IndiGo : విమాన ప్రయాణికులకు ఇండిగో బంపర్ ఆఫర్.. ఏకంగా 20,000 మందికి ఉచిత ఫ్లైట్ టికెట్లు

IndiGo : దేశీయ ఏవియేషన్ రంగంలో అత్యంత ప్రజాదరణ పొందిన అతిపెద్ద ఎయిర్‌లైన్ సంస్థ ఇండిగో తమ ప్రయాణికులకు ఊహించని బంపర్ ఆఫర్‌ను ప్రకటించింది. కంపెనీ విజయవంతంగా 20 ఏళ్లు పూర్తి చేసుకున్న సందర్భంగా తన 20వ వార్షికోత్సవాన్ని పురస్కరించుకుని ఈ ప్రత్యేకమైన ఆఫర్‌ను తీసుకొచ్చింది. ఈ ఆఫర్ కింద ఎంపిక చేసిన 20,000 మంది దేశీయ ప్రయాణికులకు వారి విమాన టికెట్ మొత్తాన్ని పూర్తిగా రీఫండ్ చేయనుంది. అంటే సరైన సమయంలో లక్ కలసివస్తే మీ విమాన ప్రయాణం ఉచితంగా పూర్తవుతుందన్నమాట.

హ్యాపీ ఇండిగో డే స్పెషల్ ఆఫర్ టైమింగ్స్ ఇవే

కంపెనీ ఈ విజయోత్సవ క్యాంపెయిన్‌కు హ్యాపీ ఇండిగో డే అని నామకరణం చేసింది. ఈ ప్రత్యేక ఆఫర్ ఆగస్ట్ 4వ తేదీ నుంచి ఆగస్ట్ 6, 2026 వరకు మాత్రమే అందుబాటులో ఉంటుంది. ఈ మూడు రోజుల వ్యవధిలో విమాన టికెట్లు బుక్ చేసుకునే ప్రయాణికులకు మాత్రమే ఈ రీఫండ్ ఆఫర్‌లో పాల్గొనే అవకాశం లభిస్తుంది. అయితే బుకింగ్ చేసుకున్న అందరికీ ఉచితంగా టికెట్లు రావు. కంపెనీ లక్కీ డ్రా పద్ధతి ద్వారా మొత్తం 20,000 మంది అదృష్టవంతులైన కస్టమర్లను ఎంపిక చేస్తుంది.

ఈ ఆఫర్ ఎలా పొందాలో తెలుసుకోండి

ఈ ఆఫర్ ప్రయోజనం పొందాలంటే ప్రయాణికులు కొన్ని ముఖ్యమైన నిబంధనలను పాటించాల్సి ఉంటుంది. ఇండిగో అధికారిక వెబ్‌సైట్, మొబైల్ యాప్ లేదా వారి AI వర్చువల్ అసిస్టెంట్ ద్వారా మాత్రమే విమాన టికెట్లను బుక్ చేసుకోవాలి. థర్డ్ పార్టీ ట్రావెల్ ఏజెన్సీలు, మేక్‌మైట్రిప్, గోఐబిబో వంటి ఇతర ఆన్‌లైన్ పోర్టళ్ల ద్వారా బుక్ చేసిన టికెట్లకు ఈ ఆఫర్ వర్తించదు. కేవలం నేరుగా ఇండిగో ప్లాట్‌ఫామ్స్ ద్వారా బుకింగ్ చేసుకునే ప్రయాణికులు మాత్రమే ఈ లక్కీ డ్రా పోటీకి అర్హులుగా పరిగణించబడతారు.

టికెట్ డబ్బులు ఎలా రీఫండ్ అవుతాయి?

ఈ ఆఫర్ సమయంలో టికెట్ బుక్ చేసుకున్న వారిలో కంపెనీ 20,000 మందిని ఎంపిక చేస్తుంది. ఎంపికైన ప్రయాణికులకు వారి ఈమెయిల్, వాట్సాప్‌కు ఒక సందేశం వస్తుంది. అందులో వారిని ఒక చిన్న సరళమైన ప్రశ్నకు సమాధానం చెప్పమని కోరతారు. ఆ ప్రశ్నకు సరైన సమాధానం చెప్పడానికి ప్రయాణికుడికి మొత్తం 3 అవకాశాలు ఇస్తారు. సరైన సమాధానం ఇవ్వగానే వారు చెల్లించిన టికెట్ సొమ్మును కంపెనీ ఖాతాలో రీఫండ్ చేస్తుంది. ఒక పీఎన్‌ఆర్ పై గరిష్టంగా రూ. 10,000 వరకు రీఫండ్ లభిస్తుంది. ఈ సొమ్ము 3 నుంచి 5 రోజుల్లో కస్టమర్ ఖాతాలో జమ అవుతుంది.

ఏ ఏ రూట్లు, క్లాసులకు ఈ ఆఫర్ వర్తిస్తుంది?

ఇండిగో ఈ ఆఫర్‌ను ఎకానమీ క్లాస్‌తో పాటు ప్రీమియం వర్గానికి చెందిన ఇండిగోస్ట్రెచ్ బుకింగ్‌లకు కూడా వర్తింపజేసింది. ప్రయాణికులు వన్-వే టికెట్ కొనుగోలు చేసినా లేదా రిటర్న్ టికెట్ బుక్ చేసుకున్నా ఈ లక్కీ ఆఫర్‌కు అర్హులే. అయితే ఈ ఆఫర్ కేవలం భారత దేశీయ విమాన సర్వీసులకు మాత్రమే పరిమితం, అంతర్జాతీయ విమాన ప్రయాణాలకు ఈ ఆఫర్ వర్తించదని సంస్థ స్పష్టం చేసింది.