US India Trade Deal : ఒక్క ఫోన్ కాల్‌తో టారిఫ్ యుద్ధానికి బ్రేక్.. భారత్‌కు ట్రంప్ బిగ్ రిలీఫ్

US India Trade Deal : అమెరికా అధ్యక్షుడిగా బాధ్యతలు చేపట్టిన డొనాల్డ్ ట్రంప్ తనదైన శైలిలో టారిఫ్ వార్ మొదలుపెట్టిన సంగతి తెలిసిందే. అయితే, భారత్ విషయంలో మాత్రం ఆయన అనూహ్యంగా మెత్తబడ్డారు. ప్రధాని మోదీతో జరిగిన ఒక్క ఫోన్ కాల్‌తో అంతర్జాతీయ వాణిజ్య సమీకరణాలే మారిపోయాయి. చైనా, పాకిస్థాన్‌ల కంటే తక్కువ టారిఫ్ భారత్‌కు దక్కడం ఇప్పుడు ప్రపంచవ్యాప్తంగా చర్చనీయాంశమైంది.

ఒక్క ఫోన్ కాల్.. టారిఫ్ మటాష్

అమెరికా అధ్యక్షుడు డొనాల్డ్ ట్రంప్ ప్రకటించిన భారీ సుంకాలు భారత ఎగుమతిదారులను కలవరపెట్టాయి. ఒకానొక దశలో భారత్‌పై 25 శాతం అదనపు టారిఫ్‌తో కలిపి మొత్తం 50 శాతం భారం పడుతుందని అంచనా వేశారు. కానీ, ప్రధాని మోదీతో ట్రంప్ మాట్లాడిన తర్వాత పరిస్థితి పూర్తిగా మారిపోయింది. ప్రస్తుతం భారత్‌పై టారిఫ్‌ను కేవలం 18 శాతానికి తగ్గిస్తూ ట్రంప్ నిర్ణయం తీసుకున్నారు. ఇది మన దేశ ఆటోమొబైల్, టెక్స్‌టైల్ రంగాలకు భారీ ఊరటనిచ్చే అంశం.

చైనా, పాక్ కంటే మనమే మెరుగు

అమెరికా విధిస్తున్న ఈ టారిఫ్ల జాబితాను గమనిస్తే, భారత్ ఇప్పుడు పొరుగు దేశాలైన చైనా, పాకిస్థాన్, బంగ్లాదేశ్ కంటే మెరుగైన స్థితిలో ఉంది. చైనాపై అమెరికా అత్యధికంగా సుంకాలు విధిస్తుండగా, పాకిస్థాన్‌పై 19 శాతం టారిఫ్ ఉంది. భారత్‌కు మాత్రం కేవలం 18 శాతమే కేటాయించడంతో, భారతీయ ఉత్పత్తులు అమెరికా మార్కెట్లో తక్కువ ధరకు లభించే అవకాశం ఉంది. దీనివల్ల మన ఎగుమతులు భారీగా పెరిగే అవకాశం కనిపిస్తోంది.

ఎమర్జింగ్ మార్కెట్లలో రెండో స్థానం

ప్రపంచంలోని అభివృద్ధి చెందుతున్న దేశాల జాబితాలో సౌత్ కొరియా తర్వాత అత్యంత తక్కువ టారిఫ్ రేటు కలిగిన దేశంగా భారత్ నిలిచింది. సౌత్ కొరియాపై 15 శాతం టారిఫ్ ఉండగా, భారత్ 18 శాతంతో రెండో స్థానంలో ఉంది. థాయిలాండ్, ఇండోనేషియా, బ్రెజిల్, మెక్సికో వంటి దేశాల కంటే భారత్ ఇప్పుడు వాణిజ్య పరంగా పైచేయి సాధించింది. అమెరికా తీసుకున్న ఈ నిర్ణయం భారత స్టాక్ మార్కెట్‌కు కూడా బూస్ట్ ఇవ్వనుంది.

భారత ఆర్థిక వ్యవస్థకు కొత్త ఊపిరి

అమెరికా సుంకాలను తగ్గించడం వల్ల కేవలం వ్యాపారులకే కాకుండా దేశ ఆర్థిక వ్యవస్థకు కూడా లాభం చేకూరనుంది. టారిఫ్ తగ్గడం వల్ల భారతీయ వస్తువులకు అమెరికాలో పోటీ పెరుగుతుంది. ముఖ్యంగా సాఫ్ట్‌వేర్ సేవల తర్వాత, ఫిజికల్ గూడ్స్ అంటే బట్టలు, విడిభాగాలు, ఫార్మా ఉత్పత్తుల అమ్మకాలు పెరిగే అవకాశం ఉంది. ట్రంప్ తన అమెరికా ఫస్ట్ విధానంలో భారత్‌ను కీలక భాగస్వామిగా గుర్తించడమే ఇందుకు ప్రధాన కారణమని విశ్లేషకులు భావిస్తున్నారు.