Urea Crisis : ప్రపంచాన్ని వణికిస్తున్న యూరియా కొరత.. పంటలను కాపాడుకోవడానికి రైతుల మాస్టర్ ప్లాన్

Urea Crisis : పశ్చిమ ఆసియా, ఇరాన్ పరిసర ప్రాంతాలలో రోజురోజుకూ పెరుగుతున్న అంతర్జాతీయ ఉద్రిక్తతలు ఇప్పుడు ప్రపంచవ్యాప్త వ్యవసాయ రంగాన్ని కోలుకోలేని దెబ్బ తీస్తున్నాయి. ముఖ్యంగా పంటల ఎదుగుదలకు అత్యంత కీలకమైన నైట్రోజన్ ఆధారిత యూరియా ఎరువుల సరఫరాకు తీవ్ర అంతరాయం ఏర్పడింది. దీంతో ప్రపంచవ్యాప్తంగా ఉన్న రైతులు తమ పంటలను కాపాడుకోవడానికి రసాయన ఎరువులను పక్కనబెట్టి.. మానవ మూత్రం, కోడి రెట్టలు, సేంద్రీయ వ్యర్థాల వంటి వినూత్న ప్రత్యామ్నాయ మార్గాలను వెతుక్కుంటున్నారు.

ప్రపంచవ్యాప్తంగా వినియోగించే యూరియా ఎరువులలో దాదాపు మూడో వంతు సరఫరా కేవలం గల్ఫ్ దేశాల నుంచే జరుగుతుంది. అయితే అంతర్జాతీయ వాణిజ్యానికి కీలకమైన హోర్ముజ్ జలసంధి ప్రాంతంలో యుద్ధ వాతావరణం నెలకొనడంతో ఎరువుల రవాణా నిలిచిపోయింది. దీనివల్ల మార్కెట్లో డిమాండ్ పెరిగి యూరియా ధరలు గత కొన్ని ఏళ్లలో ఎన్నడూ లేనంత గరిష్ట స్థాయికి చేరుకున్నాయి. పెట్టుబడి ఖర్చులు భారీగా పెరిగిపోవడంతో సామాన్య రైతులు రసాయన ఎరువులను కొనలేక చేతులెత్తేస్తున్నారు.

కోడి రెట్టలకు పెరిగిన డిమాండ్

రసాయన ఎరువుల కొరతను అధిగమించడానికి ఇంగ్లాండ్‌కు చెందిన రైతులు ఇప్పుడు సరికొత్త దారిని ఎంచుకున్నారు. అక్కడ గోధుమలు, బార్లీ, ఓట్స్ పండించే కస్టర్ మిల్స్ అనే రైతు.. సాంప్రదాయ యూరియాకు బదులుగా పౌల్ట్రీ ఫారాల నుంచి వచ్చే కోడి రెట్టలను ఎరువుగా వాడుతున్నారు. ప్రత్యామ్నాయం లేకపోవడంతో ఆ ప్రాంతంలోని రైతులందరూ ఒకేసారి పౌల్ట్రీ వ్యర్థాల కోసం ఎగబడుతుండటంతో వీటికి మార్కెట్లో ఊహించని డిమాండ్ ఏర్పడింది. అయితే కేవలం సేంద్రీయ ఎరువులపైనే ఆధారపడి పూర్తిస్థాయి వ్యవసాయాన్ని లాభసాటిగా నడపడం అంత సులువు కాదని రైతులు వాపోతున్నారు.

