PostOffice Scheme : పోస్టాఫీసు అదిరిపోయే స్కీమ్.. ఇక్కడ డబ్బులు డబుల్ అవ్వడం గ్యారెంటీ.. 100% సర్కారీ భరోసా

PostOffice Scheme : షేర్ మార్కెట్ అంటే భయం ఉన్నవారికి, పెట్టిన పెట్టుబడికి రూపాయి కూడా నష్టం రాకూడదని కోరుకునే వారికి పోస్టాఫీసు ఒక అద్భుతమైన పథకాన్ని అందిస్తోంది. అదే కిసాన్ వికాస్ పత్ర(KVP). భారత ప్రభుత్వ పూర్తి గ్యారెంటీతో కూడిన ఈ స్కీమ్‌లో మీరు పెట్టిన డబ్బు కేవలం నిర్ణీత కాలంలో రెట్టింపు అవుతుంది. రూపాయి రిస్క్ లేకుండా లక్షాధికారి కావాలనుకునే వారికి ఇది బెస్ట్ ఆప్షన్. పోస్టాఫీసు కిసాన్ వికాస్ పత్ర (KVP) స్కీమ్‌లో పెట్టుబడిదారుల ప్రధాన ఆకర్షణ డబ్బు రెట్టింపు అవ్వడం. ప్రస్తుత వడ్డీ రేట్ల ప్రకారం.. మీరు ఈ పథకంలో పెట్టిన పెట్టుబడి సరిగ్గా 115 నెలల్లో (అంటే 9 ఏళ్ల 7 నెలలు) రెట్టింపు అవుతుంది. ఉదాహరణకు, మీరు ఈ రోజు ఒక 5 లక్షల రూపాయలు ఈ స్కీమ్‌లో ఇన్వెస్ట్ చేస్తే, మెచ్యూరిటీ సమయానికి ఎటువంటి రిస్క్ లేకుండా మీ చేతికి 10 లక్షల రూపాయలు అందుతాయి. మధ్యతరగతి కుటుంబాలకు ఇది ఒక అద్భుతమైన పొదుపు మార్గం.

వడ్డీ రేటు, పెట్టుబడి పరిమితి

ప్రస్తుతం ఈ పథకంపై ప్రభుత్వం 7.5% వార్షిక వడ్డీని అందిస్తోంది. ఇది అనేక ప్రముఖ బ్యాంకుల్లో ఇచ్చే ఫిక్స్‌డ్ డిపాజిట్ (FD) వడ్డీ రేట్ల కంటే మెరుగ్గా ఉండటం విశేషం. ఈ స్కీమ్ లో కేవలం రూ.1,000తోనే మీ ఖాతాను ప్రారంభించవచ్చు. ఇందులో పెట్టుబడి పెట్టడానికి గరిష్ట పరిమితి అంటూ ఏమీ లేదు. మీ దగ్గర ఉన్న వేలు, లక్షలు లేదా కోట్లు.. ఎంతైనా నిరభ్యంతరంగా పెట్టుబడి పెట్టవచ్చు. ప్రభుత్వం దీనికి పూర్తి బాధ్యత వహిస్తుంది కాబట్టి మీ సొమ్ముకు 100% రక్షణ ఉంటుంది.

ఎవరు అర్హులు? ఖాతా ఎలా తెరవాలి?

భారతదేశ పౌరుడైన ఎవరైనా ఈ కిసాన్ వికాస్ పత్రను కొనుగోలు చేయవచ్చు. ఒంటరిగా (సింగిల్ అకౌంట్) లేదా మరో ఇద్దరితో కలిసి (జాయింట్ అకౌంట్) కూడా దీనిని ప్రారంభించవచ్చు. తల్లిదండ్రులు తమ మైనర్ పిల్లల పేరు మీద కూడా ఈ సర్టిఫికెట్లను కొనుగోలు చేసే వెసులుబాటు ఉంది. ఇందులో నామినేషన్ సదుపాయం కూడా అందుబాటులో ఉంది. మీరు దేశంలోని ఏ పోస్టాఫీసులోనైనా ఈ ఖాతా తెరవవచ్చు, అవసరమైతే ఒక పోస్టాఫీసు నుంచి మరొక పోస్టాఫీసుకి సులభంగా బదిలీ చేసుకోవచ్చు.

అవసరమైతే మధ్యలోనే డబ్బు తీసుకోవచ్చా?

దీర్ఘకాలిక పెట్టుబడి అయినప్పటికీ, అత్యవసర సమయాల్లో డబ్బు తీసుకోవడానికి ఇందులో ఆప్షన్ ఉంది. KVP స్కీమ్‌లో రెండున్నర ఏళ్ల (30 నెలలు) లాక్-ఇన్ పీరియడ్ ఉంటుంది. అంటే ఈ కాలం పూర్తయిన తర్వాత మీరు కావాలనుకుంటే మీ పెట్టుబడిని వెనక్కి తీసుకోవచ్చు. అంతేకాకుండా, ఏదైనా ఎమర్జెన్సీలో ఈ KVP సర్టిఫికెట్‌ను బ్యాంకులో తాకట్టు పెట్టి తక్కువ వడ్డీకే లోన్ పొందే సదుపాయం కూడా ఉంది. దీనివల్ల మీ పొదుపు ఆగదు, మీ పని కూడా ఆగిపోదు.