25 ఏళ్ల తర్వాత వెలుగులోకి ‘ది లాస్ట్ టెనెంట్’

సినిమా చరిత్రలో అరుదైన ఘట్టంగా నిలిచే ఒక చిత్రం నిశ్శబ్దంగా మళ్లీ వెలుగులోకి వచ్చింది. దాదాపు 25 ఏళ్ల క్రితం చిత్రీకరించిన “The Last Tenant” అనే సినిమా… ఇప్పుడు యూట్యూబ్‌లో విడుదలై ప్రేక్షకుల ముందుకు వచ్చింది. ఈ చిత్రంలో యువ Irrfan Khan మరియు Vidya Balan కలిసి నటించడం ప్రత్యేకత.

ఈ చిత్రానికి Sarthak Dasgupta రచన, దర్శకత్వం వహించగా… నీనా దాస్‌గుప్తాతో కలిసి నిర్మించారు. ఇర్ఫాన్ ఖాన్ వర్థంతి సందర్భంగా ఈ చిత్రాన్ని విడుదల చేయడం మరింత భావోద్వేగాన్ని కలిగిస్తోంది.

విద్యా బాలన్ తొలి అడుగుల జ్ఞాపకం:

“ది లాస్ట్ టెనెంట్” సినిమా… విద్యా బాలన్ కెరీర్ ప్రారంభ దశలో తీసిన చిత్రంగా భావిస్తున్నారు. టీవీ నుంచి సినిమా వైపు అడుగులు వేస్తున్న సమయంలో ఆమె చేసిన తొలి చిత్రాలలో ఇది ఒకటిగా చెప్పవచ్చు. ఇర్ఫాన్ ఖాన్‌తో ఆమె చేసిన ఏకైక ఆన్-స్క్రీన్ వర్క్ కూడా ఇదే కావడం విశేషం.

మళ్లీ దొరికిన సినిమా… 25 ఏళ్ల తర్వాత విడుదల:

ఈ సినిమా రెండు దశాబ్దాలకు పైగా ల్యాబ్ లోనే ఉండిపోయింది. విడుదల కోసం ఎదురుచూస్తూ ఉండగా… దర్శకుడు సార్థక్ దాస్‌గుప్తా ఈ చిత్రానికి సంబంధించిన ఫుటేజ్ పోగొట్టుకున్నారు. అయితే ఇటీవల ఒక VHS కాపీ దొరకడంతో ఈ సినిమా మళ్లీ వెలుగులోకి వచ్చింది.

ఇది సార్థక్ దాస్‌గుప్తా తొలి సినిమా. ఇంజినీరింగ్, MBA పూర్తి చేసిన తర్వాత కార్పొరేట్ ఉద్యోగాన్ని వదిలి సినిమా రంగంలోకి వచ్చిన ఆయన… తర్వాత Music Teacher, 200 Halla Ho వంటి సినిమాలు, Dharavi Bank వంటి వెబ్ సిరీస్‌లను రూపొందించారు.

ప్రపంచవ్యాప్తంగా ప్రేక్షకులకు అందుబాటులో..

ఇప్పుడు యూట్యూబ్‌లో అందుబాటులోకి వచ్చిన ఈ సినిమా… భారతీయ సినిమా ప్రేమికులకు ఒక అరుదైన అనుభూతిని అందిస్తోంది.

అనుభవం తక్కువగా ఉన్న కాలంలో తీసిన ఈ చిత్రంలో కూడా ఇర్ఫాన్ ఖాన్ ప్రత్యేకమైన నటన శైలి, విద్యా బాలన్ స్క్రీన్ ప్రెజెన్స్ స్పష్టంగా కనిపిస్తాయి.

దర్శకుడు భావోద్వేగం...

సినిమా విడుదలపై దర్శకుడు సార్థక్ దాస్‌గుప్తా ఇలా చెప్పారు:

“నేను అప్పట్లో పూర్తిగా కొత్తవాడిని. ఫిల్మ్ స్కూల్ లేదు, గైడెన్స్ లేదు. కేవలం నా అభిరుచితో ఈ ప్రయాణం మొదలుపెట్టాను. ఇప్పుడు ఈ సినిమాను ఇర్ఫాన్ ఖాన్‌కు నివాళిగా విడుదల చేయడం ఎంతో భావోద్వేగంగా ఉంది. ఇది నా మరిచిపోయిన కలను మళ్లీ చూసినట్లుంది.”

విద్యా బాలన్ స్పందన:

విద్యా బాలన్ కూడా ఈ విడుదలపై స్పందిస్తూ…

“ఈ సినిమా చివరకు ప్రేక్షకుల ముందుకు రావడం ఎంతో ప్రత్యేకంగా అనిపిస్తోంది. అప్పట్లో నేను కెరీర్ ప్రారంభ దశలో ఉన్నాను. ఇర్ఫాన్‌తో పని చేయడం ఎంతో గొప్ప అనుభవం. ఆయనతో స్క్రీన్ షేర్ చేసిన ఏకైక సినిమా ఇదే. నా ప్రయాణం ఎక్కడ మొదలైందో గుర్తు చేసే అందమైన జ్ఞాపకం ఇది” అని అన్నారు.

యూట్యూబ్‌లో మంచి స్పందన

ఈ చిత్రాన్ని సార్థక్ దాస్‌గుప్తా సంస్థ The Salt Inc. ద్వారా విడుదల చేశారు.

రిలీజ్ అయిన 3 రోజుల్లోనే ఈ సినిమాకు దాదాపు 2 లక్షల వ్యూస్ రావడం విశేషం.

ఇర్ఫాన్ ఖాన్‌కు నివాళి

ఇర్ఫాన్ ఖాన్ అభిమానులకు ఈ సినిమా మరింత భావోద్వేగాన్ని కలిగిస్తుంది.

ఆయన వర్థంతి సందర్భంగా విడుదలైన ఈ చిత్రం… ఒక మర్చిపోయిన సినిమా మాత్రమే కాదు…

భారతీయ సినిమా చరిత్రలో ఒక గొప్ప నటుడికి అర్పించిన హృదయపూర్వక నివాళిగా నిలుస్తోంది.