Elon Musk : మస్క్ విశ్వరూపం.. కేవలం 24 గంటల్లోనే వారెన్ బఫెట్ జీవితకాల ఆస్తి కంటే ఎక్కువ సంపాదన

Elon Musk : ప్రపంచంలోనే మొట్టమొదటి, ఏకైక ట్రిలియనీర్ అయిన ఎలాన్ మస్క్ సంపాదన వేగం ప్రపంచాన్ని ముక్కున వేలేసుకునేలా చేస్తోంది. జూన్ 2026 నాటి బ్లూమ్‌బర్గ్ బిలియనీర్స్ ఇండెక్స్ నివేదిక ప్రకారం.. ఎలాన్ మస్క్ వ్యక్తిగత ఆస్తి కేవలం ఒక్క రోజులోనే 164 బిలియన్ డాలర్లు పెరిగింది. ఈ భారీ పెంపు ఎంత పెద్దదంటే, ప్రపంచంలోనే అత్యంత ప్రసిద్ధ ఇన్వెస్టర్ వారెన్ బఫెట్ తన జీవితకాలం మొత్తం కష్టపడి సంపాదించిన ఆస్తి 148 బిలియన్ డాలర్లు మాత్రమే. మస్క్ కేవలం 24 గంటల్లోనే బఫెట్ లైఫ్ టైమ్ నెట్ వర్త్‌ను ఈజీగా దాటేశాడు. ఈ అద్భుతమైన లాభంతో మస్క్ మొత్తం నెట్ వర్త్ ఇప్పుడు 1.27 ట్రిలియన్ డాలర్ల సరికొత్త శిఖరానికి చేరుకుంది.

నాస్డాక్ మార్కెట్లో స్పేస్‌ఎక్స్ ఐపీఓ రికార్డులు

ఎలాన్ మస్క్ ఆస్తి ఇంతలా పెరగడానికి ప్రధాన కారణం అతని శాటిలైట్ మరియు రాకెట్ తయారీ సంస్థ స్పేస్‌ఎక్స్ షేర్లలో వచ్చిన భారీ ఉప్పెన. స్టాక్ మార్కెట్లో రికార్డ్ బ్రేకింగ్ ఐపీఓగా అడుగుపెట్టిన స్పేస్‌ఎక్స్, ట్రేడింగ్ ప్రారంభమైన రెండో రోజైన సోమవారం నాడు ఏకంగా 19.6 శాతం పెరిగి 192.46 డాలర్ల వద్ద ముగిసింది. అంతకుముందు శుక్రవారం నాస్డాక్ మార్కెట్లో అరంగేట్రం చేసిన మొదటి రోజే ఈ షేరు 19 శాతం పెరిగింది. ఈ అద్భుతమైన పర్ఫార్మెన్స్ కారణంగా, మార్కెట్ వాల్యూ పరంగా అమెరికాలోనే ఆరో అతిపెద్ద కంపెనీగా స్పేస్‌ఎక్స్ అధికారికంగా అవతరించింది. ఈ ఐపీఓ ద్వారా కంపెనీ ఏకంగా 75 బిలియన్ డాలర్ల భారీ నిధిని సేకరించి సరికొత్త చరిత్ర సృష్టించింది.

మస్క్ సంపదకు స్పేస్‌ఎక్స్ ఓనర్షిప్ ఏ ఇంధనం

ఎలాన్ మస్క్ సంపాదనలో సింహభాగం ఈ అంతరిక్ష పరిశోధన సంస్థలోని అతని వాటా ద్వారానే వస్తోంది. అధికారిక ఫైలింగ్స్ ప్రకారం.. మస్క్ వద్ద స్పేస్‌ఎక్స్ కి చెందిన సుమారు 4.8 బిలియన్ షేర్లు, 350 మిలియన్ స్టాక్ ఆప్షన్లు ఉన్నాయి. మొత్తంగా ఈ కంపెనీలో మస్క్‌కు ఉన్న 38 శాతం ఈక్విటీ వాటాయే ప్రస్తుతం అతని ఆర్థిక సామ్రాజ్యాన్ని రాకెట్ వేగంతో ముందుకు నడిపిస్తోంది. వారాంతంలో వాల్ స్ట్రీట్ ఇన్వెస్టర్లను ఉద్దేశించి మాట్లాడిన మస్క్.. స్పేస్‌ఎక్స్ సంస్థ రాబోయే 2030 సంవత్సరం నాటికి ఏటా 1 ట్రిలియన్ డాలర్ల ఆదాయాన్ని సాధించగలదని సంచలన ప్రకటన చేశాడు. ఈ ప్రకటనతో ఇన్వెస్టర్లు స్పేస్‌ఎక్స్ షేర్లను భారీగా కొనుగోలు చేశారు.

