FD Rates : వృద్ధులకు అదిరిపోయే గుడ్ న్యూస్.. ఎఫ్‌డీలపై 8 శాతం వడ్డీ.. ఏ బ్యాంకులో ఎంత వస్తుందంటే ?

FD Rates : రిటైర్మెంట్ తర్వాత తమ కష్టార్జితం భద్రంగా ఉండాలని, అదే సమయంలో నెలకు లేదా ఏడాదికి మంచి వడ్డీ రావాలని ప్రతి సీనియర్ సిటిజన్ కోరుకుంటారు. స్టాక్ మార్కెట్, మ్యూచువల్ ఫండ్స్ వంటి వాటిలో రిస్క్ ఉంటుంది కాబట్టి, మన దేశంలో వృద్ధులకు ఇప్పటికీ ఫిక్స్‌డ్ డిపాజిట్ అత్యంత నమ్మకమైన మార్గం. ఏప్రిల్ 2026 నాటికి బ్యాంకుల్లో సీనియర్ సిటిజన్ల కోసం అదిరిపోయే వడ్డీ రేట్లు అందుబాటులో ఉన్నాయి. కొన్ని బ్యాంకులు ఏకంగా 8 శాతం వరకు వడ్డీని ఆఫర్ చేస్తున్నాయి.

పేరుకు ఇవి స్మాల్ ఫైనాన్స్ బ్యాంకులు అయినప్పటికీ, వడ్డీ ఇచ్చే విషయంలో పెద్ద బ్యాంకులను కూడా వెనక్కి నెట్టేశాయి. మీరు మీ పెట్టుబడిపై అత్యధిక లాభం పొందాలనుకుంటే ఈ బ్యాంకులు బెస్ట్ ఆప్షన్. జనా స్మాల్ ఫైనాన్స్ బ్యాంక్, ఉత్కర్ష్ స్మాల్ ఫైనాన్స్ బ్యాంక్ తమ సీనియర్ సిటిజన్ కస్టమర్లకు మూడు ఏళ్ల ఎఫ్‌డీలపై ఏకంగా 8 శాతం వడ్డీని ఇస్తున్నాయి. వీటి తర్వాత ఉజ్జీవన్ స్మాల్ ఫైనాన్స్ బ్యాంక్ 7.7 శాతం, ఏయూ స్మాల్ ఫైనాన్స్ బ్యాంక్ 7.6 శాతం వడ్డీని ఆఫర్ చేస్తున్నాయి. అలాగే ఈక్విటాస్, స్లైస్ స్మాల్ ఫైనాన్స్ బ్యాంకులు 7.5 శాతం వడ్డీని అందిస్తున్నాయి.

ప్రైవేట్ బ్యాంకుల్లో పోటాపోటీ

ప్రముఖ ప్రైవేట్ బ్యాంకులు కూడా కస్టమర్లను ఆకర్షించడానికి వడ్డీ రేట్లను పెంచాయి. ముఖ్యంగా బంధన్ బ్యాంక్, యెస్ బ్యాంక్ మూడు ఏళ్ల ఎఫ్‌డీలపై వృద్ధులకు 7.75 శాతం భారీ వడ్డీని ఇస్తున్నాయి. ఆర్బీఎల్ బ్యాంక్ 7.7 శాతం, ఎస్‌బీఎం బ్యాంక్ ఇండియా 7.6 శాతం వడ్డీని అందిస్తున్నాయి. అయితే, దేశంలోనే అతిపెద్ద ప్రైవేట్ బ్యాంకులైన హెచ్‌డీఎఫ్‌సీ, ఐసీఐసీఐ, యాక్సిస్ బ్యాంకులు మాత్రం సుమారు 6.95 శాతం వడ్డీని మాత్రమే ఆఫర్ చేస్తున్నాయి. భారీ నెట్‌వర్క్ ఉన్న ఈ బ్యాంకులు చిన్న బ్యాంకుల కంటే కొంచెం తక్కువ వడ్డీ ఇస్తున్నప్పటికీ భద్రత పరంగా నమ్మకంగా ఉంటాయి.

ప్రభుత్వ బ్యాంకుల్లో నమ్మకమైన వడ్డీ

ఎన్ని ప్రైవేట్ బ్యాంకులు ఉన్నా, మెజారిటీ ప్రజలు ప్రభుత్వ బ్యాంకులనే నమ్ముతారు. భద్రతతో పాటు గౌరవప్రదమైన వడ్డీ కావాలనుకునే వారికి ఇవి మంచి ఛాయిస్. ప్రభుత్వ బ్యాంకుల జాబితాలో బ్యాంక్ ఆఫ్ ఇండియా అందరికంటే ముందుంది. ఇది సీనియర్ సిటిజన్లకు 3 ఏళ్ల ఎఫ్‌డీపై 7 శాతం వడ్డీని ఇస్తోంది. ఆ తర్వాత దేశంలోనే అతిపెద్ద బ్యాంక్ అయిన స్టేట్ బ్యాంక్ ఆఫ్ ఇండియా, పంజాబ్ నేషనల్ బ్యాంక్ 6.8 శాతం చొప్పున వడ్డీని అందిస్తున్నాయి. మిగిలిన ప్రభుత్వ బ్యాంకుల్లో వడ్డీ రేట్లు 5.75 శాతం నుండి 6.75 శాతం మధ్య ఉన్నాయి.

పెట్టుబడి పెట్టే ముందు గమనిక

సీనియర్ సిటిజన్లు ఎఫ్‌డీ చేసేటప్పుడు కేవలం వడ్డీ రేటునే కాకుండా, ఆ బ్యాంకు ట్రాక్ రికార్డ్ మరియు సేవల గురించి కూడా తెలుసుకోవాలి. సాధారణంగా ఎఫ్‌డీలపై వచ్చే వడ్డీపై పన్ను వర్తిస్తుంది, కాబట్టి పన్ను మినహాయింపు కోసం ఫామ్ 15H సమర్పించడం మర్చిపోవద్దు. ఏప్రిల్ 2026లో ఈ వడ్డీ రేట్లు ఇన్వెస్టర్లకు మంచి లాభాలను తెచ్చిపెట్టేలా ఉన్నాయి. మీ పొదుపు మొత్తాన్ని వివిధ బ్యాంకుల్లో విభజించి పెట్టుబడి పెట్టడం ద్వారా రిస్క్ తగ్గించుకోవచ్చు.