PF Claim : పీఎఫ్ ఖాతాదారులకు గుడ్ న్యూస్..ఇక చిటికెలో రూ.5 లక్షల వరకు క్లెయిమ్స్

PF Claim : ఉద్యోగుల భవిష్య నిధి సంస్థ (EPFO) వినియోగదారులకు గుడ్ న్యూస్. మీ క్లెయిమ్‌లు ఇక మీదట మరింత వేగంగా సెటిల్ కానున్నాయి. ముఖ్యంగా రూ.5 లక్షల వరకు ఉన్న క్లెయిమ్‌లు ఆటోమేటిక్‌గా, తక్కువ సమయంలోనే ఆమోదం లభిస్తుంది. ఈ నిర్ణయం కోట్లాది మంది సభ్యులకు ఎంతో ఉపశమనం కలిగించనుంది. సెప్టెంబర్ 5, 2024న ఒక సీనియర్ అధికారి వెల్లడించిన వివరాల ప్రకారం.. ఈ ఆర్థిక సంవత్సరంలో ఇప్పటివరకు దాదాపు 50 శాతం క్లెయిమ్‌లను మూడు రోజుల్లోపే ఈపీఎఫ్‌ఓ పరిష్కరించింది. ఏప్రిల్ 1, 2025 నుంచి జూన్ 5, 2025 మధ్య మొత్తం 68.96 లక్షల క్లెయిమ్‌లను మూడు రోజుల్లోపే పరిష్కరించినట్లు ఆ అధికారి వెల్లడించారు.

రూ.5 లక్షల వరకు ఆటో సెటిల్మెంట్

2024-25 ఆర్థిక సంవత్సరంలో క్లెయిమ్‌ల పరిష్కార నిష్పత్తి 39 శాతం (2.34 కోట్లు)గా ఉంది. అయితే, ఈపీఎఫ్‌ఓ త్వరలో ఆటోమేటిక్ క్లెయిమ్ పరిష్కార పరిమితిని ప్రస్తుతం ఉన్న లక్ష రూపాయల నుండి ఐదు లక్షల రూపాయలకు పెంచాలని నిర్ణయించింది. దీనివల్ల మూడు రోజుల్లో పరిష్కరించే క్లెయిమ్‌ల సంఖ్య భారీగా పెరుగుతుందని అధికారులు ఆశాభావం వ్యక్తం చేశారు.

అధికారులు తెలిపిన ప్రకారం.. ఈ పరిమితి పెంపుదలకు ఈపీఎఫ్‌ఓ అత్యున్నత సంస్థ అయిన సీబీటీ ఆమోదం అవసరం లేదు. ప్రస్తుతం లక్ష రూపాయల వరకు ఉన్న అన్ని అర్హత కలిగిన విత్‌డ్రాయల్ క్లెయిమ్‌లు ఆటోమేటిక్ గా పరిష్కరించబడతాయి. అయితే, దీనికి అన్ని అవసరమైన షరతులు నెరవేర్చాలి. అనారోగ్యం, విద్య, గృహ నిర్మాణం, వివాహం కోసం లక్ష రూపాయల వరకు ఈపీఎఫ్‌ఓ అడ్వాన్స్ క్లెయిమ్‌లు కేవలం మూడు రోజుల్లో పరిష్కరించబడుతున్నాయి. ఈపీఎఫ్‌ఓ అంతిమ లక్ష్యం ఏమిటంటే, పెన్షన్, గ్రూప్ ఇన్సూరెన్స్, ఈపీఎఫ్ విత్ డ్రాయల్ వంటి అన్ని రకాల క్లెయిమ్‌లను దరఖాస్తు చేసిన 72 గంటల్లోపు పరిష్కరించడమే.

క్లెయిమ్ పరిష్కార ప్రక్రియలో జాప్యానికి కారణమయ్యే పాత డేటాను సరిచేయడానికి ఈ సంస్థ కృషి చేస్తోంది. ఈపీఎఫ్‌ఓకు ఏడు కోట్లకు పైగా కాంట్రిబ్యూటర్ మెంబర్స్ ఉన్నారు. ఈ కొత్త మార్పుల వల్ల వారికి మరింత వేగంగా సేవలు అందుబాటులోకి వస్తాయి. ఈపీఎఫ్‌ఓ తీసుకున్న ఈ నిర్ణయం వల్ల లక్షలాది మంది ఉద్యోగులకు ఆర్థికంగా త్వరిత ఉపశమనం లభించనుంది.