Festive Season Sales: స్మార్ట్‌ఫోన్‌, టీవీ కొనేవాళ్లకు షాక్‌.. ఉత్పత్తి 20 శాతం తగ్గింపు!
ఉత్పత్తి 20 శాతం తగ్గింపు!
Festive Season Sales: పండుగల సమయంలో కొత్త ఫోన్ కొనాలి.. ఇంటికి కొత్త టీవీ తీసుకెళ్లాలి అనుకున్నవాళ్లకు ఈసారి మార్కెట్‌ నుంచి ఊహించని సంకేతాలు వస్తున్నాయి. దసరా, దీపావళి అమ్మకాలు ఆశించిన స్థాయిలో లేకపోవడంతో మొబైల్‌ ఫోన్లు, టీవీలు తయారు చేసే సంస్థలు ఉత్పత్తిని తగ్గించేందుకు సిద్ధమవుతున్నాయి. దుకాణాల్లో అమ్ముడుపోని సరుకు పేరుకుపోవడం, విడిభాగాల ధరలు పెరగడం ఈ పరిస్థితికి ప్రధాన కారణాలుగా కనిపిస్తున్నాయి.
ఈ ఏడాది పండుగల సీజన్‌లో స్మార్ట్‌ఫోన్లు, టీవీల అమ్మకాలు గత ఏడాదితో పోలిస్తే సుమారు 25 శాతం తగ్గినట్లు పరిశ్రమ వర్గాల అంచనా. జనవరి నుంచి సెప్టెంబర్‌ వరకు ఈ రెండు విభాగాల్లో అమ్మకాల పరిమాణం పది శాతానికి పైగా పడిపోయింది. సాధారణంగా ఓణం నుంచి దీపావళి వరకు జరిగే అమ్మకాలు ఏడాది మొత్తం విక్రయాల్లో దాదాపు 30 శాతం వాటా కలిగి ఉంటాయి. ఇలాంటి కీలక సమయంలో కొనుగోళ్లు తగ్గడంతో దుకాణదారుల దగ్గర అమ్ముడుపోని సరుకు మిగిలిపోయింది. దీంతో కొత్త సరుకు తయారు చేయడం కంటే, ఇప్పటికే ఉన్న నిల్వలను తగ్గించుకోవడంపైనే కంపెనీలు దృష్టి పెడుతున్నాయి. వచ్చే రెండు మూడు నెలల్లో అనుకున్న దానికంటే 20 శాతం వరకు ఉత్పత్తి తగ్గించే అవకాశం ఉందని తెలుస్తుంది.
చిప్‌ ధరల మంట.. ఫోన్ల కొనుగోలుకు బ్రేక్‌
ఈ పరిస్థితికి ప్రధాన కారణం మెమరీ చిప్‌ల ధరలు భారీగా పెరగడమే. గత పది నెలల్లో వీటి ధరలు రెండు నుంచి మూడు రెట్లు పెరిగినట్లు పరిశ్రమ వర్గాలు చెబుతున్నాయి. కృత్రిమ మేధ ఆధారిత సేవల కోసం భారీ సమాచార కేంద్రాలు, సర్వర్ల నిర్మాణం పెరగడంతో మెమరీ చిప్‌లకు గిరాకీ ఎక్కువైంది. అందుకు తగ్గట్టుగా సరఫరా లేకపోవడంతో తయారీ ఖర్చులు పెరిగాయి. ఫలితంగా స్మార్ట్‌ఫోన్ల ధరలు సగటున 35 నుంచి 40 శాతం, టీవీల ధరలు 20 నుంచి 25 శాతం వరకు పెరిగినట్లు నివేదిక పేర్కొంది. ముఖ్యంగా తక్కువ ధర, మధ్యస్థ ధర విభాగాల్లో కొనుగోలు చేయాలనుకునే వినియోగదారులపై ఈ భారం ఎక్కువగా పడుతోంది. ధరలు పెరగడంతో పాత ఫోన్లనే మరికొంత కాలం వాడాలని చాలామంది భావిస్తున్నారు.
రూ.20 వేల లోపు ఫోన్లకు గట్టి దెబ్బ
స్మార్ట్‌ఫోన్‌ మార్కెట్‌లోనూ అమ్మకాల మందగమనం స్పష్టంగా కనిపిస్తోంది. కౌంటర్‌పాయింట్‌ రీసెర్చ్‌ అక్టోబర్‌ 22న విడుదల చేసిన నివేదిక ప్రకారం.. 2026 జూలై నుంచి సెప్టెంబర్‌ వరకు దేశంలో ఫోన్ల రవాణా గత ఏడాదితో పోలిస్తే 20 శాతం తగ్గింది. ముఖ్యంగా రూ.20 వేల లోపు ధర ఉన్న ఫోన్ల విభాగంలో రవాణా ఏకంగా 47 శాతం పడిపోయింది. పెరిగిన ధరలు, కొనుగోలు శక్తిపై ఒత్తిడి కారణంగా తక్కువ ధర ఫోన్లను కొనేవాళ్లు వెనకడుగు వేస్తున్నారని పరిశోధనా సంస్థ తెలిపింది.
టీవీల్లోనూ చిన్న తెరలకు కష్టకాలం
టెలివిజన్‌ తయారీ సంస్థల పరిస్థితి కూడా అంతంత మాత్రంగానే ఉంది. హయ్యర్‌ ఇండియా అధిపతి సతీష్‌ ఎన్‌ఎస్‌ తెలిపిన వివరాల ప్రకారం.. గత ఏడాది పండుగల సీజన్‌తో పోలిస్తే ఈసారి టీవీల అమ్మకాల పరిమాణం దాదాపు 15 శాతం తగ్గింది. 32 నుంచి 43 అంగుళాల టీవీల్లో ఉపయోగించే మెమరీ చిప్‌లతో కూడిన ప్రింటెడ్ సర్క్యూట్ బోర్డుల ధర ఈ ఏడాది 80 డాలర్లకు చేరింది. వచ్చే జనవరి లేదా ఫిబ్రవరి నాటికి ఇది 110 డాలర్లకు చేరవచ్చని సరఫరాదారులు అంచనా వేస్తున్నారు. సోనీ ఇండియా అధిపతి సునీల్‌ నయ్యర్‌ తెలిపిన వివరాల ప్రకారం.. 65 అంగుళాల కంటే పెద్ద తెరల విభాగంలో అమ్మకాలు మెరుగ్గా ఉన్నా, 55 అంగుళాలు, అంతకంటే చిన్న తెరల విభాగంలో ఒత్తిడి కొనసాగుతోంది.
కంపెనీల ప్లాన్‌ ఇదే
అమ్మకాలు తగ్గినప్పుడు కొత్తగా సరుకు తయారు చేస్తే గోదాముల్లో నిల్వలు మరింత పెరుగుతాయి. దుకాణదారుల దగ్గర ఇప్పటికే ఉన్న సరుకును విక్రయించేందుకు సమయం పడుతుంది. అందుకే తయారీ సంస్థలు ఉత్పత్తిని తగ్గించి, నిల్వలను నియంత్రించుకోవాలని చూస్తున్నాయి. జైనా గ్రూప్‌ అధిపతి ప్రదీప్‌ జైన్‌ అంచనా ప్రకారం.. స్మార్ట్‌ఫోన్ల ఉత్పత్తి దాదాపు 20 శాతం తగ్గవచ్చు. అయితే వచ్చే ఏడాది నుంచి పాత ఫోన్ల స్థానంలో కొత్తవి కొనాలనే ఆసక్తి పెరిగితే మార్కెట్‌ మళ్లీ పుంజుకునే అవకాశం ఉందని ఆయన భావిస్తున్నారు. మరోవైపు, కౌంటర్‌పాయింట్‌ అంచనాల ప్రకారం 2026లో దేశ స్మార్ట్‌ఫోన్‌ మార్కెట్‌ కూడా సుమారు 13 శాతం కుంచించుకుపోవచ్చు.