PM DDK Yojana : కోట్లాది మంది రైతుల జీవితాలు మార్చేందుకు కేంద్రం కొత్త పథకం.. దీని వల్ల ఏంటి ఉపయోగం ?

PM DDK Yojana : రైతుల భవిష్యత్తును మార్చేసే ఒక కొత్త పథకానికి కేంద్ర ప్రభుత్వం ఆమోదం తెలిపింది. అదే పీఎం ధన్-ధాన్య కృషి యోజన. కేంద్ర క్యాబినెట్ ఇటీవల నిధుల విడుదలకు ఆమోదం తెలిపిన మూడు ముఖ్యమైన పథకాల్లో ఇది ఒకటి. వ్యవసాయ రంగాన్ని బలోపేతం చేయడానికి ఉద్దేశించిన ఈ పథకానికి కేంద్రం ఒక సంవత్సరానికి రూ.24,000 కోట్లు ఖర్చు చేయనుంది. ఇలా ఆరు సంవత్సరాల పాటు ఈ పథకం కోసం ప్రత్యేకంగా నిధులు కేటాయించబడతాయి. దీని ద్వారా దేశంలోని 1.7 కోట్ల మంది రైతులు లబ్ధి పొందుతారని, వారి జీవితాలు మరింత భద్రంగా మారుతాయని ప్రభుత్వం ఆశిస్తోంది.

ఈసారి కేంద్ర బడ్జెట్ (2025-26)లోనే పీఎం ధన్-ధాన్య కృషి యోజనను ప్రకటించారు. ఆశావహ జిల్లాల కార్యక్రమం కింద, వ్యవసాయం, దాని అనుబంధ రంగాలపై దృష్టి సారించి ఈ పథకాన్ని రూపొందించారు. వ్యవసాయంలో వెనుకబడిన వంద జిల్లాలను ఎంపిక చేసి ఈ పథకాన్ని అమలు చేస్తారు.

ఈ వంద జిల్లాలను ఎంపిక చేయడానికి మూడు ముఖ్యమైన ప్రమాణాలు ఉన్నాయి:

* వ్యవసాయ ఉత్పాదకత తక్కువగా ఉండటం.

* పంట దిగుబడి తక్కువగా ఉండటం.

* రుణ ప్రవాహం పరిమితంగా ఉండటం.

ప్రస్తుతానికి ఈ పథకం కోసం వంద జిల్లాలను ఇంకా ఎంపిక చేయలేదు. అయితే, ప్రతి రాష్ట్రం, కేంద్రపాలిత ప్రాంతం నుండి కనీసం ఒక జిల్లా అయినా ఈ పథకం పరిధిలోకి వస్తుందని హామీ ఇచ్చారు.

పీఎం ధన్-ధాన్య కృషి యోజన వల్ల లాభాలేంటి?

ఎంపిక చేసిన జిల్లాల్లో ఆధునిక మరియు స్థిరమైన వ్యవసాయ పద్ధతులను ప్రోత్సహిస్తారు. రైతులకు సులభంగా రుణ సదుపాయం కల్పిస్తారు. పంటల వైవిధ్యాన్ని పెంచడానికి, మరియు స్థిరమైన వ్యవసాయ పద్ధతులకు ప్రోత్సాహం అందిస్తారు. పంట కోత తర్వాత వ్యవసాయ ఉత్పత్తులను నిల్వ చేయడానికి పంచాయతీ, బ్లాక్ స్థాయిలో గోదాములను నిర్మిస్తారు. నీటిపారుదల సౌకర్యాలను పెంచుతారు.

36 వేర్వేరు పథకాల కలయిక

పీఎం ధన్-ధాన్య కృషి యోజన కింద 11 కేంద్ర మంత్రిత్వ శాఖల నుండి 36 వేర్వేరు పథకాలను సమర్థవంతంగా ఉపయోగిస్తారు. రాష్ట్ర స్థాయి పథకాలు, ప్రైవేట్ రంగం కూడా ఇందులో భాగస్వామ్యం అవుతాయి. పథకం ప్రణాళిక, అమలు, పర్యవేక్షణ కోసం జాతీయ, రాష్ట్ర జిల్లా స్థాయిలలో మూడు-స్థాయి కమిటీలను ఏర్పాటు చేస్తారు. జిల్లా ధన్-ధాన్య కమిటీలో అభ్యుదయ రైతులను కూడా చేర్చుకుంటారు. ఈ కమిటీ జిల్లా వ్యవసాయ కార్యకలాపాల గురించి ఒక ప్రణాళికను రూపొందిస్తుంది. ఈ జిల్లా ప్రణాళికలు జాతీయ లక్ష్యాలకు అనుగుణంగా ఉండేలా చూస్తారు. ఒక జిల్లా ఈ పథకం ద్వారా ఎలా అభివృద్ధి చెందుతోంది అని గుర్తించడానికి 117 కీలక పర్ఫామెన్స్ ఇండికేటర్లను నిర్ణయించారు. ప్రతి నెలా ఈ సూచికలను పర్యవేక్షించి, జిల్లా అభివృద్ధిని నిర్ధారిస్తారు.