India GDP : భారత్‎కు గుడ్ న్యూస్ చెప్పిన వరల్డ్ బ్యాంక్.. చైనా కంటే వేగంగా ఉన్నమంటూ కితాబు

India GDP : భారత ఆర్థిక వ్యవస్థకు సంబంధించి వరల్డ్ బ్యాంక్ ఒక శుభవార్త చెప్పింది. ప్రపంచవ్యాప్తంగా అనిశ్చితి, ఎగుమతులపై ఒత్తిడి ఉన్నప్పటికీ 2025-26 ఆర్థిక సంవత్సరానికి భారత వృద్ధి అంచనాను 6.3 శాతంగానే కొనసాగించింది. దీంతో ప్రపంచంలోనే అత్యంత వేగంగా వృద్ధి చెందుతున్న ప్రధాన ఆర్థిక వ్యవస్థగా భారత్ నిలవనుంది. జనవరిలో 6.7 శాతం అంచనా వేసినప్పటికీ, ఏప్రిల్‌లో 6.3 శాతానికి తగ్గించిన వరల్డ్ బ్యాంక్ ఇప్పుడు అదే అంచనాను కొనసాగించింది.

ప్రపంచ ఆర్థిక వ్యవస్థ మందగమనం.. భారత్ దూకుడు!

వరల్డ్ బ్యాంక్ విడుదల చేసిన తాజా 'గ్లోబల్ ఎకనామిక్ ప్రాస్పెక్ట్స్' నివేదిక ప్రకారం, వాణిజ్య ఉద్రిక్తతలు పెరగడం, విధానపరమైన అనిశ్చితి కారణంగా ఈ ఏడాది ప్రపంచ ఆర్థిక వృద్ధి తగ్గే అవకాశం ఉంది. 2008 తర్వాత ఇది అత్యంత నెమ్మదిగా వృద్ధి కావచ్చు. 2025లో ప్రపంచ వృద్ధి 2.3 శాతానికి తగ్గుతుందని అంచనా వేశారు. అనిశ్చితి కారణంగా దాదాపు 70 శాతం దేశాలలో ఆర్థిక వృద్ధి అంచనాలు తగ్గించబడ్డాయి. అయితే, భారత్ విషయంలో నివేదిక కొన్ని కీలక విషయాలు వెల్లడించింది.

చైనా కంటే మనదే వేగం!

2024-25లో భారత వృద్ధి కొంచెం నెమ్మదించినప్పటికీ దీనికి కారణం పారిశ్రామిక ఉత్పత్తి తగ్గడం మాత్రమే. అయినప్పటికీ, నిర్మాణ, సేవా రంగాల కార్యకలాపాల్లో వృద్ధి స్థిరంగా ఉంది. ముఖ్యంగా గ్రామీణ ప్రాంతాల్లో డిమాండ్ బలంగా ఉండటంతో వ్యవసాయ ఉత్పత్తి మెరుగుపడింది. నివేదిక ప్రకారం, "భారత్ 2025-26 ఆర్థిక సంవత్సరంలో 6.3 శాతం వృద్ధి రేటుతో ప్రపంచంలోనే అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థగా కొనసాగుతుందని అంచనా."

వరల్డ్ బ్యాంక్ ప్రకారం.. ప్రధాన వాణిజ్య భాగస్వాములలో పెరుగుతున్న ప్రపంచ వాణిజ్య అడ్డంకుల కారణంగా ఎగుమతులు తగ్గడం వల్ల 2025-26 ఆర్థిక సంవత్సరంలో వృద్ధి అంచనాను జనవరి అంచనాల కంటే 0.4 శాతం తగ్గించారు. అయితే, చైనా ఆర్థిక వృద్ధి రేటు 2025లో 4.5 శాతం, తర్వాతి సంవత్సరం 4 శాతంగా ఉంటుందని వరల్డ్ బ్యాంక్ అంచనా వేస్తోంది. దీనిని బట్టి చూస్తే చైనా కంటే కూడా భారత్ ఆర్థిక వృద్ధి వేగంగా ఉండనుందని స్పష్టమవుతోంది. ఈ నివేదిక భారత ఆర్థిక వ్యవస్థ భవిష్యత్తుపై ఆశావహ దృక్పథాన్ని చూపుతోంది.ప్రపంచ సవాళ్ళను ఎదుర్కొని కూడా భారత్ బలంగా నిలబడగలదని సూచిస్తోంది.