Rupee Fall: రూపాయి చారిత్రక పతనం.. అయినా ఆర్థిక వ్యవస్థకు లాభమే.. ఎలా అంటే ?

Rupee Fall: గత కొన్ని రోజులుగా డాలర్‌తో పోలిస్తే రూపాయి మారకం విలువ చారిత్రక కనిష్ట స్థాయికి పడిపోయింది. రూపాయి మొదటిసారిగా ఒక డాలర్‌కు రూ.90 మార్కును దాటింది. మార్కెట్ నిపుణుల అంచనా ప్రకారం.. రాబోయే రోజుల్లో ఇది రూ.91 స్థాయిని కూడా దాటవచ్చు. రూపాయి విలువ పడిపోవడం వల్ల నిత్యం ఉపయోగించే అనేక వస్తువుల ధరలు పెరిగి సామాన్యుడి జేబుపై భారం పడుతుంది. అయితే ఈ పతనం వల్ల భారత ఆర్థిక వ్యవస్థకు కొన్ని అనుకోని ప్రయోజనాలు కూడా ఉన్నాయని ఆర్థిక నిపుణులు చెబుతున్నారు.

రూపాయి విలువ తగ్గడం వల్ల భారతీయ ఎగుమతులు గణనీయంగా పెరుగుతాయి. విదేశీ మార్కెట్‌లో భారతీయ వస్తువుల ధరలు తగ్గి, ఇతర దేశాలతో పోటీ పడేందుకు సులభమవుతుంది. ధరలు తగ్గడం వల్ల భారతీయ వస్తువులకు డిమాండ్ పెరిగే అవకాశం ఉంది. భారతీయ ఐటీ రంగంలోని చాలా కంపెనీల వ్యాపారం డాలర్లలో జరుగుతుంది. కాబట్టి, డాలర్‌కు ఎక్కువ రూపాయిలు లభించడం వల్ల ఐటీ కంపెనీల లాభాలు పెరుగుతాయి. ఈ విధంగా ఐటీ రంగం ద్వారా దేశ ఆర్థిక వ్యవస్థకు మరింత బలం చేకూరుతుంది.

రూపాయి విలువ తగ్గితే, విదేశీ వస్తువులు (ముఖ్యంగా చైనా నుంచి దిగుమతి అయ్యే చౌక వస్తువులు) ఖరీదవుతాయి. దీనివల్ల వాటి దిగుమతి తగ్గి, దేశీయ పరిశ్రమకు మద్దతు లభిస్తుంది. రూపాయి బలహీనపడటం వల్ల విదేశాలలో నివసిస్తున్న భారతీయులకు తమ సొంత దేశానికి డబ్బు పంపడం మరింత లాభదాయకం అవుతుంది.

ఎందుకంటే ఒక డాలర్‌కు వారికి గతంలో కంటే ఎక్కువ రూపాయిలు లభిస్తాయి. దీనివల్ల దేశంలోకి రెమిటెన్స్ (NRIలు పంపే డబ్బు) ప్రవాహం మరింత పెరుగుతుంది. ఈ ఆర్థిక సంవత్సరం (FY 2025) లో భారతదేశానికి రెమిటెన్స్ ద్వారా $135.5 బిలియన్లు వచ్చాయి. ఇది గత సంవత్సరం ($118.7 బిలియన్లు) కంటే ఎక్కువ. దేశంలోకి ఇలా డబ్బు భారీగా రావడం వల్ల, వ్యాపార లోటు తగ్గడానికి, దేశ ఆర్థిక వ్యవస్థకు ఊతమివ్వడానికి సహాయపడుతుంది.