Actor Ranbir Kapoor: ఆ క్యారెక్టర్ చేయడం నా అదృష్టం

Actor Ranbir Kapoor: భారతీయ చలనచిత్ర చరిత్రలోనే అత్యంత ప్రతిష్టాత్మకంగా తెరకెక్కుతున్న పౌరాణిక దృశ్యకావ్యం.. ‘రామాయణ’. ప్రముఖ దర్శకుడు నితీశ్ తివారీ దర్శకత్వంలో రెండు భాగాలుగా రాబోతున్న ఈ సినిమాపై అంచనాలు ఆకాశాన్ని తాకుతున్నాయి. ఇటీవల అమెరికాలోని లాస్ ఏంజిల్స్ ఐమ్యాక్స్ థియేటర్లో ఈ చిత్రానికి సంబంధించిన ఒక స్పెషల్ గ్లింప్స్‌ను మేకర్స్ విడుదల చేశారు. ఈ సందర్భంగా హీరో రణ్‌బీర్ కపూర్ చేసిన వ్యాఖ్యలు ప్రతి ఒక్కరినీ కదిలిస్తున్నాయి."రాముడు అంటే కేవలం ఒక పాత్ర కాదు.. ఆయన కోట్లాది మందికి ఆత్మసాక్షి. కరుణ, ధైర్యం, ధర్మాలకు ప్రతీక అయిన ఆ పురుషోత్తముడి పాత్రను పోషించడం నా అదృష్టంగా భావిస్తున్నాను" అంటూ రణ్‌బీర్ ఎమోషనల్ అయ్యారు.

ఈ చిత్రంలో రణ్‌బీర్ కపూర్ అత్యంత ప్రశాంతమైన లుక్‌లో రాముడిగా కనిపిస్తుండగా.. సీతమ్మగా సాయి పల్లవి, హనుమంతుడిగా సన్నీ డియోల్, లక్ష్మణుడిగా రవి దూబే తమ నటనతో మెప్పించబోతున్నారు. ఇక రావణాసురుడిగా కన్నడ స్టార్ యష్ అగ్నిపర్వతం లాంటి రౌద్ర రూపంలో కనిపించబోతుండటం ఈ సినిమాకే హైలైట్ కానుంది.

భారీ బడ్జెట్, అత్యున్నత సాంకేతిక విలువల కలయికలో రూపొందుతున్న ఈ మహాకావ్యం మొదటి భాగం.. 2026 దీపావళి కానుకగా ప్రపంచవ్యాప్తంగా విడుదల కానుంది. వెండితెరపై ఈ రామాయణ గాథను చూసేందుకు యావత్ భారత్ ఇప్పుడు ఆసక్తిగా ఎదురుచూస్తోంది.