Gold Price : భారీగా పెరిగిన బంగారం, వెండి ధరలు..ఒక్కరోజే వెండిపై రూ.6,000 పైగా జంప్

Gold Price : బంగారం, వెండి కొనాలని ప్లాన్ చేస్తున్నారా? అయితే ఈ వార్త మీ గుండెల్లో రైళ్లు పరిగెత్తించడం ఖాయం. గత కొన్ని రోజులుగా ఊగిసలాటలో ఉన్న పసిడి, వెండి ధరలు ఈరోజు ఒక్కసారిగా ఆకాశాన్ని తాకాయి. మార్కెట్ ప్రారంభం కావడమే భారీ లాభాలతో మొదలై, సామాన్యుడికి చుక్కలు చూపిస్తున్నాయి. ముఖ్యంగా వెండి ధరలో వచ్చిన మార్పు చూస్తుంటే, అది సామాన్యులకు అందనంత ఎత్తుకు చేరుకుంటోందని అర్థమవుతోంది. మల్టీ కమోడిటీ ఎక్స్ఛేంజ్ (MCX)లో నమోదవుతున్న గణాంకాలు కొనుగోలుదారుల జేబులకు భారీ చిల్లు పెడుతున్నాయి.

ఈరోజు వెండి ధర చూస్తుంటే దిమ్మతిరిగిపోవాల్సిందే. సాధారణంగా వెండి ధరల్లో కొన్ని వందల రూపాయల మార్పు రావడం సహజం, కానీ ఈరోజు ఏకంగా వేలల్లో పెరిగింది. ఎంసీఎక్స్ మార్కెట్‌లో ఉదయం 10 గంటల సమయానికి కిలో వెండి ధర ఏకంగా రూ.6,488 పెరిగి, రూ.2,42,923 స్థాయికి చేరుకుంది. ఇది ఒక ఆల్ టైమ్ రికార్డు అని చెప్పాలి. ట్రేడింగ్ ప్రారంభంలో రూ.2,39,626 వద్ద ఉన్న వెండి, కొనుగోలుదారుల తాకిడితో రూ.2,43,699 వరకు వెళ్ళింది. పారిశ్రామిక అవసరాలు, అంతర్జాతీయ పరిణామాల వల్ల వెండి సామాన్యులకు అందని ద్రాక్షలా మారుతోంది.

పెళ్లిళ్ల సీజన్ కోసం నగలు చేయించుకోవాలని భావిస్తున్న వారికి పసిడి ధరలు షాక్ ఇస్తున్నాయి. ఈరోజు ఉదయం 10 గ్రాముల బంగారం ధర ఏకంగా రూ.1,639 పెరిగింది. దీంతో 10 గ్రాముల (తులం) బంగారం ధర రూ.1,54,475 వద్ద ట్రేడ్ అవుతోంది. ఇది దాదాపు రూ.1.55 లక్షల మార్కుకు చేరువలో ఉండటం గమనార్హం. రోజంతా సాగిన ఒడిదుడుకుల్లో పసిడి కనిష్టంగా రూ.1,53,750 గా ఉండగా, గరిష్టంగా రూ.1,54,837 కి చేరుకుంది. సురక్షితమైన పెట్టుబడిగా భావించే బంగారంపై ఇన్వెస్టర్ల ఆసక్తి పెరగడమే ఈ రేట్ల పెరుగుదలకు ప్రధాన కారణం.

గత కొన్ని రోజులుగా బులియన్ మార్కెట్ తీరుతెన్నులు అర్థం కావడం లేదు. ఒకరోజు ధరలు కాస్త తగ్గుతుంటే, మరుసటి రోజే రెట్టింపు వేగంతో పెరుగుతున్నాయి. ఎంసీఎక్స్ మార్కెట్‌లో ధరలు ఇంత భారీగా పెరిగినప్పుడు, లోకల్ మార్కెట్‌లో జ్యువెలర్లు దీనికి మేకింగ్ ఛార్జీలు, జీఎస్టీ వంటి పన్నులు జత చేస్తారు. ఫలితంగా కస్టమర్ వరకు వచ్చేసరికి ఈ ధరలు ఇంకా ఎక్కువగా ఉంటాయి. అంతర్జాతీయ మార్కెట్‌లో డాలర్ విలువలో మార్పులు, ప్రపంచ వ్యాప్త ఆర్థిక అనిశ్చితి వంటి కారణాలు పసిడి, వెండి ధరలను ప్రభావితం చేస్తున్నాయి.