మానవ మూత్రంతో సేంద్రీయ ఎరువు

మరోవైపు ఫ్రాన్స్‌కు చెందిన టూపి ఆర్గానిక్స్ అనే బయోటెక్ స్టార్టప్ కంపెనీ వినూత్న ఆలోచనతో ప్రపంచ దృష్టిని ఆకర్షిస్తోంది. ఈ కంపెనీ వివిధ పాఠశాలలు, కాలేజీలు మరియు పెద్ద పెద్ద బహిరంగ ఈవెంట్ల నుంచి మానవ మూత్రాన్ని సేకరిస్తోంది. దానిని రీసైకిల్ చేసి మొక్కల పెరుగుదలకు తోడ్పడే అద్భుతమైన బయో-ఫెర్టిలైజర్‌గా మారుస్తోంది. అంతర్జాతీయంగా ఎరువుల కొరత మొదలైన ఫిబ్రవరి నెల తర్వాత తమ కంపెనీ ఉత్పత్తుల విక్రయాలు ఏకంగా 25 శాతం పెరిగాయని ఆ సంస్థ ప్రతినిధులు వెల్లడించారు.

ప్రపంచవ్యాప్తంగా పెరుగుతున్న బయో-ఫెర్టిలైజర్ల వినియోగం

సమస్య ఒక్క యూరప్‌కే పరిమితం కాలేదు. అమెరికా, మలేషియా, థాయిలాండ్ వంటి దేశాల్లో కూడా రైతులు ప్రకృతి సిద్ధమైన ఎరువుల వైపు వేగంగా మళ్లుతున్నారు. కొన్ని అగ్రి-టెక్ కంపెనీలు బాదం పప్పు తొక్కలు, జంతువుల వ్యర్థాలు, వినూత్న బ్యాక్టీరియా సాంకేతికతతో సేంద్రీయ ఎరువులను తయారు చేస్తూ మార్కెట్లోకి వదులుతున్నాయి. మార్కెట్లో రసాయన ఎరువుల కొరత ఉన్నంత కాలం ఇటువంటి ఆర్గానిక్ ప్రత్యామ్నాయాలకు ఆదరణ పెరుగుతూనే ఉంటుందని నిపుణులు అంచనా వేస్తున్నారు.

శ్రీలంక సంక్షోభం గుర్తుందా?

ఈ ప్రత్యామ్నాయాలు తాత్కాలికంగా సహాయపడినప్పటికీ, రసాయన ఎరువుల స్థానాన్ని ఇవి పూర్తిగా భర్తీ చేయలేవని వ్యవసాయ శాస్త్రవేత్తలు స్పష్టం చేస్తున్నారు. గతంలో 2021లో శ్రీలంక ప్రభుత్వం దేశవ్యాప్తంగా రసాయన ఎరువులను రద్దు చేసి, రాత్రికి రాత్రే వంద శాతం ఆర్గానిక్ వ్యవసాయాన్ని అమలు చేయాలని చూసింది. ఫలితంగా అక్కడ పండించే టీ, వరి పంటల దిగుబడి ఘోరంగా పడిపోయి, దేశం తీవ్ర ఆర్థిక సంక్షోభంలో కూరుకుపోయింది. కాబట్టి కెమికల్ ఎరువులను పూర్తిగా బంద్ చేయడం సాధ్యం కాదని నిపుణులు గుర్తు చేస్తున్నారు.

ముంచుకొస్తున్న ఆహార సంక్షోభం

ఈ ఎరువుల సంక్షోభం ఇలాగే మరికొన్ని నెలలు కొనసాగితే ప్రపంచవ్యాప్తంగా తీవ్రమైన ఆహార కొరత ఏర్పడే ప్రమాదం ఉందని ఐక్యరాజ్యసమితి ఆందోళన వ్యక్తం చేసింది. ఎరువులు సకాలంలో అందకపోతే ప్రపంచవ్యాప్తంగా పంటల దిగుబడి గణనీయంగా తగ్గుతుంది. దీనివల్ల మార్కెట్లో బియ్యం, గోధుమలు, కూరగాయలు వంటి నిత్యావసర వస్తువుల కొరత ఏర్పడి, ధరలు సామాన్యుడికి ఇబ్బందికరంగా మారే ప్రమాదం ఉందని ఆర్థిక నిపుణులు హెచ్చరిస్తున్నారు.