Post Office : లక్ష పెడితే రూ. 1.45 లక్షలు.. పోస్ట్ ఆఫీస్ టైమ్ డిపాజిట్ అదిరిపోయే లాభం

Post Office : డబ్బు పొదుపు చేయాలనుకునే వారికి, రిస్క్ లేకుండా మంచి లాభాలు రావాలని కోరుకునే వారికి పోస్ట్ ఆఫీస్ పథకాలు ఎప్పుడూ దివ్యౌషధమే. ప్రస్తుతం మార్కెట్లో అనేక పెట్టుబడి మార్గాలు ఉన్నప్పటికీ, ప్రభుత్వ గ్యారెంటీ ఉండటంతో సామాన్యులు పోస్ట్ ఆఫీస్‌నే ఎక్కువగా నమ్ముతారు. ఇప్పుడు పోస్ట్ ఆఫీస్ తన కస్టమర్లకు అందిస్తున్న వడ్డీ రేట్లు బ్యాంకుల ఫిక్స్‌డ్ డిపాజిట్ల కంటే కూడా ఆకర్షణీయంగా ఉండటం విశేషం. ముఖ్యంగా టైమ్ డిపాజిట్ స్కీమ్ ద్వారా ఇన్వెస్టర్లు అదిరిపోయే లాభాలను పొందుతున్నారు.

ఈ టైమ్ డిపాజిట్ స్కీమ్ అనేది బ్యాంకుల్లో మనం చేసే ఎఫ్‌డీ లాంటిదే. ఒక నిర్ణీత కాలానికి డబ్బును డిపాజిట్ చేస్తే, గడువు ముగిశాక అసలుతో పాటు వడ్డీని కలిపి ఇస్తారు. పోస్ట్ ఆఫీస్‌లో మీరు 1 ఏడాది, 2 ఏళ్లు, 3 ఏళ్లు లేదా 5 ఏళ్ల కాలపరిమితితో ఈ ఖాతాను ప్రారంభించవచ్చు. కేంద్ర ప్రభుత్వం నేరుగా ఈ పథకాలను పర్యవేక్షిస్తుంది కాబట్టి, మీ రూపాయికి పూర్తి భద్రత ఉంటుంది. ప్రస్తుతం ఉన్న వడ్డీ రేట్లను పరిశీలిస్తే.. ఏడాది డిపాజిట్‌పై 6.9%, రెండేళ్లకు 7.0%, మూడేళ్లకు 7.1%, ఐదేళ్ల డిపాజిట్‌పై గరిష్టంగా 7.5% వడ్డీ లభిస్తోంది.

ఒకవేళ మీరు ఐదేళ్ల కాలపరిమితి గల టైమ్ డిపాజిట్ స్కీమ్‌లో రూ.1,00,000 ఇన్వెస్ట్ చేస్తే, మెచ్యూరిటీ సమయానికి మీ చేతికి రూ.1,44,995 వస్తాయి. అంటే కేవలం వడ్డీ రూపంలోనే మీరు రూ.44,995 లాభం పొందుతారు. నేడు దేశంలోని అగ్రశ్రేణి బ్యాంకులు కూడా ఐదేళ్ల కాలపరిమితిపై 7.5 శాతం వడ్డీని ఇవ్వడానికి వెనకాడుతున్నాయి. ఈ నేపథ్యంలో చిన్న తరహా మదుపరులకు ఇది ఒక గొప్ప అవకాశం. పైగా ఐదేళ్ల టైమ్ డిపాజిట్‌పై సెక్షన్ 80C కింద పన్ను మినహాయింపు ప్రయోజనం కూడా లభిస్తుంది.

అయితే బ్యాంకులకు పోస్ట్ ఆఫీస్ పథకాలకు మధ్య ఒక చిన్న వ్యత్యాసం ఉంది. బ్యాంకుల్లో సీనియర్ సిటిజన్లకు సాధారణ కస్టమర్ల కంటే 0.50% అదనపు వడ్డీ ఇస్తారు, కానీ పోస్ట్ ఆఫీస్ టైమ్ డిపాజిట్‌లో అందరికీ ఒకే రకమైన వడ్డీ రేట్లు వర్తిస్తాయి. అయినప్పటికీ, మార్కెట్ ఒడిదుడుకులతో సంబంధం లేకుండా స్థిరమైన రాబడిని కోరుకునే వారికి, రిటైర్మెంట్ ఫండ్ దాచుకోవాలనుకునే వారికి పోస్ట్ ఆఫీస్ ఐదేళ్ల టీడీ ప్లాన్ బెస్ట్ ఆప్షన్ అని ఆర్థిక నిపుణులు చెబుతున్నారు.