Singer Sunitha: నెటిజన్ల ట్రోలింగ్.. తన వ్యాఖ్యలపై క్లారిటీ ఇచ్చిన సింగర్ సునిత!

Singer Sunitha: ప్రముఖ టాలీవుడ్ సింగర్ సునిత ఇటీవల చేసిన కొన్ని వ్యాఖ్యలపై సోషల్ మీడియాలో తీవ్ర విమర్శలు రావడంతో ఆమె తాజాగా ఒక వివరణ ఇచ్చారు. ఆడవాళ్లు “నా శరీరం.. నా ఇష్టం” అని అన్నప్పుడు, మగవాళ్లు కూడా “నా కళ్లు.. నా ఇష్టం” అని అనే అవకాశం ఉంటుందంటూ సునిత చేసిన వ్యాఖ్యలు సామాజిక మాధ్యమాల్లో పెద్ద దుమారాన్ని రేపాయి. మహిళల హక్కుల వెనుక ఉన్న అసలైన ఉద్దేశాన్ని సునిత సరిగ్గా అర్థం చేసుకోలేకపోయారంటూ చాలా మంది ఆమెపై ఆగ్రహం వ్యక్తం చేశారు. దాంతో ఈ విమర్శలపై స్పందించిన సునిత తన ఇన్‌స్టాగ్రామ్ స్టోరీస్ ద్వారా ఒక వివరణాత్మక పోస్ట్ పెట్టారు. తాను అన్న మాటలను కొందరు తప్పుగా అర్థం చేసుకున్నారని, మహిళల పట్ల జరిగే ఎలాంటి తప్పుడు ప్రవర్తనను సమర్థించడం లేదా వెనకేసుకురావడం తన ఉద్దేశం కాదని ఆమె స్పష్టం చేశారు.

తాను కూడా ఒక మహిళగా మహిళల సమాన హక్కులు, సమాన అవకాశాలు, వారి గౌరవ మర్యాదలను బలంగా నమ్ముతానని సునిత పేర్కొన్నారు. తోటి మహిళకు నష్టం కలిగించేలా లేదా వారిని తక్కువ చేసి చూపేలా ఉండే ఏ విషయాన్ని కూడా తాను ఎప్పటికీ సమర్థించనని, సహించనని ఆమె వివరణ ఇచ్చారు. అయితే సునిత ఈ విధంగా క్లారిటీ ఇచ్చినప్పటికీ ఈ వివాదం ఇంకా పూర్తిగా సర్దుమణగలేదు. సోషల్ మీడియా ప్లాట్‌ఫామ్‌లలో దీనిపై భిన్నాభిప్రాయాలతో కూడిన చర్చలు ఇంకా కొనసాగుతూనే ఉన్నాయి. తెలుగు సినిమా పరిశ్రమలో సునిత అత్యంత ప్రజాదరణ పొందిన సింగర్లలో ఒకరిగా గుర్తింపు తెచ్చుకున్నారు. ఎన్నో సూపర్ హిట్ పాటలను పాడిన ఆమె, కేవలం సింగర్‌గానే కాకుండా టెలివిజన్ రియాలిటీ షోలకు జడ్జిగా వ్యవహరిస్తూ బుల్లితెరపై కూడా మంచి గుర్తింపు తెచ్చుకున్నారు. ఇదిలా ఉంటే ఆమె కుమారుడు ఆకాష్ గోపరాజు కూడా ఇటీవల హీరోగా చిత్ర పరిశ్రమలోకి అడుగుపెట్టారు.