Interest Rate Cut: లోన్ తీసుకునే వాళ్లకు గుడ్ న్యూస్.. చౌకగా మారనున్న వడ్డీ రేట్లు

Interest Rate Cut: లోన్ తీసుకునే వారికి శుభవార్త. పబ్లిక్ సెక్టార్ బ్యాంక్ ఆఫ్ బరోడా (Bank of Baroda), ప్రైవేట్ సెక్టార్ హెచ్‌డీఎఫ్‌సీ బ్యాంక్ (HDFC Bank) రెండూ తమ రుణాలపై వడ్డీ రేట్లను తగ్గించాయి. భారతీయ రిజర్వ్ బ్యాంక్ (RBI) ఇటీవల రెపో రేటును తగ్గించిన నేపథ్యంలో ఈ నిర్ణయం తీసుకున్నారు. దీంతో హోమ్ లోన్, కార్ లోన్, ఇతర రుణాలపై వడ్డీ భారం తగ్గే అవకాశం ఉంది.

బ్యాంక్ ఆఫ్ బరోడాలో 0.50% తగ్గిన వడ్డీ రేట్లు

పబ్లిక్ సెక్టార్ బ్యాంక్ ఆఫ్ బరోడా (BoB) ఆదివారం ఒక ప్రకటనలో.. రిజర్వ్ బ్యాంక్ ఆఫ్ ఇండియా (RBI) వడ్డీ రేట్ల తగ్గింపుకు అనుగుణంగా కీలక రుణ రేటును 0.50 శాతం తగ్గించినట్లు తెలిపింది. బ్యాంక్ ఆఫ్ బరోడా ప్రకారం, జూన్ 7 నుండి తమ రెపో లింక్డ్ లెండింగ్ రేట్ (RLLR) ఇప్పుడు 8.15 శాతానికి తగ్గింది. దీంతో ఆర్‌బీఐ రెపో రేటు తగ్గింపును బ్యాంక్ ఆఫ్ బరోడా పూర్తిగా అమలు చేసినట్లయింది.

హెచ్‌డీఎఫ్‌సీ బ్యాంక్ కూడా

లోన్లు తీసుకున్న వారికి హెచ్‌డీఎఫ్‌సీ బ్యాంక్ (HDFC Bank) శుభవార్త చెప్పింది. వివిధ రకాల రుణాలపై వడ్డీ రేట్లను తగ్గించినట్లు ప్రకటించింది. రిజర్వ్ బ్యాంక్ ఆఫ్ ఇండియా (RBI) రెపో రేటును తగ్గించిన తర్వాత ఈ నిర్ణయం తీసుకున్నారు. దీంతో హోమ్ లోన్, కార్ లోన్ వంటి రుణాలపై వడ్డీ భారం తగ్గనుంది.హెచ్‌డీఎఫ్‌సీ బ్యాంక్ తన నిధుల మార్జినల్ కాస్ట్ బేస్డ్ లెండింగ్ రేటు(MCLR)ను 0.10 శాతం తగ్గించింది. MCLR అనేది బ్యాంకులు లోన్లకు వడ్డీ రేట్లను నిర్ణయించడానికి ఉపయోగించే ఒక ముఖ్యమైన కొలమానం. ఈ మార్పు జూన్ 7 నుండి అమలులోకి వచ్చింది. ఈ తగ్గింపుతో వివిధ కాలవ్యవధుల లోన్లపై వడ్డీ రేట్లు ఇలా ఉన్నాయి:

రేట్ల తగ్గింపుతో, ఒక రోజు , ఒక నెల కాలవ్యవధుల రేట్లు 0.10 శాతం తగ్గి 8.90 శాతానికి చేరాయి. మూడు నెలల కాలవ్యవధి రేటు 0.10 శాతం తగ్గి 8.95 శాతానికి చేరుకుంది. ఆరు నెలలు, ఒక సంవత్సరం కాలవ్యవధుల రేట్లు 0.10 శాతం తగ్గి 9.05 శాతానికి చేరాయి. రెండు సంవత్సరాలు, మూడు సంవత్సరాల కాలవ్యవధి రుణ రేటు గతంలో ఉన్న 9.20 శాతం నుండి 9.10 శాతానికి తగ్గుతాయి.

ఆర్‌బీఐ నిర్ణయంతో రుణాలపై భారం తగ్గింపు

ఆర్‌బీఐ ఇటీవలే తన రెపో రేటును 50 బేసిస్ పాయింట్లు (bps) తగ్గించింది. రెపో రేటు అంటే బ్యాంకులు ఆర్‌బీఐ నుండి తీసుకునే రుణాలపై చెల్లించే వడ్డీ రేటు. ఇప్పుడు రెపో రేటు 6% నుండి 5.5%కి తగ్గింది. ఇది ఫిబ్రవరి 2025 నుండి వరుసగా మూడో తగ్గింపు. ఆర్‌బీఐ ఈ రేట్లను తగ్గించడం వల్ల బ్యాంకులపై భారం తగ్గి, వారు వినియోగదారులకు ఇచ్చే రుణాలపై వడ్డీ రేట్లను తగ్గించగలుగుతారు. ఎస్‌బీఐ (SBI) నివేదిక ప్రకారం.. ఆర్‌బీఐ తగ్గింపు వల్ల బ్యాంకుల ఎక్స్‌టర్నల్ బెంచ్‌మార్క్ బేస్డ్ లెండింగ్ రేట్స్ (EBLR), MCLR లలో 30బేసిస్ పాయింట్ల వరకు తగ్గింపు రావొచ్చు. ఈ వడ్డీ రేట్ల తగ్గింపుతో లోన్ తీసుకున్న వారికి EMI (ఈఎంఐ) భారం తగ్గుతుంది. ఇది ఆర్థిక కార్యకలాపాలకు కూడా ఊతమిస్తుంది. అంటే, లోన్లు చౌక కావడంతో ప్రజలు కార్లు, ఇళ్లు కొనడానికి, వ్యాపారాలు ప్రారంభించడానికి ఎక్కువ ఆసక్తి చూపుతారు.