Donald Trump: అమెరికా, కెనడా మధ్య శతాబ్ద కాలంగా కొనసాగుతున్న వాణిజ్య బంధం తీవ్ర ఒత్తిడికి గురైన వేళ ఒక బిగ్ రిలీఫ్ లభించింది. ఆగస్టు 20 ఉదయం నుంచి దాదాపు 20 బిలియన్ డాలర్ల విలువైన కెనడియన్ ఉత్పత్తులపై 50 శాతం భారీ దిగుమతి సుంకాలు విధించేందుకు డొనాల్డ్ ట్రంప్ సిద్ధమయ్యారు. ఇరు దేశాలు విధించుకున్న బుధవారం మధ్యాహ్నం 12:01 గంటల గడువు సమీపిస్తున్న తరుణంలో వాషింగ్టన్, ఒట్టావా మధ్య దౌత్య చర్చలు ఊపందుకున్నాయి. చివరి నిమిషంలో కుదిరిన రాజీ ఫలించడంతో ట్రంప్ ఈ కఠిన నిర్ణయాన్ని తాత్కాలికంగా నిలిపివేస్తున్నట్లు తన ట్రూత్ సోషల్ వేదికగా వెల్లడించారు.

తీవ్ర ఉత్కంఠ మధ్య సాగిన సంప్రదింపులు

ఈ ఉద్రిక్త పరిస్థితుల నుంచి బయటపడేందుకు కెనడా ప్రధాని మార్క్ కార్నీ, అమెరికా అధ్యక్షుడు డొనాల్డ్ ట్రంప్ మధ్య రెండు రోజుల వ్యవధిలో రెండుసార్లు సుదీర్ఘ ఫోన్ సంభాషణలు జరిగాయి. పరిస్థితి ఎంతో క్లిష్టంగా ఉందంటూ ప్రధాని కార్నీ అంతకుముందే వ్యాఖ్యానించడంతో ప్రపంచ వ్యాపార వర్గాల్లో ఆందోళన వ్యక్తమైంది. చివరికి దౌత్య ప్రయత్నాలు ఫలించడంతో పత్రాల తుదిరూపకల్పన కోసం ట్రంప్ టారిఫ్ నిర్ణయాన్ని మూడు రోజుల పాటు హోల్డ్‌లో పెట్టారు. ఈ ఒప్పందంతో అమెరికా ఉత్పత్తులకు కెనడా మార్కెట్‌లో విస్తృతమైన అవకాశాలు లభిస్తాయని అమెరికా వాణిజ్య ప్రతినిధి కార్యాలయం స్పష్టం చేసింది.

మళ్లీ తెరపైకి కీస్టోన్ పైప్‌లైన్ ప్రాజెక్టు

ఈ నూతన ఒప్పందం ద్వారా అమెరికన్ కార్మికులు, పారిశ్రామికవేత్తల ప్రయోజనాలు నెరవేరుతాయని ట్రంప్ వర్గాలు పేర్కొన్నాయి. గతంలో జో బైడెన్ హయాంలో రద్దయిన ప్రతిష్టాత్మక కీస్టోన్ ఎక్స్‌ఎల్ పైప్‌లైన్ ప్రాజెక్టును మళ్లీ ప్రారంభించేందుకు కూడా ఈ డీల్ దోహదపడుతుందని ట్రంప్ సంకేతాలు ఇచ్చారు. డిజిటల్ ట్రేడ్, ఆర్థిక భద్రత అంశాల్లో రెండు దేశాలు ఒకే వేదికపైకి రావడం అంతర్జాతీయంగా ప్రాధాన్యత సంతరించుకుంది.

పరిష్కారం దిశగా దశాబ్దాల నాటి సరిహద్దు వివాదాలు

అమెరికా, కెనడాల మధ్య కలప దిగుమతులు, డెయిరీ ఉత్పత్తుల మార్కెట్ పరిమితులపై దశాబ్దాలుగా విభేదాలు కొనసాగుతున్నాయి. 5,525 మైళ్ల పొడవైన సరిహద్దు గుండా ప్రతిరోజూ దాదాపు 3,30,000 మంది ప్రజలు, 2 బిలియన్ డాలర్ల సరుకులు రవాణా అవుతుంటాయి. దేశీయ తయారీ రంగాన్ని బలోపేతం చేసేందుకు టారిఫ్‌లను అస్త్రంగా ఉపయోగిస్తున్న ట్రంప్, ఈ ఒప్పందంతో కెనడాను తమకు అనుకూలంగా మార్చుకోవడంలో సక్సెస్ అయ్యారని విశ్లేషకులు భావిస్తున్నారు.

Tags: