No Salary : ఉద్యోగులకు అలర్ట్.. మే 1న మీ ఖాతాల్లోకి జీతం రాదు.. ఎందుకో తెలుసా?

No Salary : ఉద్యోగులకు ఇది కాస్త చేదు వార్తే. సాధారణంగా ప్రతి నెల ఒకటో తేదీ రాగానే మొబైల్‌కు వచ్చే శాలరీ క్రెడిటెడ్ మెసేజ్ కోసం అందరూ ఆత్రుతగా ఎదురుచూస్తుంటారు. కానీ మే ఒకటో తేదీన మాత్రం ఆ మెసేజ్ రాకపోవచ్చు. దీనికి కారణం మే డే, బుద్ధ పూర్ణిమ సందర్భంగా దేశవ్యాప్తంగా బ్యాంకులకు సెలవు ఉండటమే. దీనివల్ల జీతాల చెల్లింపు ప్రక్రియలో జాప్యం జరిగి, మీ అకౌంట్‌లో డబ్బులు పడటానికి మరో ఒకటి రెండు రోజులు సమయం పట్టే అవకాశం ఉంది.

జీతం ఎందుకు ఆలస్యం అవుతోంది?

ప్రతి ఏటా మే 1వ తేదీని అంతర్జాతీయ కార్మిక దినోత్సవంగా (మే డే) జరుపుకుంటాం. దీనికి తోడు ఈసారి బుద్ధ పూర్ణిమ కూడా అదే రోజు రావడంతో దేశంలోని అన్ని రాష్ట్రాల్లో ప్రభుత్వ, ప్రైవేట్ బ్యాంకులకు సెలవు ప్రకటించారు. బ్యాంకులు మూతపడటం వల్ల జీతాల ప్రాసెసింగ్, నెఫ్ట్, ఆర్టీజీఎస్ వంటి లావాదేవీలకు ఆటంకం కలుగుతుంది. దీనివల్ల ఒకటో తేదీన రావాల్సిన జీతం కాస్త ఆలస్యమై, తదుపరి పనిదినం అంటే మే 2 లేదా 3వ తేదీన మీ అకౌంట్‌లోకి వచ్చే అవకాశం ఉంది.

ప్రైవేట్ కంపెనీల పరిస్థితి ఏంటి?

కొన్ని ప్రైవేట్ సంస్థలు తమ ఉద్యోగులు ఇబ్బంది పడకూడదని భావించి, సెలవు కంటే ముందే అంటే ఏప్రిల్ 29 లేదా 30వ తేదీ నాడే జీతాలను జమ చేస్తాయి. అయితే, చాలా కంపెనీలు నెల వారీ షెడ్యూల్ ప్రకారమే శాలరీ ప్రాసెస్ చేస్తాయి. అటువంటి సందర్భాల్లో బ్యాంక్ సెలవు కారణంగా ప్రాసెసింగ్ బ్యాచ్‌లు నిలిచిపోయి, జీతం క్రెడిట్ అవ్వడంలో జాప్యం జరుగుతుంది. కాబట్టి, మీ కంపెనీ పాలసీని బట్టి మే 1న జీతం వస్తుందా లేదా అనేది ఆధారపడి ఉంటుంది.

డిజిటల్ బ్యాంకింగ్ పని చేసినా..

యూపీఐ, మొబైల్ బ్యాంకింగ్ వంటి సేవలు 24 గంటలూ అందుబాటులో ఉన్నప్పటికీ, జీతాల చెల్లింపులు అనేవి బల్క్ ప్రాసెసింగ్ పద్ధతిలో జరుగుతాయి. ఇవి బ్యాంక్ సర్వర్లు, పనిదినాలపై ఆధారపడి ఉంటాయి. కాబట్టి ఆటోమేటిక్ శాలరీ సిస్టమ్ ఉన్నా సరే, సెలవు రోజున ట్రాన్సాక్షన్లు పూర్తి కావడం కష్టమే. అందుకే ఈసారి మీ ఈఎంఐలు లేదా ఇతర ఇంటి అద్దెలు కట్టే విషయంలో ముందుగానే జాగ్రత్త పడటం మంచిది.

మే నెలలో బ్యాంక్ సెలవుల చిట్టా:

మే నెలలో కేవలం ఒకటో తేదీనే కాకుండా మరికొన్ని రోజులు కూడా బ్యాంకులకు సెలవు ఉంది. మొత్తం మీద మే నెలలో 13 రోజులు బ్యాంకులు మూతపడనున్నాయి.

* మే 1: మే డే / బుద్ధ పూర్ణిమ

* ఆదివారాలు: మే 3, 10, 17, 24, 31

* శనివారాలు: మే 9 (రెండో శనివారం), మే 23 (నాలుగో శనివారం)

* ఇతర సెలవులు: రవీంద్రనాథ్ ఠాగూర్ జయంతి (మే 9), సిక్కిం రాష్ట్ర అవతరణ దినోత్సవం (మే 16), కాజీ నజ్రుల్ ఇస్లాం పుట్టినరోజు (మే 26), ఈద్-ఉల్-అజ్హా (మే 27/28 - కొన్ని రాష్ట్రాల్లో). కాబట్టి బ్యాంకు పనులు ఉంటే ఈ సెలవులను దృష్టిలో పెట్టుకుని ప్లాన్ చేసుకోవాలి.