ఇండెక్స్ లలో చేరిక, నిపుణుల హెచ్చరిక

స్పేస్‌ఎక్స్ షేర్ల దూకుడు రాబోయే రోజుల్లో కూడా ఇలాగే కొనసాగేలా కనిపిస్తోంది. ఎందుకంటే గ్లోబల్ స్టాక్ మార్కెట్ ఇండెక్స్ అయిన నాస్డాక్ 100లోకి స్పేస్‌ఎక్స్ ను చాలా వేగంగా చేర్చుకుంటున్నారు. దీనివల్ల ప్రపంచవ్యాప్తంగా ఉన్న ఈటీఎఫ్‌లు, పాసివ్ ఫండ్స్ ఈ షేర్లను కచ్చితంగా కొనుగోలు చేయాల్సి ఉంటుంది. అంతేకాకుండా ఎఫ్‌టీఎస్‌ఈ రస్సెల్, ఎమ్మెస్సీఐ వంటి అంతర్జాతీయ గ్లోబల్ ఇండెక్స్‌లు కూడా జూన్ 26, జూన్ 29 నుంచి స్పేస్‌ఎక్స్ ను తమ జాబితాలో చేర్చబోతున్నాయి. అయితే, మార్కెట్ విశ్లేషకులు మాత్రం స్పేస్‌ఎక్స్ షేర్ల వాల్యుయేషన్ చాలా ఎక్కువగా ఉందని, ప్రారంభ రోజుల్లో ఈ స్టాక్ లో భారీ హెచ్చుతగ్గులు ఉండే అవకాశం ఉన్నందున ఇన్వెస్టర్లు కాస్త జాగ్రత్తగా ఉండాలని సూచిస్తున్నారు.

ఇతర కుబేరుల కంటే చాలా ముందున్న మస్క్

కేవలం కొన్ని నెలల వ్యవధిలోనే ఎలాన్ మస్క్ నెట్ వర్త్ అద్భుతమైన మైలురాళ్లను దాటుకుంటూ వచ్చింది. గతేడాది అక్టోబర్‌లో 500 బిలియన్ డాలర్లుగా ఉన్న అతని ఆస్తి, డిసెంబర్ నాటికి 600 బిలియన్లు, ఆ తర్వాత కొద్దిరోజులకే 700 బిలియన్ డాలర్లను దాటేసింది. ఇప్పుడు స్పేస్‌ఎక్స్ పబ్లిక్ లిస్టింగ్ తో అది 1.27 ట్రిలియన్ డాలర్లకు చేరింది. ఈ భారీ పెంపుతో మస్క్ ప్రపంచంలోని ఇతర బిలియనీర్ల కంటే చాలా మైళ్ల దూరంలో నిలిచాడు. గ్లోబల్ వెల్త్ ర్యాంకింగ్స్‌లో ప్రస్తుతం గూగుల్ కో-ఫౌండర్ లారీ పేజ్ 314 బిలియన్ డాలర్లతో రెండో స్థానంలో, సెర్గీ బ్రిన్ 292 బిలియన్ డాలర్లతో మూడో స్థానంలో, అమెజాన్ జెఫ్ బెజోస్ 267 బిలియన్ డాలర్లతో నాలుగో స్థానంలో ఉన్నారు. వీరి తర్వాత స్థానాల్లో లారీ ఎల్లిసన్, మైఖేల్ డెల్, మార్క్ జుకర్‌బర్గ్‌లు కొనసాగుతున్నారు.