Credit Cards : మీ ఫ్రెండ్స్ కు క్రెడిట్ కార్డు ఇస్తున్నారా.. ఈ 6 విషయాలు గుర్తు పెట్టుకోండి
ఈ 6 విషయాలు గుర్తు పెట్టుకోండి;
Credit Cards : ఈ రోజుల్లో క్రెడిట్ కార్డులు మన జీవితంలో ఒక ముఖ్యమైన భాగం అయిపోయాయి. ప్రతి పనికి వాటిని వాడుతున్నాం. ఆన్‌లైన్ షాపింగ్‌ల నుంచి రోజువారీ ఖర్చుల వరకు అన్నింటికీ క్రెడిట్ కార్డులే. ఇంట్లో వాళ్లకు ఫ్యామిలీ క్రెడిట్ కార్డులు ఇస్తుంటాం. కానీ, కొన్నిసార్లు స్నేహితులకు లేదా వేరే వాళ్లకు మన క్రెడిట్ కార్డ్ ఇవ్వాల్సి రావచ్చు. అలా ఇవ్వడం చిన్న విషయంలా అనిపించినా, దాని వల్ల చాలా పెద్ద సమస్యలు రావచ్చని నిపుణులు చెబుతున్నారు. స్నేహితులకు మీ క్రెడిట్ కార్డ్ ఇచ్చే ముందు కచ్చితంగా తెలుసుకోవాల్సిన 6 ముఖ్యమైన విషయాలు ఏంటో ఇప్పుడు చూద్దాం.
1. వాళ్లు వాడినా, కట్టాల్సిన బాధ్యత మీదే!
మీ క్రెడిట్ కార్డును ఎవరు వాడినా, ఆ ఖర్చు మీ పేరు మీదే పడుతుంది. ఒకవేళ మీ స్నేహితుడు బిల్లు కట్టకపోతే, ఆ భారం మీపైనే పడుతుంది. దీనివల్ల మీ స్నేహం కూడా దెబ్బతినొచ్చు. ఉదాహరణకు, స్నేహితుడు వాడిన బిల్లును ఆలస్యంగా కడితే, లేట్ ఫీజు మీరు కట్టాల్సి వస్తుంది.
2. క్రెడిట్ స్కోర్ దెబ్బతింటుంది
మీ క్రెడిట్ స్కోర్ అనేది మీరు అప్పులు తిరిగి కట్టే సామర్థ్యాన్ని చూపుతుంది. మీ స్నేహితుడు కార్డును ఎక్కువ వాడినా, లేదా పేమెంట్స్ ఆలస్యం చేసినా, మీ క్రెడిట్ స్కోర్ తగ్గిపోతుంది. అప్పుడు మీకు భవిష్యత్తులో లోన్లు తీసుకోవడం లేదా కొత్త క్రెడిట్ కార్డ్ పొందడం కష్టమవుతుంది.
3. బ్యాంకుకు ఫిర్యాదు చేయలేరు
మీ స్నేహితుడు మీ అనుమతి లేకుండా ఎక్కువ ఖర్చు చేసినా, మీరు బ్యాంకుకు అధికారికంగా ఫిర్యాదు చేయలేరు. ఎందుకంటే, కార్డును మీరు స్వయంగా అతనికి ఇచ్చారు. మీ తరపున వాడారు కాబట్టి, బ్యాంకులు మీ ఫిర్యాదును పెద్దగా పట్టించుకోవు.
4. చట్టపరమైన చిక్కులు, మోసాల ప్రమాదం
క్రెడిట్ కార్డ్ కంపెనీలు కార్డును వేరొకరికి ఇవ్వడానికి అనుమతించవు. మీ స్నేహితుడు కార్డును తప్పుగా లేదా చట్టవిరుద్ధంగా వాడితే, దానికి మీరే బాధ్యులు అవుతారు. ఒకవేళ మీ కార్డుతో మోసం జరిగినా ఆ బాధ్యత మీపైనే పడుతుంది.
5. స్నేహం చెడిపోతుంది
డబ్బు విషయంలో చిన్న పొరపాట్లు కూడా మంచి సంబంధాలను దెబ్బతీస్తాయి. స్నేహితుడు డబ్బు తిరిగి ఇవ్వడం మర్చిపోయినా లేదా ఆలస్యం చేసినా, అది మీ స్నేహాన్ని పూర్తిగా నాశనం చేయొచ్చు. డబ్బు, నమ్మకం రెండూ పోయే ప్రమాదం ఉంటుంది.
6. సురక్షితమైన మార్గాలు ఆలోచించండి
మీ క్రెడిట్ కార్డును నేరుగా స్నేహితుడికి ఇవ్వకుండా వేరే మార్గాల్లో సాయం చేయొచ్చు. ఉదాహరణకు, వారికి అవసరమైన వస్తువులను మీ కార్డుతో మీరు కొనివ్వండి. దానివల్ల ఖర్చు మీ నియంత్రణలో ఉంటుంది. తర్వాత వారి నుంచి డబ్బును మీరు తీసుకోవచ్చు. యూపీఐ లేదా ఇతర డిజిటల్ పేమెంట్ పద్ధతులను వాడితే, మీ కార్డు వివరాలు ఎవరికీ చెప్పాల్సిన అవసరం ఉండదు. మీ డబ్బు కూడా సురక్షితంగా ఉంటుంది.