Maruti Jimny : దుమ్మురేపుతున్న మారుతి కారు.. ఏకంగా 100దేశాలకు ఎగుమతి

Maruti Jimny : భారతదేశంలో మహీంద్రా థార్‌కు పోటీగా విడుదలైన మారుతి సుజుకి జిమ్నీ దేశీయ మార్కెట్లో పెద్దగా ప్రభావం చూపలేకపోయినా, ఎగుమతుల విషయంలో మాత్రం అద్భుతాలు సృష్టించింది. విదేశాల్లో ఈ ఎస్‌యూవీకి విపరీతమైన డిమాండ్ ఉంది. 5-డోర్ మారుతి సుజుకి జిమ్నీని భారతదేశంలో జూన్ 2023లో విడుదల చేశారు.

మారుతి సుజుకి ఇటీవల ఒక గుడ్ న్యూస్ చెప్పింది. తమ జిమ్నీ 5-డోర్ ఎస్‌యూవీ భారతదేశం నుంచి లక్ష యూనిట్ల ఎగుమతులను దాటిందని. భారతదేశంలో విడుదలైన కొద్దికాలానికే, 2023లో జిమ్నీ 5-డోర్ ఎగుమతుల ప్రయాణం ప్రారంభమైంది. ఈ ఎస్‌యూవీ పూర్తిగా భారతదేశంలోనే తయారు చేయబడుతుంది. ఇప్పటివరకు జపాన్, మెక్సికో, ఆస్ట్రేలియా సహా 100కు పైగా దేశాలకు ఎగుమతి చేయబడింది.

జనవరి 2025లో, జిమ్నీ 5-డోర్ మోడల్‌ను జపాన్‌లో జిమ్నీ నోమాడే పేరుతో ప్రవేశపెట్టినప్పుడు, అక్కడ ప్రజల నుండి అద్భుతమైన స్పందన లభించింది. విడుదలైన కొద్ది రోజుల్లోనే 50,000 కంటే ఎక్కువ బుకింగ్‌లు నమోదయ్యాయి. దీనిబట్టి విదేశాల్లో జిమ్నీకి ఉన్న క్రేజ్ ఎంతటిదో అర్థం చేసుకోవచ్చు. మారుతి సుజుకి ప్రస్తుతం భారతదేశంలోని ప్యాసింజర్ వెహికల్ ఎగుమతులలో 46% కంటే ఎక్కువ మార్కెట్ వాటాను కలిగి ఉంది. ఆర్థిక సంవత్సరం 2024-25 లో మారుతి సుజుకి 3.3 లక్షలకు పైగా వాహనాలను ఎగుమతి చేసింది.

మారుతి జిమ్నీ బేస్ మోడల్ ధర రూ.14.11 లక్షల నుండి ప్రారంభమై, టాప్ మోడల్ ధర రూ.16.51 లక్షల వరకు (ఆన్-రోడ్) ఉంటుంది. జిమ్నీ మొత్తం 6 వేరియంట్‌లలో లభిస్తుంది. మారుతి జిమ్నీ ఆఫ్-రోడ్ మార్గాల్లో దూసుకెళ్తుంది. దీనిలో ఉండే 1.5-లీటర్ పెట్రోల్ ఇంజిన్ మంచి పవర్‌ను అందిస్తుంది. ల్యాడర్ ఫ్రేమ్ ఛాసిస్, 4x4 సిస్టమ్, హిల్ డిసెంట్ కంట్రోల్, బ్రేక్-ఆధారిత లిమిటెడ్ స్లిప్ డిఫరెన్షియల్, 210 మిమీ గ్రౌండ్ క్లియరెన్స్ వంటి ఫీచర్లు దీన్ని ఒక సరదాగా, ఆకర్షణీయమైన ఎస్‌యూవీగా చేస్తాయి. ఈ ఫీచర్లు ఆఫ్-రోడింగ్‌కు చాలా ఉపయోగపడతాయి.