ITR Filing : ఆదాయపు పన్ను రిటర్న్స్ దాఖలు చేసే ప్రక్రియ ప్రస్తుతం జోరుగా సాగుతోంది. ఉద్యోగులు, పెన్షనర్లకు జూలై 31, 2026తో తుది గడువు పూర్తయినప్పటికీ, చిన్న వ్యాపారులు, ఫ్రీలాన్సర్లు, స్వయం ఉపాధి పొందే వారికి ఆదాయపు పన్ను శాఖ ఊరటనిచ్చింది. పన్ను విధింపు నిబంధనల ప్రకారం వ్యాపారం లేదా వృత్తి ద్వారా ఆదాయం పొందుతూ, ఆడిటింగ్ అవసరం లేని వారు ఆగస్టు 31, 2026 వరకు ఎలాంటి అదనపు రుసుము లేకుండా తమ ఐటీఆర్‌ను సులభంగా ఫైల్ చేసుకోవచ్చు.

ఐటీఆర్-3, ఐటీఆర్-4 ఫారంల నిబంధనలు

అసెస్మెంట్ ఇయర్ 2026-27 ఆదాయపు పన్ను నిబంధనల ప్రకారం.. ఆర్థిక సంవత్సరం 2025-26 లో వ్యాపారం లేదా వృత్తి ద్వారా ఆదాయం పొందినవారికి ఈ ఆగస్టు 31 డెడ్‌లైన్ వర్తిస్తుంది. ప్రోప్రైటర్షిప్ బిజినెస్ నడిపే వారు ఐటీఆర్-3 ఫారం ద్వారా తమ వివరాలను సమర్పించాలి. అలాగే ప్రిజెంప్టివ్ టాక్సేషన్ స్కీమ్ ఎంచుకునే చిన్న వ్యాపారులు లేదా ప్రొఫెషనల్స్ ఐటీఆర్-4 ఫారం ఉపయోగించి పన్ను రిటర్న్‌లను పూర్తి చేయవచ్చు. బిజినెస్ టర్నోవర్ ఆడిట్ పరిమితి కంటే తక్కువగా ఉన్న ప్రతి ఒక్కరికీ ఈ గడువు అందుబాటులో ఉంటుంది.

ట్యాక్స్ ఆడిట్ అయ్యే వారికి అక్టోబర్ 31 వరకు గడువు

వ్యాపారం చేసే ప్రతి ఒక్కరికీ ఆగస్టు 31 చివరి తేదీ కాదు. వార్షిక టర్నోవర్ రూ.కోటి కంటే ఎక్కువ ఉన్న వ్యాపారవేత్తలు తమ ఖాతాలను తప్పనిసరిగా ట్యాక్స్ ఆడిట్ చేయించుకోవాల్సి ఉంటుంది (డిజిటల్ లావాదేవీలు ఎక్కువగా ఉన్న చోట ఈ పరిమితి రూ.10 కోట్ల వరకు ఉంటుంది). అలాగే డాక్టర్లు, లాయర్లు వంటి ప్రొఫెషనల్స్ వార్షిక ఆదాయం రూ.75 లక్షలు దాటితే ఆడిటింగ్ తప్పనిసరి. ఈ ఆడిట్ పరిధిలోకి వచ్చే పన్ను చెల్లింపుదారులందరికీ ఐటీఆర్ దాఖలు చేయడానికి అక్టోబర్ 31, 2026 వరకు సమయం ఇచ్చారు.

గడువు తప్పితే రూ.5,000 జరిమానా, వడ్డీ భారం

నిర్ణీత గడువులోగా ఐటీఆర్ దాఖలు చేయడంలో విఫలమైతే పన్ను చెల్లింపుదారులు తీవ్ర ఆర్థిక నష్టాన్ని ఎదుర్కోవాల్సి వస్తుంది. గడువు దాటిన తర్వాత వేసే బిలేటెడ్ రిటర్న్ పై ఆదాయాన్ని బట్టి గరిష్టంగా రూ.5,000 వరకు ఆలస్య రుసుము విధిస్తారు. అంతేకాకుండా వ్యాపారంలో వచ్చిన నష్టాలను తర్వాతి సంవత్సరాలకు క్యారీ ఫార్వర్డ్ చేసుకునే అవకాశాన్ని కోల్పోతారు. పన్ను బాకీలు ఉంటే సెక్షన్ 234A ప్రకారం అదనపు వడ్డీ చెల్లించాల్సి ఉంటుంది. కాబట్టి పన్ను చెల్లింపుదారులు వెంటనే ఇ-ఫైలింగ్ పోర్టల్‌ను సందర్శించి ఏఐఎస్ (AIS), ఫారం 26AS సరిచూసుకుని రిటర్న్‌లను పూర్తి చేయడం మంచిది.

Tags: