని చెప్పొచ్చు. ఇందులో 2.0-లీటర్, ఫోర్-సిలిండర్ టర్బో-పెట్రోల్ ఇంజిన్ ఉంది. ఇది ఏకంగా 421 హార్స్‌పవర్, 500Nm టార్క్‌ను ఉత్పత్తి చేస్తుంది. 4MATIC+ ఆల్-వీల్ డ్రైవ్ సిస్టమ్ వల్ల కారు రోడ్డుపై చాలా బలంగా పట్టు సాధిస్తుంది. ఈ కారు కేవలం 3.9 సెకన్లలోనే 0 నుంచి 100 కి.మీ వేగాన్ని అందుకుంటుంది. దీని గరిష్ట వేగం గంటకు 270 కిలోమీటర్లకు పరిమితం చేశారు.

ఈ స్పెషల్ ఎడిషన్ లో ప్రధాన ఆకర్షణ AMG ఏరోడైనమిక్స్ ప్యాకేజీ. ఇందులో వెనుక వైపు అమర్చిన ఫిక్స్‌డ్ వింగ్, పెద్ద ఫ్రంట్ స్ప్లిటర్, కొత్త రియర్ డిఫ్యూజర్ కారుకు రేసింగ్ లుక్ ఇస్తాయి. విండ్ టన్నెల్ టెస్టింగ్ ద్వారా వీటిని రూపొందించారు, దీనివల్ల కారు హై-స్పీడ్ లో వెళ్తున్నప్పుడు కూడా చాలా స్థిరంగా ఉంటుంది. అలాగే AMG నైట్ ప్యాకేజీ కింద గ్లాస్ బ్లాక్ ఫినిషింగ్, 19-అంగుళాల మ్యాట్ బ్లాక్ వీల్స్, ఎర్రటి బ్రేక్ కాలిపర్స్ కారు అందాన్ని రెట్టింపు చేస్తున్నాయి.

మెర్సిడెస్ ఇండియాలో తన AMG పోర్ట్‌ఫోలియోను మరింత బలోపేతం చేస్తోంది. కేవలం హ్యాచ్‌బ్యాక్ మాత్రమే కాకుండా, పర్ఫార్మెన్స్ ఎస్‌యూవీ ప్రియుల కోసం రూ. 1.52 కోట్ల ధరతో Mercedes-AMG GLE Coupe Performance Edition ను కూడా లాంచ్ చేసింది. ఏరో ట్రాక్ ఎడిషన్ అనేది కేవలం ఒక కారు మాత్రమే కాదు, అదొక ఎమోషన్. తమకంటూ ఒక ప్రత్యేక గుర్తింపు ఉండాలనుకునే హై-ఎండ్ కస్టమర్లను దృష్టిలో ఉంచుకుని మెర్సిడెస్ ఈ అద్భుతాన్ని మార్కెట్లోకి తెచ్చింది.