Diesel SUVs : నెక్సాన్ నుంచి కియా సిరోస్ దాకా..మైలేజ్ కింగ్ డీజిల్ SUVలు ఇవే

 Diesel SUVs : భారతదేశంలో గత కొన్ని సంవత్సరాలుగా డీజిల్ కార్ల అమ్మకాలు క్రమంగా తగ్గుముఖం పడుతున్నాయి. కఠినమవుతున్న కాలుష్య నిబంధనలు, పెట్రోల్-డీజిల్ ధరల మధ్య తగ్గుతున్న వ్యత్యాసం, మార్కెట్లో డీజిల్ మోడళ్ల సంఖ్య తగ్గడం, పెట్రోల్ వేరియంట్ల కంటే డీజిల్ కార్ల ధరలు ఎక్కువగా ఉండటం వంటివి దీనికి ప్రధాన కారణాలు. అయినప్పటికీ డీజిల్ కార్లు ఇప్పటికీ ఒక ప్రత్యేక వినియోగదారుల వర్గాన్ని ఆకర్షిస్తున్నాయి. మెరుగైన డ్రైవింగ్ అనుభవం, ఎక్కువ మైలేజ్, సుదూర ప్రయాణాల కోసం పవర్ఫుల్ ఇంజిన్‌ను కోరుకునే వారికి డీజిల్ కార్లు ఇప్పటికీ ఫస్ట్ ఆప్షన్ గా ఉన్నాయి.

టాటా నెక్సాన్

అత్యధికంగా అమ్ముడవుతున్న ఎస్‌యూవీలలో ఒకటైన టాటా నెక్సాన్, డీజిల్ విభాగంలో మైలేజ్ కింగ్‌గా నిలిచింది. ఈ కారు డీజిల్ రేంజ్ ధర రూ.9.01 లక్షల నుంచి రూ.14.05 లక్షల (ఎక్స్-షోరూమ్) మధ్య ఉంది. నెక్సాన్ డీజిల్ వేరియంట్‌లో 1.5-లీటర్ ఇంజన్ ఉంది. ఆటోమేటెడ్ మాన్యువల్ ట్రాన్స్‌మిషన్ (AMT) ఆప్షన్‌తో కూడిన నెక్సాన్ డీజిల్ మోడల్, 24.08 కిమీ/లీటర్ ARAI సర్టిఫైడ్ మైలేజ్‌తో అత్యంత ఆర్థికవంతమైన కాంపాక్ట్ డీజిల్ ఎస్‌యూవీగా నిలిచింది. మాన్యువల్ వేరియంట్ కూడా 23.23 కిమీ/లీటర్ మైలేజీని అందిస్తుంది.

కియా సోనెట్ పనితీరు

ఈ విభాగంలో అత్యంత ప్రజాదరణ పొందిన మరొక ఎస్‌యూవీ కియా సోనెట్. దీని డీజిల్ మోడల్ ధర రూ.8.98 లక్షల నుంచి రూ.14.09 లక్షల (ఎక్స్-షోరూమ్) మధ్య ఉంది. ట్రాన్స్‌మిషన్ ఎంపికను బట్టి, సోనెట్ డీజిల్ 18.6 కిమీ/లీటర్ నుంచి 22.3 కిమీ/లీటర్ వరకు మైలేజీని ఇస్తుంది.

మహీంద్రా XUV 3XO

తర్వాతి స్థానంలో మహీంద్రా XUV 3XO ఉంది. బ్రాండ్‌లో అత్యంత చౌకైన ఈ కాంపాక్ట్ ఎస్‌యూవీ 1.5-లీటర్ డీజిల్ ఇంజన్‌తో నడుస్తుంది. ఆరు-స్పీడ్ మాన్యువల్ గేర్‌బాక్స్ మరియు ఏఎంటీ ఆప్షన్‌లతో లభించే XUV 3XO, వేరియంట్‌ను బట్టి 20.6 కిమీ/లీటర్, 21.2 కిమీ/లీటర్ మధ్య మైలేజీని అందిస్తుంది. దీని ధర రూ.8.95 లక్షల నుంచి రూ.13.43 లక్షల (ఎక్స్-షోరూమ్) మధ్య ఉంది.

హ్యుందాయ్ వెన్యూ

హ్యుందాయ్ వెన్యూ రెండవ జనరేషన్ మోడల్ డీజిల్ ఎంపికలో 1.5-లీటర్, నాలుగు-సిలిండర్ ఇంజన్‌తో వస్తుంది. మాన్యువల్, ఆటోమేటిక్ గేర్‌బాక్స్ ఆప్షన్‌లతో లభించే ఈ డీజిల్ వెన్యూ, ట్రాన్స్‌మిషన్ ఎంపికను బట్టి 17.9 కిమీ/లీటర్ నుంచి 20.99 కిమీ/లీటర్ మధ్య ARAI-సర్టిఫైడ్ మైలేజీనిస్తుంది. దీని డీజిల్ వేరియంట్ ధర రూ.9.70 లక్షల నుంచి రూ.15.69 లక్షల (ఎక్స్-షోరూమ్) మధ్య ఉంది.

కియా సైరోస్

కియా సైరోస్ సోనెట్‌లో ఉన్న అదే ఇంజన్‌తో వస్తుంది, కానీ మైలేజ్ కొద్దిగా తక్కువగా ఉంటుంది. సైరోస్ మాన్యువల్ డీజిల్ వేరియంట్ 20.75 కిమీ/లీటర్ మైలేజీని ఇవ్వగా, ఆటోమేటిక్ వెర్షన్ 17.65 కిమీ/లీటర్ మైలేజీనిస్తుంది. దీని డీజిల్ మోడల్ ధర రూ.10.14 లక్షల నుంచి రూ.15.94 లక్షల (ఎక్స్-షోరూమ్) మధ్య ఉంది.