Palm Oil : అంతర్జాతీయ మార్కెట్లో రికార్డు స్థాయికి పామ్ ఆయిల్ ధరలు.. జూన్‌లోనూ సామాన్యులకు తప్పని భారం

Palm Oil : భారతీయ వంటగదిపై మళ్లీ వంట నూనెల ధరల ప్రభావం పడబోతోంది. అంతర్జాతీయ మార్కెట్లో వంట నూనెల ధరల్లో ఒక్కసారిగా భారీ కదలికలు మొదలయ్యాయి. బయోఫ్యూయల్‎కు ప్రపంచవ్యాప్తంగా డిమాండ్ విపరీతంగా పెరగడం, అంతర్జాతీయ మార్కెట్ సెంటిమెంట్స్ బలంగా ఉండటంతో పామాయిల్ ధరలు గత రెండు వారాల గరిష్ట స్థాయికి చేరుకున్నాయి. మలేషియా కరెన్సీ మార్కెట్లో పామ్ ఆయిల్ ధర టన్నుకు 4,600 రింగిట్లను దాటేసింది. రాబోయే జూన్ నెలలో కూడా ఈ ధరల్లో పెద్దగా తగ్గుదల ఉండకపోవచ్చని, రేట్లు ఇలాగే స్థిరంగా మునిగిపోయే అవకాశం ఉందని కమొడిటీ మార్కెట్ నిపుణులు అంచనా వేస్తున్నారు.

జూన్ నెలలోనూ ధరలు తగ్గడం కష్టమే

ప్రపంచవ్యాప్తంగా వంట నూనెల సరఫరాలో మలేషియా, ఇండోనేషియా దేశాలదే కీలక పాత్ర. గత ఏప్రిల్ నెలలో పామాయిల్ ధరలు ఏకంగా టన్నుకు 4,800 రింగిట్ల మార్కును కూడా దాటేశాయి. ఆ తర్వాత ఇన్వెస్టర్లు లాభాల స్వీకరణకు మొగ్గు చూపడంతో ధరలు కాస్త కిందకు దిగివచ్చాయి. అయితే, దిగువ స్థాయిల వద్ద కొనుగోలుదారులు మళ్లీ భారీగా ఆర్డర్లు ఇవ్వడం, ఇదే సమయంలో సోయాబీన్ ఆయిల్ రేట్లు కూడా పెరగడంతో పామ్ ఆయిల్‌కు మార్కెట్లో మళ్లీ డిమాండ్ పెరిగింది.

మలేషియా పామాయిల్ అలయన్స్, మలేషియా పామ్ ఆయిల్ బోర్డ్ తాజా అంచనాల ప్రకారం.. జూన్ నెలలో క్రూడ్ పామాయిల్ సగటు ధర టన్నుకు RM 4,400 (మలేషియన్ రింగిట్లు) వద్ద స్థిరంగా కొనసాగవచ్చు. సాధారణంగా మార్చి నుంచి అక్టోబర్ మధ్య కాలం పామాయిల్ ఉత్పత్తికి చాలా అనుకూలమైన సమయం. ఈ సీజన్ లో పొడి వాతావరణం ఉండటం వల్ల తోటల్లో కోతలు సులువవుతాయి. అలాగే పండ్ల నుంచి నూనె తీసే సామర్థ్యం కూడా పెరుగుతుంది. ఈ కారణం చేతనే ఏప్రిల్‌లో మలేషియా పామాయిల్ స్టాక్ స్వల్పంగా పెరిగి 2.31 మిలియన్ టన్నులుగా నమోదైంది.

సోయాబీన్ ఆయిల్ భారమే పామాయిల్‌కు వరమైంది

పామ్ ఆయిల్ ధరలు ఈ రేంజ్‌లో పెరగడానికి అమెరికా, ఐరోపా దేశాల బయోఫ్యూయల్ విధానాలే ముఖ్య కారణం. అమెరికాలోని బయోఫ్యూయల్ పరిశ్రమల నుంచి సోయాబీన్ ఆయిల్‌కు భారీగా డిమాండ్ ఏర్పడింది. దీనివల్ల యూరప్ మార్కెట్లో సోయాబీన్ ఆయిల్ ధరలు మే మధ్య నాటికి నవంబర్ 2022 తర్వాత అత్యంత గరిష్ట స్థాయికి చేరాయి. ప్రపంచంలోనే అత్యంత ఖరీదైన ప్రధాన వెజిటెబుల్ ఆయిల్‌గా సోయాబీన్ ఆయిల్ నిలిచింది.

మార్కెట్లో ఇతర నూనెలతో పోలిస్తే సోయాబీన్ ఆయిల్ ప్రీమియం ధరల వివరాలు:

* రేప్‌సీడ్ (ఆవనూనె) ఆయిల్‌తో పోలిస్తే సోయాబీన్ ఆయిల్ టన్నుకు US$145 ఎక్కువ.

* పామాయిల్‌తో పోలిస్తే సోయాబీన్ ఆయిల్ టన్నుకు US$110 ఖరీదైనది.

* సన్‌ఫ్లవర్ ఆయిల్‌తో పోలిస్తే దీని ధర టన్నుకు US$45 ఎక్కువగా ఉంది.

ఈ విధంగా సోయాబీన్ ఆయిల్ ధరలు ఆకాశాన్ని తాకడంతో, అంతర్జాతీయ మార్కెట్లో పామాయిల్ చాలా తక్కువ ధరకే (ప్రైస్ కాంపిటేటివ్) లభిస్తున్నట్లయింది. దీంతో ప్రపంచవ్యాప్తంగా ఉన్న బయ్యర్లు పామాయిల్ కొనుగోలు వైపే మొగ్గు చూపుతున్నారు.

భారతీయ ఇంపోర్టర్లకు కాస్త ఊరట.. ఎందుకంటే?

మన దేశీయ మార్కెట్, భారతీయ వినియోగదారుల కోణం నుంచిచూస్తే, ఇప్పటికీ పామాయిల్ మిగిలిన నూనెల కంటే చౌకైన ప్రత్యామ్నాయంగా నిలుస్తోంది. అర్జెంటీనా సోయాబీన్ ఆయిల్‌తో పోలిస్తే మలేషియా పామ్ ఒలిన్ ధరలు తక్కువగా ఉండటంతో భారతీయ దిగుమతిదారులు పామాయిల్‌ను కొనుగోలు చేయడానికే మొదటి ప్రాధాన్యత ఇస్తున్నారు.

తాజా గణాంకాల ప్రకారం.. 2026 సంవత్సరం మొదటి నాలుగు నెలల్లో మలేషియా నుంచి జరిగిన మొత్తం పామాయిల్ ఎగుమతులు 25.5 శాతం పెరిగి 5.38 మిలియన్ టన్నులకు చేరుకున్నాయి. 2019 తర్వాత ఈ స్థాయిలో ఎగుమతులు జరగడం ఇదే తొలిసారి. అయితే, మార్చితో పోలిస్తే ఏప్రిల్ నెలలో ఎగుమతులు 14.3 శాతం తగ్గి 1.3 మిలియన్ టన్నులుగా నమోదైనప్పటికీ.. ఈ మొత్తం ఆ నెలలో మలేషియా సాధించిన మొత్తం ఉత్పత్తిలో 80 శాతానికి సమానం. దీన్ని బట్టి అంతర్జాతీయంగా పామాయిల్‌కు ఎంతటి బలమైన డిమాండ్ ఉందో అర్థం చేసుకోవచ్చు.