Milk Price Hike : అమూల్ బాటలోనే మదర్ డెయిరీ.. లీటరుకు రూ.2 పెంపు.. నేటి నుంచే కొత్త రేట్లు అమలు

Milk Price Hike : సామాన్యుడి వంటింట్లో పాల సెగ మొదలైంది. ఇప్పటికే పెరిగిన నిత్యావసర ధరలతో సతమతమవుతున్న సామాన్యుడిపై పాల కంపెనీలు అదనపు భారాన్ని మోపాయి. ప్రముఖ డెయిరీ దిగ్గజం అమూల్ ధరలను పెంచిన మరుసటి రోజే, మరో దిగ్గజం మదర్ డెయిరీ కూడా పాల ధరలను పెంచుతూ సంచలన నిర్ణయం తీసుకుంది. పెరిగిన ధరలు మే 14, 2026 (గురువారం) నుంచే అమలులోకి వస్తాయని కంపెనీ స్పష్టం చేసింది. ఈ పెంపుతో ఢిల్లీ-ఎన్‌సీఆర్‌తో పాటు దేశవ్యాప్తంగా ఉన్న వినియోగదారుల నెలవారీ బడ్జెట్‌పై ప్రభావం పడనుంది.

ఎందుకు పెంచాల్సి వచ్చింది?

రైతుల నుంచి పాలను సేకరించే ఖర్చు గత ఏడాది కాలంలో సుమారు 6 శాతం మేర పెరిగిందని మదర్ డెయిరీ పేర్కొంది. పశువుల మేత ధరలు, రవాణా ఖర్చులు, ప్యాకేజింగ్ మెటీరియల్ ధరలు విపరీతంగా పెరగడమే ఈ నిర్ణయానికి ప్రధాన కారణమని కంపెనీ వివరించింది. వినియోగదారులపై భారం పడకూడదనే ఉద్దేశంతో చాలా కాలం పాటు ధరలను పెంచకుండా నిరోధించామని, అయితే మారుతున్న పరిస్థితుల దృష్ట్యా ఇప్పుడు లీటరుకు రూ.2 పెంచక తప్పలేదని కంపెనీ ఒక ప్రకటనలో తెలిపింది.

అమూల్ కూడా ఇదే దారిలో..

మదర్ డెయిరీ కంటే ముందే అమూల్ సంస్థ కూడా దేశవ్యాప్తంగా అన్ని రకాల పాలపై లీటరుకు రూ.2 పెంచిన సంగతి తెలిసిందే. ఏప్రిల్ 2025 తర్వాత ధరలను మార్చడం ఇదే మొదటిసారి అని అమూల్ పేర్కొంది. తాము సంపాదించే ప్రతి రూపాయిలో 75 నుంచి 80 పైసలను రైతులకు చెల్లిస్తామని, పశుపోషణ ఖర్చులు పెరిగిన నేపథ్యంలో రైతులకు గిట్టుబాటు ధర కల్పించడానికే ఈ నిర్ణయం తీసుకున్నట్లు అమూల్ స్పష్టం చేసింది.

నేటి నుండి కొత్త ధరలు ఇలా..

తాజా పెంపుతో పాల ధరలు ఈ విధంగా ఉండనున్నాయి:

* ఫుల్ క్రీమ్ మిల్క్: లీటరు రూ.72 (గతంలో రూ.70)

* టోన్డ్ మిల్క్: లీటరు రూ.60 (గతంలో రూ.58)

* డబుల్ టోన్డ్ మిల్క్: లీటరు రూ.54 (గతంలో రూ.52)

* ఆవు పాలు : లీటరు రూ.62 (గతంలో రూ.60)

* బల్క్ వెండెడ్ మిల్క్ (టోకెన్ పాలు): లీటరు రూ.58 (గతంలో రూ.56)

వ్యాపార సామ్రాజ్యం.. భారీ అమ్మకాలు!

మదర్ డెయిరీ ఒక్క ఢిల్లీ-ఎన్‌సీఆర్ ప్రాంతంలోనే ప్రతిరోజూ 35 లక్షల లీటర్ల పాలను విక్రయిస్తుంది. గత ఆర్థిక సంవత్సరంలో ఈ సంస్థ ఏకంగా రూ.20,300 కోట్ల టర్నోవర్‌ను సాధించి 17 శాతం వృద్ధిని నమోదు చేసింది. పాలతో పాటు వంట నూనెలు, ఇతర డెయిరీ ఉత్పత్తుల అమ్మకాలు కూడా భారీగా పెరిగాయి. అయితే, ప్రతిరోజూ వాడే పాలు ఇలా ఖరీదవ్వడం వల్ల సామాన్య ప్రజలు, ముఖ్యంగా పిల్లలు ఉన్న కుటుంబాలపై ఆర్థిక భారం పడనుంది.