Indian Railways : ఐఆర్‌సీటీసీ తత్కాల్ టికెట్లలో పెద్ద మోసం జరుగుతోందా? సర్వేలో షాకింగ్ నిజాలు

Indian Railways : భారతీయ రైల్వే (Indian Railways) ప్రయాణికుల సౌకర్యార్థం తత్కాల్ టికెట్ సర్వీసును ప్రారంభించింది. ఎవరికైనా అత్యవసరంగా ప్రయాణం చేయాల్సి వస్తే, ఈ సర్వీసును ఉపయోగించుకుని టికెట్లు బుక్ చేసుకోవచ్చని దీని ముఖ్య ఉద్దేశం. తత్కాల్ బుకింగ్‌ను సులభతరం చేయడం, పారదర్శకత పెంచడం, దళారులను అరికట్టడం దీని లక్ష్యం. అయితే, ఇప్పుడు చాలామంది ప్రయాణికులు ఆన్‌లైన్‌లో తత్కాల్ టికెట్ పొందడం దాదాపు అసాధ్యమని అంటున్నారు. సమయానికి లాగిన్ అయ్యి, వేగంగా డబ్బు చెల్లించినప్పటికీ, టికెట్లు తరచుగా బుక్ కావడం లేదని, చాలాసార్లు వెయిటింగ్ లిస్ట్‌లో ఉండాల్సి వస్తుందని లేదా టికెట్ లేకుండానే ఉండిపోవాల్సి వస్తుందని ప్రయాణికులు వాపోతున్నారు.

చాలామంది ప్రయాణికులు, ఏజెంట్లు ప్రత్యేక సాఫ్ట్‌వేర్ల (special software) లేదా రైల్వే అంతర్గత సహాయం (insider help) తీసుకుని తత్కాల్ టికెట్లను త్వరగా బుక్ చేసుకుంటున్నారని నమ్ముతున్నారు. లోకల్ సర్కిల్ (LocalCircles) ప్రకారం.. ఒక సాధారణ ప్రయాణికుడు 2014లో తత్కాల్ టికెట్ దొరికే అవకాశం 90శాతం పైగా ఉండేదని, అయితే ఇప్పుడు అది కేవలం 1 నుంచి 5శాతానికి తగ్గిందని చెప్పారు.

2015లో సాధారణ టికెట్ బుకింగ్ గురించి ఇలాంటి ఫిర్యాదులు వచ్చినప్పుడు.. రైల్వే మంత్రిత్వ శాఖ (Ministry of Railways) విచారణ జరిపింది. కొంతమంది ఏజెంట్లు, రైల్వే ఉద్యోగులు నకిలీ పేర్లను ఉపయోగించి సీట్లను బ్లాక్ చేయడానికి ప్రయత్నిస్తున్నట్లు కనుగొన్నారు. ఆ తర్వాత పేర్లను మార్చి, ఏజెంట్లు అధిక ధరకు టికెట్లను అమ్ముకునేవారు. ఆ లోపాలను సరిదిద్దడానికి ఇప్పుడు ప్రయాణికులు మళ్లీ ఇలాంటిదే జరుగుతుందేమోనని భయపడుతున్నారు.

2019 నుంచి 2024 వరకు భారతీయ రైల్వే సరుకు రవాణా (freight) నుంచి రూ. 7.02 లక్షల కోట్లు, ప్రయాణికుల నుండి రూ.2.41 లక్షల కోట్లు సంపాదించింది. ఇందులో పెద్ద మొత్తం తత్కాల్, ప్రీమియం తత్కాల్ టికెట్ల ద్వారానే వచ్చింది. అధిక డిమాండ్ ఉన్న ఈ టికెట్ల ధర సాధారణ ఛార్జీల కంటే మూడు రెట్లు వరకు ఎక్కువగా ఉండవచ్చు. ప్రభుత్వం దీని ద్వారా చాలా ఆదాయం పొందుతున్నప్పటికీ, ప్రయాణికులకు మాత్రం తత్కాల్ టికెట్ బుకింగ్ ప్రక్రియ చాలా నిరాశను కలిగిస్తోంది.

లోకల్ సర్కిల్స్ నిర్వహించిన ఒక జాతీయ సర్వేలో 396 జిల్లాల నుంచి 55,000 కంటే మంది స్పందనలను సేకరించారు. ఈ సర్వే ఫలితాలు చాలా ఆశ్చర్యకరంగా ఉన్నాయి. గతేడాది 10 మంది ప్రయాణికుల్లో 4 మంది తత్కాల్ టికెట్లు బుక్ చేసుకోవడంలో పూర్తిగా విఫలమయ్యారు. కేవలం 10% మంది మాత్రమే ఎల్లప్పుడూ బుక్ చేసుకోగలిగారు. 29% మంది 25% కన్నా తక్కువ సార్లు మాత్రమే విజయవంతం అయ్యారని చెప్పారు. మరో 29% మంది తాము ఎప్పుడూ తత్కాల్ టికెట్ బుక్ చేసుకోలేదని అన్నారు.

10 మందిలో 7 మందికి బుకింగ్ ప్రారంభం కాగానే సమస్యలు ఎదురయ్యాయి. 73% మంది మొదటి నిమిషంలోనే అన్ని టికెట్లు బుక్ అయిపోయాయని చెప్పారు. మరో 73% మంది టికెట్లు అందుబాటులో ఉన్నట్లు కనిపించినా, డబ్బు చెల్లించే సమయంలో అవి మాయమయ్యాయని చెప్పారు. కేవలం 14% మందికి మాత్రమే ఎటువంటి సమస్యలు ఎదుర్కోలేదని అన్నారు.

తత్కాల్ టికెట్లను ఎలా తీసుకుంటున్నారని అడిగినప్పుడు 32% మంది ట్రావెల్ ఏజెంట్ల ద్వారా టికెట్లు తీసుకుంటామని చెప్పారు. 8% మంది అనేక అకౌంట్లు, డివైస్‌లు (devices) ఉపయోగిస్తారు. 40% మంది ఇప్పటికీ సాధారణ ఆన్‌లైన్ బుకింగ్ సిస్టమ్‌ను ఉపయోగించడానికి ప్రయత్నిస్తారు. 6% మంది నేరుగా రైల్వే స్టేషన్‌కు వెళ్తారు. 7% మంది ఎంపీలు, ఎమ్మెల్యేలు లేదా రైల్వే ఉద్యోగుల నుండి సహాయం పొందడానికి ప్రయత్నిస్తారు. ఈ సర్వే తత్కాల్ టికెట్ వ్యవస్థలో పారదర్శకత లోపించిందని, ప్రయాణికులు తీవ్ర ఇబ్బందులు పడుతున్నారని స్పష్టం చేస్తోంది. దీనిపై రైల్వే శాఖ వెంటనే దృష్టి సారించాల్సిన అవసరం ఉంది.