Akshay Kumar: అప్పటి హీరోయిన్లకు.. ఇప్పటి నటీమణులకు ఉన్న తేడా అదే.. అక్షయ్ కుమార్ ఆసక్తికర వ్యాఖ్యలు..

Akshay Kumar: బాలీవుడ్‌లో దశాబ్దాలుగా స్టార్ హీరోగా దూసుకుపోతున్న నటుడు అక్షయ్ కుమార్ సినిమా ఇండస్ట్రీలో మారుతున్న ట్రెండ్స్, నటీనటుల ఆలోచనా విధానాలపై ఆసక్తికర వ్యాఖ్యలు చేశారు. కాలం మారినా హీరోయిన్ల అంకితభావం మారలేదని చెప్తూనే.. నేటి తరం నటీమణుల్లో ఉన్న ఒక ప్రధాన లోపాన్ని ఆయన ఎత్తిచూపారు. ప్రస్తుత తరం హీరోయిన్లు రిస్క్ తీసుకోవడానికి, స్క్రీన్ స్పేస్ పంచుకోవడానికి వెనుకాడుతున్నారని అక్షయ్ అభిప్రాయపడ్డారు. ఆయన నటించిన భారీ మల్టీస్టారర్ చిత్రం వెల్‌కమ్‌ టు ది జంగిల్‌ ప్రచార కార్యక్రమాల్లో భాగంగా ఇచ్చిన ఒక ఇంటర్వ్యూలో అక్షయ్ కుమార్ ఈ విషయాలను పంచుకున్నారు.

అప్పట్లో మాకు లేని ట్రైనింగ్.. ఇప్పుడు వారికి ఉంది..

వివిధ తరాల నటీమణుల పనితీరు గురించి మాట్లాడుతూ.. "పరిశ్రమలో ఏ తరం వారైనా సరే తమ వృత్తి పట్ల ఎంతో ప్రొఫెషనల్‌గా ఉంటారు. నటన, ప్రతిభ విషయంలో ఎవరికీ తక్కువ కాదు. అయితే ఇప్పటి తరం హీరోయిన్లు ఇండస్ట్రీలోకి అడుగుపెట్టడానికి ముందే అన్ని విషయాల్లో ఎంతో సన్నద్ధతతో వస్తున్నారు. మా కాలంలో మాకు లేని అవగాహన, ప్రత్యేక శిక్షణ ఇప్పటి తరం నటీమణులకు ఉండటం గొప్ప విషయం" అని అక్షయ్ అభినందించారు.

మల్టీస్టారర్ సినిమాలకు నో.. స్క్రీన్ షేరింగ్‌కు భయం..

అయితే నేటి తరం నటీనటులలో తాను గమనించిన ఒక ప్రతికూల అంశాన్ని అక్షయ్ కుమార్ ఓపెన్‌గా ప్రస్తావించారు. ప్రస్తుతం ఇండస్ట్రీలో మల్టీస్టారర్ సినిమాలు చాలా వరకు తగ్గిపోవడానికి నటీనటుల ఆలోచనా విధానమే కారణమని ఆయన అన్నారు. "ఇతర నటీనటులతో కలిసి స్క్రీన్‌ను పంచుకోవడానికి ఇప్పటి తరం వారు అంతగా ఆసక్తి చూపడం లేదు. మరొకరితో స్క్రీన్ స్పేస్ షేర్ చేసుకుంటే తమ ప్రాధాన్యత తగ్గుతుందేమో అనే భయం లేదా నేనెందుకు పంచుకోవాలి? అనే ఆలోచన వారిలో కనిపిస్తోంది" అని అక్షయ్ వ్యాఖ్యానించారు.

అక్షయ్ కుమార్ అభిప్రాయం:

సినిమా పరిశ్రమ మరింత అభివృద్ధి చెందాలన్నా, ప్రేక్షకులకు సరికొత్త వినోదం దక్కాలన్నా మల్టీస్టారర్ చిత్రాలు ఎంతో అవసరం. నటీనటులు తమ ఇగోలను పక్కన పెట్టి కలిసి నటించే సంస్కృతి మళ్లీ మునుపటిలా ఇండస్ట్రీలోకి వస్తే పరిశ్రమకు ఎంతో మేలు జరుగుతుంది. కాగా అక్షయ్ కుమార్ లీడ్ రోల్‌లో వస్తున్న వెల్‌కమ్‌ టు ది జంగిల్‌ చిత్రంలో 90ల నాటి సీనియర్ హీరోయిన్ల నుండి నేటి తరం నటీమణుల వరకు భారీ తారాగణం కలిసి నటించడం విశేషం.