Amitabh Bachchan : 82ఏళ్ల వయసులో కూడా తగ్గేదేలే.. ఆస్తుల విషయంలో షారుక్ ఖాన్‌కు కూడా గట్టి పోటీ

 Amitabh Bachchan : బాలీవుడ్‌లో అత్యంత ధనవంతుడైన నటుడు షారుక్ ఖాన్, అత్యంత ధనవంతురాలైన సీనియర్ హీరోయిన్ జూహీ చావ్లా అని అందరికీ తెలుసు. వీరందరూ 60 ఏళ్ల లోపు వారే. అయితే, సినీ పరిశ్రమలోని సీనియర్ నటుల్లో అత్యంత సంపన్నుడు ఎవరు? ఆయన మరెవరో కాదు. అమితాబ్ బచ్చన్. ఆయన వయసు ఇప్పుడు 82 ఏళ్లు. ఈ వయసులో కూడా ఆయన సంపాదనలో చాలా మంది యువ సినీ ప్రముఖులకు గట్టి పోటీ ఇస్తున్నారు. ఒకప్పుడు రూ.90 కోట్ల అప్పులు, దివాలా వంటి కష్టాలు ఎదుర్కొన్న అమితాబ్, ఇప్పుడు మళ్లీ విజయ శిఖరాగ్రాన ఉన్నారు.

హూరున్ ఇండియా రిచ్ లిస్ట్ 2025 ప్రకారం.. 82 ఏళ్ల అమితాబ్ బచ్చన్ బాలీవుడ్‌లో అత్యంత సంపన్నుడు, సీనియర్ నటుడు. దశాబ్దాలు గడిచినా ఆయన బ్రాండ్ వాల్యూ చాలా బలంగా ఉంది. సినిమాలు, రియల్ ఎస్టేట్, అనేక పెద్ద ప్రకటనలలో పెట్టుబడులు పెట్టడం వల్ల ఆయన మొత్తం ఆస్తి రూ.1,630 కోట్లకు చేరుకుంది.

సంపద విషయంలో షారుక్ ఖాన్, అతని కుటుంబం రూ.12,490 కోట్ల నికర విలువతో మొదటి స్థానంలో ఉన్నారు. జూహీ చావ్లా, ఆమె కుటుంబం రూ.7,790 కోట్ల ఆస్తితో రెండవ స్థానంలో ఉన్నారు. యువ నటుల్లో హృతిక్ రోషన్ (రూ.2,160 కోట్లు) మూడవ స్థానంలో, కరణ్ జోహార్ (రూ.1,880 కోట్లు) నాల్గవ స్థానంలో ఉన్నారు. అమితాబ్ బచ్చన్, అతని కుటుంబం రూ.1,630 కోట్ల నికర విలువతో ఐదవ స్థానంలో ఉన్నారు. ఈ ర్యాంకింగ్‌ను బట్టి చూస్తే, వయసులో పెద్దవారైన అమితాబ్ యువ తారలకు దీటుగా నిలవడం విశేషం.

అమితాబ్ బచ్చన్ ప్రముఖ టీవీ షో కౌన్ బనేగా కరోడ్‌పతి సీజన్ 17 కోసం ప్రతి ఎపిసోడ్‌కు దాదాపు రూ.5 కోట్లు ఫీజు తీసుకుంటున్నారు. సినిమాల కోసం ఆయన ఫీజు రూ.6 కోట్ల నుంచి రూ.10 కోట్ల మధ్య ఉంటుంది. బ్రాండ్ ఎండార్స్‌మెంట్‌ల ద్వారా ఆయన రూ.58 కోట్ల వరకు సంపాదిస్తున్నారు. రియల్ ఎస్టేట్ రంగంలో కూడా అమితాబ్ బచ్చన్‌కు మంచి పెట్టుబడులు ఉన్నాయి. ముంబైలోని జుహూలో ఉన్న ఆయన ఐకానిక్ బంగ్లా ప్రతీక్ష విలువ దాదాపు రూ.50 కోట్లు. దీనితో పాటు జుహూలోని కపోల్ హౌసింగ్ సొసైటీలో తన కొడుకు అభిషేక్ బచ్చన్‌తో కలిసి రూ.45 కోట్ల విలువైన ఆస్తికి యజమానిగా ఉన్నారు. అంతేకాకుండా, ఆయనకు గోరేగావ్‌లోని ఒబెరాయ్ సెవెన్, పూణేలోని పావ్నాలో భూమి, ఫ్రాన్స్‌లో కూడా ఆస్తులు ఉన్నాయి.