Car Launch : నవంబర్లో ఎస్యూవీల యుద్ధం.. టాటా సియెర్రా vs మహీంద్రా XEV 9S..గెలిచేదెవరు ?

Car Launch : భారతీయ ఆటోమొబైల్ మార్కెట్‌లో ఈ నవంబర్ 2025 చాలా ప్రత్యేకంగా ఉండనుంది. ఎందుకంటే ఈ నెలలో రెండు అతిపెద్ద కంపెనీలు టాటా మోటార్స్, మహీంద్రా. తమ సరికొత్త మిడ్-సైజ్ ఎస్‌యూవీలను రంగంలోకి దించబోతున్నాయి. ఇందులో ఒక ఎస్యూవీ పెట్రోల్/డీజిల్ ఇంజిన్‌తో వస్తుంటే, మరొకటి ప్యూర్ ఎలక్ట్రిక్ సెగ్మెంట్‌లోకి అడుగుపెడుతోంది. దీంతో కస్టమర్లకు మరింత మెరుగైన, అడ్వాన్సుడ్ ఆప్షన్లు అందుబాటులోకి రానున్నాయి.

ఈ నెలలో మొదట టాటా సియెర్రా నవంబర్ 25న భారత మార్కెట్‌లోకి రీ-ఎంట్రీ ఇస్తోంది. 90ల నాటి ఈ ఐకానిక్ ఎస్‌యూవీ ఇప్పుడు మోడ్రన్ లుక్, అడ్వాన్స్‌డ్ టెక్నాలజీతో ICE (పెట్రోల్/డీజిల్) విభాగంలో విడుదల కానుంది. ఇక రెండో లాంచ్‌గా, మహీంద్రా తమ సరికొత్త ఎలక్ట్రిక్ ఎస్‌యూవీ అయిన మహీంద్రా XEV 9S ను నవంబర్ 27న విడుదల చేయనుంది. ఇది భారతీయ మార్కెట్‌లో చాలా అరుదైన 7-సీటర్ ఎలక్ట్రిక్ ఎస్‌యూవీ సెగ్మెంట్‌లోకి అడుగుపెట్టనుంది.

టాటా సియెర్రా : ప్రీమియం ఫీచర్లు, పోటీదారులు

కొత్త టాటా సియెర్రా అనేక ప్రీమియం ఫీచర్లను కలిగి ఉంది. ఇందులో కనెక్టెడ్ LED టెయిల్‌ల్యాంప్స్, ఫ్లష్ డోర్ హ్యాండిల్స్, పనోరమిక్ గ్లాస్ రూఫ్ వంటి ఆధునిక డిజైన్ అంశాలు ఉన్నాయి. ట్రిపుల్-స్క్రీన్ లేఅవుట్, టచ్-బేస్డ్ క్లైమేట్ కంట్రోల్, యాంబియంట్ లైటింగ్, లెవెల్-2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్) వంటి హై-టెక్ ఫీచర్లు సియెర్రాను ప్రత్యేకంగా నిలుపుతాయి. 5-సీటర్ SUVగా వస్తున్న సియెర్రా, హ్యుందాయ్ క్రెటా, కియా సెల్టోస్, టాటా హారియర్ వంటి పాపులర్ ఎస్‌యూవీలతో నేరుగా పోటీ పడనుంది.

మహీంద్రా XEV 9S: లగ్జరీ EV ఫీచర్లు

మహీంద్రా XEV 9S ఒక ఫీచర్ లోడెడ్ ఎలక్ట్రిక్ ఎస్‌యూవీ. 7-సీటర్ EVగా ఇది పెద్ద కుటుంబాలకు చాలా అనుకూలమైన, ఫ్యూచరిస్టిక్ ఆప్షన్ కానుంది. ట్రిపుల్-స్క్రీన్ డ్యాష్‌బోర్డ్, పనోరమిక్ స్కైరూఫ్, 3-జోన్ క్లైమేట్ కంట్రోల్, మసాజింగ్ ఫ్రంట్ సీట్లు, 16-స్పీకర్ల హార్మన్ కార్డాన్ సౌండ్ సిస్టమ్ వంటి లగ్జరీ ఫీచర్లు ఉండవచ్చు. ఇందులో కూడా 360-డిగ్రీ కెమెరా, లెవెల్-2 ADAS ను అందిస్తున్నారు.

మొత్తానికి ఈ నవంబర్ నెల ఆటో ప్రియులకు చాలా ఉత్సాహాన్ని ఇవ్వనుంది. ఒకవైపు క్లాసిక్ డిజైన్‌ను మోడ్రన్ టెక్నాలజీతో కలిపిన టాటా సియెర్రా, మరోవైపు పెద్ద కుటుంబాలకు సరిపోయే 7-సీటర్ ఎలక్ట్రిక్ ఎస్‌యూవీ అయిన మహీంద్రా XEV 9S మార్కెట్‌లోకి వస్తున్నాయి. ఈ రెండు కొత్త లాంచ్‌లతో మిడ్-సైజ్ ఎస్‌యూవీ సెగ్మెంట్‌లో పోటీ మరింత తీవ్రమవుతుంది.