Donald Trump: భారత్ సహా 5 దేశాలపై 100% టారిఫ్ హెచ్చరిక.. అమెరికా సీనెట్‌లో కీలక బిల్లు ఆమోదం

Donald Trump: ఉక్రెయిన్‌పై రష్యా సాగిస్తున్న యుద్ధానికి ఆర్థికంగా మద్దతు ఇస్తున్నాయనే నెపంతో రష్యా నుంచి క్రూడ్ ఆయిల్, గ్యాస్ దిగుమతి చేసుకునే ప్రధాన దేశాలపై కఠిన చర్యలు తీసుకునేందుకు అమెరికా సీనెట్ అడుగులు వేసింది. ఈ మేరకు 'లిండ్సే ఓ. గ్రహాం సాంక్షనింగ్ రష్యా అండ్ ఇరాన్ యాక్ట్ ఆఫ్ 2026' బిల్లును అమెరికా సీనెట్ 86-11 ఓట్ల అపార మెజారిటీతో ఆమోదించింది. రష్యా నుంచి అత్యధికంగా చమురు, ఇంధనాన్ని కొనుగోలు చేస్తున్న భారత్, చైనా, అజర్బైజాన్, హంగేరీ, స్లోవేకియా దేశాల నుంచి దిగుమతయ్యే వస్తువులపై ఏకంగా 100 శాతం వరకు పన్నులు విధించేందుకు అమెరికా అధ్యక్షుడు డోనాల్డ్ ట్రంప్‌కు ఈ బిల్లు అధికారాన్ని ఇస్తుంది.

దివంగత సీనేటర్ వారసత్వానికి గౌరవంగా..

ఈ ద్విపాక్షిక బిల్లును ఇటీవల మరణించిన రిపబ్లికన్ సీనేటర్ లిండ్సే గ్రహాం, డెమొక్రాటిక్ సీనేటర్ రిచర్డ్ బ్లూమెంతల్ సంయుక్తంగా ముందుకు తెచ్చారు. ఉక్రెయిన్ పర్యటన ముగించుకుని వచ్చిన కొద్ది రోజులకే లిండ్సే గ్రహాం హఠాన్మరణం చెందడంతో, ఆయన స్మారకార్థం, ఉక్రెయిన్‌కు మద్దతుగా ఈ బిల్లును ఉభయ పక్షాల నాయకులు అత్యంత వేగంగా ఆమోదింపజేశారు. ఈ బిల్లు ద్వారా రష్యా ఆర్థిక వ్యవస్థను నిలబెడుతున్న ప్రధాన దేశాలు.. అమెరికాతో వ్యాపారం చేయాలా లేక రష్యా నుంచి చౌక ఇంధనం కొనుగోలు చేయాలా అనే కఠిన నిర్ణయం తీసుకోవాల్సి వస్తుందని దివంగత సీనేటర్ సోదరి డార్లిన్ గ్రహాం పేర్కొన్నారు.

ఇరాన్ రంగంపైనా ఆంక్షల పొడిగింపు

రష్యాపై ఆంక్షలతో పాటు, ఇరాన్ ఇంధన రంగంలో పెట్టుబడులు పెట్టే విదేశీ కంపెనీలను శిక్షించే ఇరాన్ సాంక్షన్స్ యాక్ట్ ఆఫ్ 1996 నిబంధనల గడువును ఈ నూతన బిల్లు 2031 వరకు పొడిగిస్తుంది. అలాగే రష్యా అధ్యక్షుడు వ్లాదిమిర్ పుతిన్, ఆ దేశ వ్యాపార దిగ్గజాలు (ఒలిగార్క్స్), ప్రముఖ ఆర్థిక సంస్థలపై తీవ్ర స్థాయి ఆంక్షలు విధించేలా ఈ చట్టంలో నిబంధనలను పొందుపరిచారు. సీనేట్ ఆమోదం పొందిన ఈ బిల్లు ఆగస్టు 31న హౌస్ ఆఫ్ రిప్రజెంటేటివ్స్ సమావేశమైన తర్వాత అక్కడ తుది ఆమోదం కోసం వెళ్లనుంది.

అమెరికాలోనే వ్యక్తమవుతున్న విమర్శలు

అయితే ఈ బిల్లుపై అమెరికా ప్రతినిధుల సభలోని కొందరు డెమొక్రాట్ ప్రజాప్రతినిధుల నుంచి తీవ్ర విమర్శలు వ్యక్తమవుతున్నాయి. డెమొక్రాట్ కాంగ్రెస్ సభ్యులు గ్రెగొరీ మీక్స్, డాన్ బేయర్లు ఈ చట్టాన్ని ఖండిస్తూ, ఇది అధ్యక్షుడు ట్రంప్‌కు టారిఫ్‌లను ఒక ఆయుధంగా మార్చుకునే అనంతమైన అధికారాలను ఇస్తుందని ఆందోళన వ్యక్తం చేశారు. ఇది అంతిమంగా రష్యాపై కన్నా అమెరికా వినియోగదారులకే అధిక భారాన్ని మోపే ప్రమాదం ఉందని, ఈ విధమైన వాణిజ్య యుద్ధం వల్ల అమెరికా ఆర్థిక వ్యవస్థకే నష్టం వాటిల్లుతుందని హెచ్చరిస్తున్నారు.