Sugar Price: సామాన్యుడికి చేదు వార్త.. ఏడాదిలోనే 30 శాతం పెరిగిన చక్కెర ధర
| పెరిగిన చక్కెర ధర
Sugar Price: ఉదయం తాగే టీ నుంచి ఇంట్లో చేసుకునే తీపి వంటకాల దాకా నిత్యం అవసరమయ్యే చక్కెర ఇప్పుడు సామాన్యుడికి చేదు అనుభవాన్ని మిగులుస్తోంది. మార్కెట్లో పంచదార ధరలు ఎక్కడా తగ్గే సూచనలు కనిపించడం లేదు. ధరలను అదుపులోకి తెచ్చేందుకు ప్రభుత్వం ఎన్ని రకాల ప్రయత్నాలు చేసినా, క్షేత్రస్థాయిలో మాత్రం సామాన్యుడికి ఎలాంటి ఊరట లభించడం లేదు. ప్రస్తుతం దేశంలోని పలు ప్రధాన నగరాల్లో చక్కెర ధర మరోసారి కిలో రూ.70 మార్కుకు దగ్గరగా చేరుకుని మధ్యతరగతి కుటుంబాల బడ్జెట్ను దెబ్బతీస్తోంది.
కోల్కతాలో రూ.70, ఢిల్లీలో రూ.64
దేశవ్యాప్తంగా ఉన్న మెట్రో నగరాల్లో చక్కెర ధరలు వినియోగదారులను తీవ్ర ఆందోళనకు గురిచేస్తున్నాయి. ముఖ్యంగా కోల్కతాలో చక్కెర ధర అత్యధికంగా కిలో రూ.70కి చేరుకుంది. దేశ రాజధాని ఢిల్లీలోనూ పరిస్థితి ఏమీ బాగోలేదు, అక్కడ కిలో రూ.64 చొప్పున విక్రయిస్తున్నారు. ఆర్థిక రాజధాని ముంబైతో పాటు జార్ఖండ్ రాజధాని రాంచీలోనూ ఒకేలా కిలో చక్కెర రూ.63 పలుకుతోంది. ఈ ప్రధాన నగరాలతో పోలిస్తే చెన్నైలో కాస్త తక్కువగా ఉన్నప్పటికీ, అక్కడ కూడా ధర రూ.60 వద్ద స్థిరంగా కొనసాగుతోంది.
ఏడాదిలోనే 30 శాతం పెరుగుదల
చక్కెర ధరలు ఒక్కసారిగా పెరిగినవి కావు, గత ఏడాది కాలంగా వీటి గ్రాఫ్ క్రమంగా పైకి ఎగబాకుతూనే ఉంది. గణాంకాలను పరిశీలిస్తే కేవలం ఒక్క సంవత్సరంలోనే చక్కెర ధరలు ఏకంగా 30 శాతం వరకు పెరిగాయి. ఇకనైనా ధరలు నిలకడగా ఉంటాయని ప్రజలు ఆశించినా నిరాశే ఎదురైంది. తాజాగా కేవలం గత నెల రోజుల వ్యవధిలోనే పంచదార ధరలు మరో 5 శాతం మేర పెరగడం గమనార్హం. వరుసగా పెరుగుతున్న ఈ ధరలతో సామాన్య కుటుంబాల నెలవారీ ఖర్చులు తడిసి మోపెడవుతున్నాయి.
కేంద్రం నిర్ణయాలు తీసుకున్నా ఫలితం శూన్యం
ధరల మంటను చల్లార్చేందుకు ప్రభుత్వం కీలక నిర్ణయాలు తీసుకుంటూనే ఉంది. మార్కెట్లో చక్కెర కొరత రాకుండా సరఫరాను పెంచేందుకు కేంద్రం రెండున్నర లక్షల టన్నుల చక్కెర దిగుమతి కోటాను మళ్లీ విడుదల చేసింది. దీనికి తోడు చక్కెర మిల్లులు తమ వద్ద ఉన్న కోటాలో 90 శాతం నిల్వలను ఈ నెలలోనే విక్రయించాలని స్పష్టమైన ఆదేశాలు జారీ చేసింది. మరోవైపు ఈ సీజన్లో చక్కెర మిల్లులు కూడా ముందుగానే వేగంగా ఉత్పత్తిని ప్రారంభించాయి. ఇన్ని చర్యలు తీసుకున్నప్పటికీ రిటైల్ మార్కెట్లో మాత్రం ధరలు కిందికి దిగడం లేదు.
ఇప్పట్లో తగ్గే ఛాన్స్ లేదా?
దేశీయంగా ప్రభుత్వం, మిల్లులు ఎన్ని ప్రయత్నాలు చేస్తున్నా ధరలు తగ్గకపోవడానికి అంతర్జాతీయ మార్కెట్ పరిస్థితులు ప్రధాన కారణంగా కనిపిస్తున్నాయి. ప్రస్తుతం ప్రపంచ మార్కెట్లోనూ చక్కెర ధరలు భారీగా పెరిగాయి. గ్లోబల్ మార్కెట్లో ఏర్పడే ఈ పెరుగుదల ప్రభావం నేరుగా మన దేశీయ ధరల ట్రెండ్పై పడుతోంది. ఒకవైపు ప్రభుత్వ కోటాలు, మిల్లుల ఉత్పత్తి వేగవంతం కావడం లాంటి సానుకూల అంశాలు ఉన్నా, అంతర్జాతీయ మార్కెట్ సెగ వల్ల ఇప్పట్లో చక్కెర ధరలు తగ్గే బలమైన సంకేతాలేవీ కనిపించడం లేదు. దీంతో సగటు వినియోగదారుడు చౌకగా చక్కెర కొనేందుకు మరికొంత కాలం వేచి చూడక తప్పదు.