Personal Finance: ఎంత సంపాదించినా డబ్బు మిగలడం లేదా? ఈ సూత్రాలు పాటిస్తే మీ రేంజ్ మారిపోతుంది

Personal Finance: ఎక్కువ జీతం సంపాదించినంత మాత్రాన ఆర్థికంగా స్థిరపడినట్లు కాదు. నేటి ద్రవ్యోల్బణ కాలంలో కేవలం పొదుపు మాత్రమే మిమ్మల్ని శ్రీమంతులను చేయలేదు. సంపాదించిన ప్రతి రూపాయిని సరైన మార్గంలో మళ్లించడం, అత్యవసర నిధిని ఏర్పాటు చేసుకోవడం, చక్రవడ్డీ లాభాలను అందుకోవడం ద్వారానే సురక్షితమైన భవిష్యత్తును నిర్మించుకోవచ్చని ఆర్థిక నిపుణులు స్పష్టం చేస్తున్నారు.

అత్యవసర నిధి, ఇన్సూరెన్స్ రక్షణ చత్రం

రూపాయి పెట్టుబడి పెట్టేముందు ప్రతి ఒక్కరూ విధిగా అత్యవసర నిధి (ఎమర్జెన్సీ ఫండ్) ఏర్పాటు చేసుకోవాలి. ఉద్యోగం పోయినా, హఠాత్తుగా అనారోగ్యం పాలైనా కనీసం 6 నుంచి 12 నెలల నిత్యవసర ఖర్చులకు సరిపడా డబ్బును సిద్ధంగా ఉంచుకోవాలి. ఇది మీ ఆపద సమయంలో అప్పుల పాలు కాకుండా కాపాడుతుంది. కుటుంబం మీ సంపాదనపై ఆధారపడి ఉంటే తగినంత టర్మ్ ఇన్సూరెన్స్ తీసుకోవడం అత్యంత ముఖ్యం. పెరిగిన ఆసుపత్రి ఖర్చుల నుంచి జీవితాంతం దాచుకున్న పొదుపును కాపాడుకోవడానికి హెల్త్ ఇన్సూరెన్స్ కవరేజ్ కూడా అంతే అవసరం.

జీతం పెరిగినప్పుడు పెట్టుబడి పెంచండి

చాలామంది ఆదాయం పెరగ్గానే విలాసవంతమైన జీవనశైలికి అలవాటుపడి ఖర్చులను పెంచేస్తుంటారు. దీనిని లైఫ్‌స్టైల్ ఇన్‌ఫ్లేషన్ అంటారు. పెరిగిన జీతాన్ని ఖర్చు చేయడం కాకుండా, ఆ మేరకు పెట్టుబడి మొత్తాన్ని పెంచడం అలవాటు చేసుకోవాలి. చిన్న వయస్సు నుంచే పెట్టుబడులు ప్రారంభించడం వల్ల 'కాంపౌండింగ్' ప్రయోజనం లభించి దీర్ఘకాలంలో భారీ నిధి సమకూరుతుంది. ఆదాయం తక్కువగా ఉన్నప్పటికీ చిన్న మొత్తాల నుంచి ప్రణాళికాబద్ధంగా మదుపు చేయడం ప్రారంభించవచ్చు.

అప్పుల ఊబిలో కూరుకుపోవద్దు

అధిక వడ్డీ వసూలు చేసే పర్సనల్ లోన్లు, క్రెడిట్ కార్డ్ బకాయిలు ఆర్థిక పురోగతికి పెద్ద అడ్డంకులు. క్రెడిట్ కార్డ్ బిల్లులను గడువులోగా చెల్లించకపోతే వడ్డీ చక్రవ్యూహంలో చిక్కుకునే ప్రమాదం ఉంది. అవసరం లేని వస్తువుల కొనుగోలుకు అప్పులు చేయడం పూర్తిగా ఆపేయాలి. క్రెడిట్ కార్డ్ వినియోగాన్ని అదుపులో ఉంచుకుంటూ ఆర్థిక క్రమశిక్షణ పాటించడం వల్ల ప్రతి నెలా భారీగా డబ్బు ఆదా అవుతుంది.

డబ్బు మొత్తాన్ని ఒకే చోట పెట్టకండి

పెట్టుబడి పెట్టే సమయంలో రిస్క్ తగ్గించుకోవడానికి డైవర్సిఫికేషన్ వ్యూహాన్ని అనుసరించాలి. సొంత డబ్బు మొత్తాన్ని ఒకే పథకంలో లేదా ఒకే షేరులో పెట్టడం చాలా ప్రమాదకరం. మీ వయస్సు, ఆర్థిక లక్ష్యాలు, రిస్క్ తీసుకునే సామర్థ్యాన్ని బట్టి ఈక్విటీ, డేట్, బంగారం వంటి వివిధ మార్గాల్లో నిధులను మళ్లించాలి. ఏటా కనీసం ఒకసారైనా మీ ఆర్థిక ప్రణాళికను సమీక్షించుకుంటూ, మారుతున్న లక్ష్యాలకు అనుగుణంగా మార్పులు చేస్తుండాలి. ఆర్థిక స్వాతంత్ర్యం అనేది ఒక్క రోజులో వచ్చేది కాదు. సరైన నిధి నిర్వహణ, ఇన్సూరెన్స్ రక్షణ, క్రమబద్ధమైన పెట్టుబడులు మాత్రమే మిమ్మల్ని దీర్ఘకాలంలో ధనవంతుడిగా మార్చగలవు.