The Kerala Story 2 : ది కేరళ స్టోరీ-2కి సెన్సార్ షాక్.. 16 కట్స్.. ఆ సీన్ తొలగింపు...

The Kerala Story 2 : మొదటి భాగంతో దేశవ్యాప్తంగా సంచలనం సృష్టించిన ది కేరళ స్టోరీకి సీక్వెల్‌గా వస్తున్న రెండో భాగం విడుదలకు ముందే సెన్సార్ వివాదంలో చిక్కుకుంది. చిత్రంలోని హింసాత్మక మరియు శృంగారభరిత దృశ్యాలపై సెంట్రల్ బోర్డ్ ఆఫ్ ఫిల్మ్ సర్టిఫికేషన్ తీవ్ర అభ్యంతరం వ్యక్తం చేస్తూ భారీగా కోతలు విధించింది.

ముఖ్యమైన 16 మార్పులు:

సెన్సార్ బోర్డు ఈ చిత్రానికి U/A సర్టిఫికెట్ జారీ చేస్తూనే, మొత్తం 16 కీలక మార్పులను సూచించింది .సమాజంపై ప్రతికూల ప్రభావం చూపే అవకాశం ఉందన్న ఉద్దేశంతో, అత్యాచారానికి సంబంధించిన ఒక సుదీర్ఘమైన దృశ్యాన్ని పూర్తిగా తొలగించాలని బోర్డు ఆదేశించింది.

ముద్దు సీన్లపై కత్తెర:

చిత్రంలోని రొమాంటిక్ సీన్ల నిడివిని ఏకంగా 50 శాతానికి తగ్గించారు. శృంగారభరిత విజువల్స్ విషయంలో సెన్సార్ సభ్యులు ఎక్కడా రాజీ పడలేదు. కొన్ని వర్గాలను కించపరిచేలా ఉన్న పదాలను తొలగించి, మతపరమైన సామరస్యానికి భంగం కలగకుండా ప్రత్యామ్నాయ పదాలను చేర్చాలని మేకర్స్‌కు సూచించారు.

వివాదమే పబ్లిసిటీ అవుతుందా?

తొలి భాగం కేరళలో జరిగిన మత మార్పిడుల నేపథ్యంలో వచ్చి భారీ చర్చకు దారితీసింది. ఇప్పుడు రెండో భాగంలోనూ అంతకంటే సున్నితమైన అంశాలను దర్శకుడు సుదీప్తో సేన్ టచ్ చేసినట్లు సెన్సార్ బోర్డు ఆంక్షలను బట్టి అర్థమవుతోంది. "సినిమా నిడివి తగ్గినా.. కథలోని ప్రభావం మాత్రం తగ్గదు" అని చిత్ర యూనిట్ ధీమా వ్యక్తం చేస్తోంది.