EPFO : యూపీఐ ద్వారా ఈపీఎఫ్ఓ డబ్బులు.. కొత్త రూల్స్ ఇవే

EPFO : ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) మెంబర్స్ త్వరలో తమ పీఎఫ్ ఖాతా నుంచి డబ్బులను యూపీఐ లేదా ఏటీఎం వంటి ఇతర మార్గాల ద్వారా కూడా ఈజీగా విత్‌డ్రా చేసుకోగలుగుతారు. దీనికోసం పీఎఫ్ ఖాతాను తమ బ్యాంకు ఖాతాకు లింక్ చేయాల్సి ఉంటుంది. కార్మిక మంత్రిత్వ శాఖ ఒక కొత్త ప్రాజెక్టుపై పనిచేస్తున్నట్లు ఉన్నతాధికారులు తెలిపారు. ఈ ప్రాజెక్టులో పీఎఫ్ నుంచి కొంత మొత్తాన్ని నిలిపివేసి, ఎక్కువ భాగాన్ని యూపీఐ లేదా ఏటీఎం డెబిట్ కార్డ్ వంటి వివిధ మార్గాల ద్వారా విత్‌డ్రా చేసుకునే సదుపాయాన్ని కల్పిస్తారు.

ఆటో-సెటిల్‌మెంట్ లిమిట్ పెంపు

ఈ కొత్త విధానాన్ని అమలు చేయడంలో కొన్ని సాఫ్ట్‌వేర్ సమస్యలు ఉన్నాయని, వాటిని పరిష్కరిస్తున్నారని సమాచారం. ప్రస్తుతం, ఈపీఎఫ్ఓ సభ్యులు తమ పీఎఫ్ విత్‌డ్రా కోసం దరఖాస్తు చేసుకోవాలి, దీనికి కొంత సమయం పడుతుంది. అయితే, ఆటోమేషన్ సెటిల్‌మెంట్ విధానం కింద, దరఖాస్తు ఫారం దాఖలు చేసిన మూడు రోజులలోపు ఎలక్ట్రానిక్ పద్ధతిలో విత్‌డ్రా క్లెయిమ్‌లను పరిష్కరిస్తారు. మంగళవారం ఈ ఆటో-సెటిల్‌మెంట్ పరిమితిని ప్రస్తుతం ఉన్న రూ.1 లక్ష నుంచి రూ.5 లక్షలకు పెంచారు. ఈ పెంపుతో, ఎక్కువ మంది ఈపీఎఫ్ఓ సభ్యులు అనారోగ్యం, విద్య, వివాహం, గృహ నిర్మాణం వంటి అవసరాల కోసం మూడు రోజులలోపు తమ పీఎఫ్ డబ్బును ఉపయోగించుకునే సౌలభ్యం లభిస్తుంది.

గతంలో రూ.1 లక్ష కంటే ఎక్కువ మొత్తాన్ని విత్‌డ్రా చేయాలంటే, మాన్యువల్ వెరిఫికేషన్ ప్రక్రియ ద్వారా వెళ్ళాల్సి వచ్చేది. దీని కోసం ఈపీఎఫ్ఓ కార్యాలయానికి వెళ్లి, చాలాసార్లు ఎక్కువ సమయం వేచి ఉండాల్సి వచ్చేది. పత్రాలను సమర్పించడం నుంచి అనుమతి పొందడం వరకు, మొత్తం ప్రక్రియకు చాలా రోజులు లేదా వారాలు పట్టేది. ముఖ్యంగా మెడికల్ ఎమర్జెన్సీలు, వివాహాలు లేదా ఇల్లు కొనుగోలు వంటి పెద్ద ఖర్చులకు వెంటనే డబ్బు అవసరమైన వారికి ఇది మరింత ఇబ్బందికరంగా ఉండేది. కానీ ఇప్పుడు రూ.5 లక్షల వరకు ఆటో-సెటిల్‌మెంట్ లిమిట్ పెరగడంతో, ఈ సమస్యలన్నీ తొలగిపోతాయి. ఉద్యోగులు తమ పీఎఫ్ ఖాతా నుంచి అవసరమైనప్పుడు తక్షణమే డబ్బును విత్‌డ్రా చేసుకోగలుగుతారు.