Income Tax Rules : ఫారెన్‌లో ఉంటూ ఫ్రీగా గిఫ్ట్‌లు నొక్కేద్దామనుకుంటే కుదరదు.. ఇన్ కం ట్యాక్స్ రూల్స్ చాలా స్ట్రిక్ట్ గురూ

Income Tax Rules : విదేశాల్లో నివసించే భారతీయులు తరచూ భారతదేశంలో ఉన్న తమ తల్లిదండ్రులు, తోబుట్టువులు లేదా ఇతర బంధువుల నుంచి డబ్బు, ఆస్తులు లేదా ఇతర బహుమతులు పొందుతుంటారు. అయితే ఇలా వచ్చే బహుమతులపై పన్నులు కట్టాలా వద్దా అనే సందేహం చాలామందిలో ఉంటుంది. దీనికి సమాధానం కేవలం ఆదాయపు పన్ను చట్టం పరిధిలోనే కాకుండా, విదేశీ మారకద్రవ్య నిర్వహణ చట్టం (FEMA) నిబంధనలతో కూడా ముడిపడి ఉంది. అందుకే ఎన్‌ఆర్‌ఐలు భారతదేశం నుంచి ఏ రకమైన బహుమతిని స్వీకరించాలన్నా ఈ రెండు చట్టాలకు సంబంధించిన నిబంధనలపై పూర్తి అవగాహన కలిగి ఉండటం చాలా ముఖ్యం.

ఎప్పుడు టాక్స్ కట్టాల్సిన అవసరం లేదు?

ఆదాయపు పన్ను చట్టం ప్రకారం.. ఆదాయపు పన్ను శాఖ నిర్దేశించిన సమీప బంధువుల నుంచి ఎన్‌ఆర్‌ఐకి బహుమతి లభిస్తే, ఆ మొత్తం ఎంత ఉన్నప్పటికీ దానిపై ఎలాంటి పన్ను చెల్లించాల్సిన అవసరం లేదు. తల్లిదండ్రులు, భార్యాభర్తలు, తోబుట్టువులు, తాతయ్యలు, అమ్మమ్మలు, నానమ్మలు, పిల్లలు, మరికొందరు ఆత్మీయ బంధువులు ఈ పరిధిలోకి వస్తారు. అయితే, ఈ చట్టం ప్రకారం 'బంధువులు' కాని ఇతరుల నుంచి లభించే బహుమతుల విలువ ఒక ఆర్థిక సంవత్సరంలో రూ.50,000 దాటితే, ఆ మొత్తాన్ని ఎన్‌ఆర్‌ఐ ఆదాయంగా పరిగణించి నిబంధనల ప్రకారం పన్ను విధిస్తారు.

ఫెమా నిబంధనలు కూడా చాలా ముఖ్యం

కేవలం ఇన్‌కమ్ టాక్స్ నిబంధనలు పాటిస్తే సరిపోదు. బహుమతిగా ఇచ్చే లావాదేవీలలో విదేశీ మారకద్రవ్యం లేదా భారత్ నుంచి బయటకు, భారత్‌లోకి నిధుల బదిలీలు ఉన్నప్పుడు ఫెమా చట్టం వర్తిస్తుంది. భారతదేశంలో నివసిస్తున్న ఒక వ్యక్తి ఎన్‌ఆర్‌ఐకి బహుమతిగా డబ్బు పంపాలనుకుంటే, ఆ లావాదేవీ ఫెమా నిబంధనలకు కట్టుబడి ఉందో లేదో సరిచూసుకోవాలి. ఇందులో పంపే నగదు పరిమితులు, ఉపయోగించే బ్యాంకింగ్ ఛానెళ్లు, ఇతర నిబంధనలను కచ్చితంగా పాటించాల్సి ఉంటుంది.

ఆస్తులు లేదా షేర్లు బహుమతిగా వస్తే నియమాలు వేరు

కేవలం నగదు మాత్రమే కాకుండా, స్థిరాస్తులు (ఇళ్లు, స్థలాలు), కంపెనీ షేర్లు లేదా ఇతర ఆర్థిక ఆస్తులను ఎన్‌ఆర్‌ఐకి బహుమతిగా ఇచ్చినప్పుడు వేర్వేరు నిబంధనలు వర్తిస్తాయి. ఎన్‌ఆర్‌ఐలకు ఆస్తులు లేదా షేర్లు బదిలీ చేసే సమయంలో ఫెమా నిబంధనలతో పాటు ఇతర రిజిస్ట్రేషన్ చట్టాలు పాటించడం తప్పనిసరి. బహుమతిగా ఇచ్చే ఆస్తి రకం, ఇచ్చే వ్యక్తి స్థితిని బట్టి ఈ నియమాలు మారుతుంటాయి.

గిఫ్ట్ తీసుకునే ముందు వహించాల్సిన జాగ్రత్తలు

ఎన్‌ఆర్‌ఐలు ఏదైనా బహుమతిని స్వీకరించే ముందు, ఆ బహుమతి ఇస్తున్న వ్యక్తి ఇన్‌కమ్ టాక్స్ చట్టం ప్రకారం బంధువు పరిధిలోకి వస్తారో లేదో స్పష్టం చేసుకోవాలని ఆర్థిక నిపుణులు సూచిస్తున్నారు. అలాగే బహుమతికి సంబంధించిన బ్యాంక్ రికార్డులు, లావాదేవీల ఆధారాలు, అవసరమైతే గిఫ్ట్ డీడ్ పత్రాలను భద్రపరుచుకోవాలి. బహుమతి విలువ పెద్దదిగా ఉన్నా లేదా ఆస్తులు, షేర్లు, విదేశీ మారకద్రవ్యంతో కూడుకున్నదైనా భవిష్యత్తులో నోటీసులు, చట్టపరమైన ఇబ్బందులు రాకుండా ఉండేందుకు చార్టర్డ్ అకౌంటెంట్ లేదా టాక్స్ నిపుణుల సలహా తీసుకోవడం ఉత్తమం.