RBI : మధ్యప్రాచ్య యుద్ధ సెగలు.. చమురు ధరల గుబులు.. ఆర్బీఐ పాలసీపై సర్వత్రా ఆసక్తి

RBI : మధ్యతరగతి ప్రజలకు, హోమ్ లోన్ ఇఎంఐలు కట్టే వారికి భారత రిజర్వ్ బ్యాంక్ నుంచి కీలక సమాచారం అందనుంది. ఏప్రిల్ 8న జరగబోయే ఆర్బీఐ మానిటరీ పాలసీ కమిటీ భేటీలో వడ్డీ రేట్లపై కీలక నిర్ణయం తీసుకోనున్నారు. తాజా అంచనాల ప్రకారం, ప్రస్తుతానికి రెపో రేటులో ఎలాంటి మార్పులు ఉండకపోవచ్చని తెలుస్తోంది. అంటే మీ లోన్ ఇఎంఐలు పెరగవు, అలాగని తగ్గవు కూడా. రాయిటర్స్ జరిపిన సర్వేలో పాల్గొన్న మెజారిటీ ఆర్థిక నిపుణులు ఇదే అభిప్రాయాన్ని వ్యక్తం చేశారు. ప్రస్తుతం భారత్‌లో రెపో రేటు 5.25% వద్ద కొనసాగుతోంది. ఏప్రిల్ 8న జరగనున్న సమావేశంలోనూ దీనిని అలాగే ఉంచే అవకాశం ఉందని రాయిటర్స్ సర్వేలో 71 మంది నిపుణుల్లో 69 మంది అభిప్రాయపడ్డారు. దేశంలో ద్రవ్యోల్బణం గత ఏడాది కాలంగా ఆర్బీఐ నిర్దేశించిన 4% లక్ష్యం కంటే తక్కువగానే ఉండటం కేంద్ర బ్యాంకుకు కలిసొచ్చే అంశం. మరోవైపు దేశ ఆర్థిక వృద్ధి రేటు కూడా బలంగా ఉండటంతో, వడ్డీ రేట్లను పెంచాల్సిన అవసరం కానీ, తగ్గించాల్సిన అత్యవసరం కానీ ఆర్బీఐకి లేదని నిపుణులు విశ్లేషిస్తున్నారు.

మధ్యప్రాచ్య ఉద్రిక్తతల నీడ.. ఆయిల్ భయం

అయితే, అంతర్జాతీయ పరిస్థితులు ఆర్బీఐని కాస్త కలవరపెడుతున్నాయి. అమెరికా-ఇజ్రాయెల్, ఇరాన్ మధ్య పెరుగుతున్న యుద్ధ వాతావరణం వల్ల అంతర్జాతీయ చమురు మార్కెట్ అతలాకుతలం అవుతోంది. భారత్ తన చమురు అవసరాల కోసం దిగుమతులపైనే ఆధారపడుతోంది కాబట్టి, ఆయిల్ రేట్లు పెరిగితే ద్రవ్యోల్బణం మళ్ళీ అదుపు తప్పుతుందనే భయం ఉంది. హెచ్‌డిఎఫ్‌సి బ్యాంక్ ఎకనామిస్ట్ సాక్షి గుప్తా అభిప్రాయం ప్రకారం, చమురు ధరల ప్రభావం ధరలపై పడకుండా జాగ్రత్త పడాల్సి ఉంటుంది. అందుకే వడ్డీ రేట్ల తగ్గింపుపై ఇప్పుడే ఆలోచించడం తొందరపాటే అవుతుంది.

నిపుణుల హెచ్చరిక.. అప్రమత్తంగా ఉండాలి

ఏఎన్‌జడ్, ఐసీఐసీఐ సెక్యూరిటీస్ నిపుణులు ఆర్బీఐ అప్రమత్తంగా ఉండాలని సూచిస్తున్నారు. ప్రస్తుతానికి ద్రవ్యోల్బణం సమతుల్యంగా ఉన్నప్పటికీ, గ్లోబల్ మార్కెట్ లో ఏ చిన్న మార్పు వచ్చినా అది భారత ఆర్థిక వ్యవస్థపై ప్రభావం చూపుతుంది. 2026-27 ఆర్థిక సంవత్సరంలో భారత ఆర్థిక వ్యవస్థకు నెమ్మదించిన వృద్ధి , పెరుగుతున్న ధరలు అతిపెద్ద సవాల్‌గా మారే అవకాశం ఉందని సర్వే హెచ్చరించింది. ఈ నేపథ్యంలో ఆర్బీఐ తన వడ్డీ రేట్ల నిర్ణయంలో వెయిట్ అండ్ వాచ్ పద్ధతినే అనుసరించనుంది.

భవిష్యత్తు అంచనాలు.. ఇఎంఐలు ఎప్పుడు తగ్గుతాయి?

వచ్చే రెండు ఆర్థిక సంవత్సరాల్లో ద్రవ్యోల్బణం సగటున 4.3% వద్ద, ఆర్థిక వృద్ధి 7% వద్ద ఉండొచ్చని అంచనా. అయితే, సామాన్యుడు ఆశించే వడ్డీ రేట్ల తగ్గింపు మాత్రం 2027 మధ్య నాటి వరకు ఉండకపోవచ్చని నిపుణులు కుండబద్దలు కొడుతున్నారు. అంటే మీ హోమ్ లోన్ లేదా కార్ లోన్ వడ్డీ రేట్లు తగ్గాలంటే మరికొంత కాలం వేచి చూడక తప్పదు. ఆర్బీఐ గవర్నర్ శక్తికాంత దాస్ ఏప్రిల్ 8న వెల్లడించబోయే నిర్ణయంపైనే ఇప్పుడు మార్కెట్ వర్గాలన్నీ కన్నేశాయి.