Ayesha Khan: షూటింగ్ కష్టాలను చెప్పుకున్న ఆయేషా ఖాన్: ప్రశంసల కంటే విమర్శలే ఎక్కువ!

Ayesha Khan: బాలీవుడ్ , టాలీవుడ్‌లో వరుస అవకాశాలతో దూసుకుపోతున్న నటి ఆయేషా ఖాన్, తాజాగా ఒక ఇంటర్వ్యూలో చేసిన వ్యాఖ్యలు సోషల్ మీడియాలో చర్చనీయాంశంగా మారాయి. రణ్‌వీర్ సింగ్ నటించిన 'ధురంధర్' చిత్రంలోని సూపర్ హిట్ ఐటెం సాంగ్ "షరారత్" చిత్రీకరణ సమయంలో తను ఎదుర్కొన్న ఇబ్బందులను ఆమె పంచుకున్నారు. రెండు రోజుల పాటు జరిగిన ఈ పాట షూటింగ్ సమయంలో తనకు నెలసరి (పీరియడ్స్) ఉందని, ఆ సమయంలో శారీరకంగా చాలా అసౌకర్యంగా అనిపించినప్పటికీ వృత్తి పట్ల నిబద్ధతతో డ్యాన్స్ చేశానని ఆమె పేర్కొన్నారు. ఆ సమయంలో విపరీతమైన నీరసం, ఒత్తిడి వల్ల షూటింగ్ పూర్తయ్యాక భావోద్వేగానికి లోనై ఏడ్చేశానని ఆమె వెల్లడించారు.

ఆయేషా ఖాన్ తన కష్టాన్ని మరియు వృత్తి పట్ల తనకున్న అంకితభావాన్ని చాటుకోవాలని ఈ విషయాలను వెల్లడించినప్పటికీ, నెటిజన్ల నుంచి మాత్రం మిశ్రమ స్పందన లభిస్తోంది. సోషల్ మీడియాలో ఒక వర్గం ఆమెను దారుణంగా ట్రోల్ చేస్తోంది. ప్రపంచవ్యాప్తంగా కోట్ల మంది మహిళలు ప్రతిరోజూ పీరియడ్స్ సమయంలోనే కూలీ పనులు, కష్టతరమైన ఉద్యోగాలు చేస్తున్నారని, కేవలం రెండు రోజులు డ్యాన్స్ చేసినంత మాత్రాన దానిని అంత గొప్పగా చెప్పుకోవాలా అని కొందరు ప్రశ్నిస్తున్నారు. మరికొందరైతే వెటకారంగా ఆమెకు ఈ ధైర్యసాహసాలకు గానూ 'భారత రత్న' ఇవ్వాలంటూ కామెంట్లతో విరుచుకుపడుతున్నారు.

అయితే, ఆమె అభిమానులు మాత్రం ఆయేషాకు మద్దతుగా నిలుస్తున్నారు. పీరియడ్స్ సమయంలో వచ్చే కడుపునొప్పి, నీరసం మరియు మూడ్ స్వింగ్స్‌ను తట్టుకుంటూ అంతటి ఎనర్జిటిక్ సాంగ్‌లో పర్ఫెక్ట్ స్టెప్పులు వేయడం సామాన్యం కాదని వారు ప్రశంసిస్తున్నారు. నటిగా తన బాధ్యతను సక్రమంగా నిర్వహించిందని, ఆమె నిజాయితీని మెచ్చుకోవాలే తప్ప విమర్శించడం సరికాదని వారు అభిప్రాయపడుతున్నారు. గతంలో 'ఓమ్ భీమ్ బుష్', 'గ్యాంగ్స్ ఆఫ్ గోదావరి' వంటి తెలుగు చిత్రాల్లో మెరిసిన ఆయేషాకు, ఈ 'షరారత్' పాట జాతీయ స్థాయిలో గుర్తింపు తెచ్చిపెట్టింది.