New RBI Guidelines : హోమ్ లోన్ కస్టమర్‌లకు ఊరట..రూ.వేలు ఆదా చేయాలంటే RBI కొత్త నియమాన్ని వాడుకోండి

 New RBI Guidelines :మీరు ఇల్లు కొనడానికి లోన్ తీసుకోవాలని ఆలోచిస్తున్నట్లయితే మీకో గుడ్ న్యూస్. రిజర్వ్ బ్యాంక్ ఆఫ్ ఇండియా ఫ్లోటింగ్-రేట్ రుణాలపై వడ్డీ రేట్లను నిర్ణయించే క్రెడిట్ స్కోర్ నియమాలలో కీలకమైన మార్పులు చేసింది. ఈ కొత్త నిబంధనల ప్రకారం, మీ క్రెడిట్ స్కోర్ మెరుగైతే, మీరు వెంటనే తక్కువ వడ్డీ రేటుతో లోన్ పొందే అవకాశం ఉంది. గతంలో ఈ ప్రయోజనం పొందడానికి మూడు సంవత్సరాలు వేచి చూడాల్సి వచ్చేది.

సాధారణంగా, బ్యాంకులు అందించే ఫ్లోటింగ్-రేట్ లోన్స్ వడ్డీ రేటు రెండు ప్రధాన అంశాల ఆధారంగా నిర్ణయిస్తారు. మొదటిది, ఎక్స్‌టర్నల్ బెంచ్‌మార్క్. రెండవది, బ్యాంక్ స్ప్రెడ్. ఈ స్ప్రెడ్ అనేది రుణగ్రహీత క్రెడిట్ రిస్క్, బ్యాంక్ నిర్వహణ ఖర్చులను కవర్ చేయడానికి బ్యాంక్ అదనంగా విధించే మార్జిన్. ఆర్బీఐ తాజాగా చేసిన ముఖ్యమైన మార్పు ఏమిటంటే.. ఈ స్ప్రెడ్ ప్రొవిజన్స్‌ను సవరించింది. ముఖ్యంగా గతంలో ఉన్న మూడు సంవత్సరాల లాక్-ఇన్ పీరియడ్‌ ను తొలగించింది. ఈ నిబంధనల ప్రకారం ఒక కస్టమర్ క్రెడిట్ స్కోర్ మెరుగుపడితే, బ్యాంక్ ఆ స్ప్రెడ్‌ను తగ్గించి, తద్వారా లోన్ వడ్డీ రేటును తగ్గించే అవకాశం ఉంటుంది. ఇప్పుడు పాత కస్టమర్‌లు కూడా తమ క్రెడిట్ స్కోర్ మెరుగుపడిన వెంటనే, ఈ స్ప్రెడ్ రివ్యూ కోసం దరఖాస్తు చేసుకోవచ్చు. తక్షణమే తక్కువ వడ్డీ రేటు ప్రయోజనాన్ని పొందవచ్చు.

హోమ్ లోన్ తీసుకున్న కస్టమర్లకు ఈ కొత్త నిబంధనల వల్ల ఆర్థికంగా పెద్ద ప్రయోజనం ఉంటుంది. లోన్ తీసుకున్న తర్వాత, మీ క్రెడిట్ స్కోర్ పెరిగినట్లు మీరు గమనిస్తే, వెంటనే మీరు మీ బ్యాంక్‌ను సంప్రదించి వడ్డీ రేటు తగ్గించాలని దరఖాస్తు చేసుకోవాలి. మీరు దరఖాస్తు చేసుకున్న తర్వాత, బ్యాంక్ మీ ప్రస్తుత క్రెడిట్ స్కోర్‌ను మళ్లీ అంచనా వేస్తుంది. మీ ఆర్థిక స్థితి, క్రెడిట్ హిస్టరీ మెరుగ్గా ఉందని నిర్ధారణ అయితే, బ్యాంక్ మీపై విధించే స్ప్రెడ్‌ను తగ్గిస్తుంది. దీనివల్ల మీ లోన్ వడ్డీ రేటు తగ్గి ఈఎంఐ భారం తగ్గుతుంది. లేదా వడ్డీ తగ్గకుండా లోన్ గడువు తగ్గించే అవకాశం కూడా ఉంది. హోమ్ లోన్‌లు రూ.50-60 లక్షల వరకు సుదీర్ఘ కాలానికి ఉంటాయి కాబట్టి వడ్డీ రేటు కేవలం 0.25 శాతం తగ్గినా కూడా, మీ లోన్ కాలంలో వేల రూపాయలు ఆదా అవుతాయి. క్రెడిట్ స్కోర్ బాగా ఉంటే ఆదా మరింత ఎక్కువగా ఉంటుంది.

ఆర్బీఐ అడ్వాన్సెస్ వడ్డీ రేటు నిబంధనలలో ఈ మార్పు ముఖ్యంగా ఇప్పటికే లోన్ తీసుకున్న పాత కస్టమర్‌లకు ప్రయోజనం చేకూరుస్తుంది. గతంలో కొత్త కస్టమర్‌లకు మార్కెట్ రేట్ల ప్రకారం వెంటనే తక్కువ వడ్డీ రేటు లభించేది.. కానీ పాత కస్టమర్‌లు స్ప్రెడ్ తగ్గింపు కోసం దాదాపు మూడేళ్లు వేచి ఉండాల్సి వచ్చేది. కొత్త నిబంధనల ద్వారా ఈ అసమానత తొలగించబడింది. పాత కస్టమర్లకు కూడా ఇప్పుడు సమాన అవకాశం లభిస్తుంది. అయితే ఈ ప్రయోజనాన్ని పొందడానికి కస్టమర్‌లు స్వయంగా చొరవ తీసుకుని తమ బ్యాంక్‌ను సంప్రదించి, క్రెడిట్ స్కోర్ మెరుగుపడిన వివరాలను అందించి, వడ్డీ రేటు తగ్గింపును డిమాండ్ చేయాలి.