Crude Oil: ఒడిశాలో రూ.8,571 కోట్లతో దేశంలోనే అతిపెద్ద చమురు నిల్వ కేంద్రం

Crude Oil: భారతదేశ ఇంధన భద్రతను మరింత పటిష్టం చేసేందుకు కేంద్ర ప్రభుత్వం మరో చారిత్రక నిర్ణయం తీసుకుంది. ఒడిశా రాష్ట్రంలోని చండిఖోల్ ప్రాంతంలో సుమారు 4 మిలియన్(40 లక్షల) టన్నుల ముడి చమురును నిల్వ చేసే సామర్థ్యంతో దేశంలోనే అతిపెద్ద వ్యూహాత్మక పెట్రోలియం రిజర్వ్‌ను ఏర్పాటు చేయనుంది. ఈ భారీ ప్రాజెక్టు కోసం ప్రైవేట్ పెట్టుబడిదారులను ఆహ్వానిస్తూ టెండర్లను జారీ చేసింది. అంచనా వ్యయం ప్రకారం ఈ ప్రాజెక్టు విలువ రూ. 8,571 కోట్లుగా ఉంది. ఈ నూతన సౌకర్యం అందుబాటులోకి వస్తే దేశంలో ప్రస్తుతం ఉన్న వ్యూహాత్మక చమురు నిల్వ సామర్థ్యం ఏకంగా 80 శాతం వరకు పెరుగుతుందని నిపుణులు అంచనా వేస్తున్నారు.

టెండర్ నిబంధనలు అలాగే ప్రభుత్వ ఆర్థిక సాయం

ఈ ప్రతిష్టాత్మక ప్రాజెక్టును పబ్లిక్-ప్రైవేట్ పార్ట్‌నర్‌షిప్ (PPP) పద్ధతిలో నిర్మించనున్నారు. ప్రైవేట్ భాగస్వాములను ఆకర్షించేందుకు ప్రభుత్వం ముందుకు వచ్చి మొత్తం ప్రాజెక్టు వ్యూహంలో భాగంగా రూ. 5,142 కోట్ల వరకు గ్రాంట్‌గా అందించనుంది. అత్యల్ప ప్రభుత్వ గ్రాంట్‌ను కోరే బిడ్డర్‌కు ఈ కాంట్రాక్టు దక్కనుంది. డిజైన్, నిర్మాణం, ఫండింగ్, నిర్వహణ అలాగే బదిలీ(DBFOT) విధానంలో ఈ కమర్షియల్, వ్యూహాత్మక నిల్వ కేంద్రాలను అభివృద్ధి చేయనున్నారు. కొత్త ప్రాజెక్టుకు సంబంధించిన బిడ్లను సమర్పించేందుకు 2027 ఫిబ్రవరి 26 వరకు గడువు ఇచ్చారు.

పశ్చిమ ఆసియా సంక్షోభాలు

గతంలో పశ్చిమ ఆసియా దేశాల్లో తలెత్తిన ఉద్రిక్తతలు, ముఖ్యంగా హోర్ముజ్ జలసంధి మార్గంలో ఏర్పడిన అవరోధాలు భారత దేశానికి పెద్ద గుణపాఠంగా మారాయి. ఆ సమయంలో సరఫరా గొలుసు దెబ్బతిని భారత్‌కు రావాల్సిన దాదాపు 40 శాతం ముడి చమురు నిలిచిపోయింది. దీనివల్ల రిఫైనరీలు ప్రత్యామ్నాయ మార్గాల కోసం భారీగా అదనపు ఖర్చులు భరించాల్సి వచ్చింది. ఇరాన్ యుద్ధ పరిస్థితులు అలాగే భవిష్యత్తులో ఇంధన సరఫరాలో ఎలాంటి అంతరాయాలు ఎదురైనా తట్టుకునేలా దేశీయంగా చమురు నిల్వలను భారీగా పెంచుకోవాలని కేంద్రం ఈ నిర్ణయం తీసుకుంది. సౌదీ అరేబియా, యూఏఈ వంటి దేశాలు కూడా విదేశాల్లో చమురును నిల్వ చేస్తున్న వ్యూహాన్ని భారత్ ఇప్పుడు వేగవంతం చేసింది.

రెండో దశ కింద వేగవంతమవుతున్న ప్రాజెక్టులు

భారత వ్యూహాత్మక పెట్రోలియం రిజర్వ్ కార్యక్రమంలో భాగంగా ఇది రెండో దశ కింద అమలువుతోంది. ఇప్పటికే విశాఖపట్నం, మంగళూరు, పాదుర్ ప్రాంతాలలో 5.03 మిలియన్ టన్నుల సామర్థ్యంతో మూడు నిల్వ కేంద్రాలను గతంలోనే నిర్మించారు. ఇప్పుడు ఒడిశాలోని చండిఖోల్ ప్రాజెక్టుతో పాటు కర్ణాటకలోని పాదుర్ ప్రాజెక్టును కూడా వేగవంతం చేస్తున్నారు. మరోవైపు ప్రభుత్వ రంగ సంస్థ అయిన ఓఎన్‌జీసీ కూడా మంగళూరులో 1.75 మిలియన్ టన్నుల సామర్థ్యంతో కొత్త నిల్వ కేంద్రం నిర్మాణానికి శ్రీకారం చుట్టింది. ఈ చర్యల ద్వారా భవిష్యత్తులో ఏకకాలంలో ఇంధన సంక్షోభం తలెత్తినా దేశ ఆర్థిక వ్యవస్థకు ఎలాంటి ఇబ్బంది కలగకుండా ఉండేందుకు పకడ్బందీ చర్యలు అమలవుతున్నాయి.