Dhurandhar 2 Director: అలాంటి ఫేక్ ఫొటోలను నమ్మకండి. ధురంధర్ 2 డైరెక్టర్ సీరియస్ వార్నింగ్

Dhurandhar 2 Director: బాక్సాఫీస్ వద్ద రణ్‌వీర్ సింగ్ నటించిన ధురంధర్ 2 ఊహకందని రీతిలో దూసుకుపోతోంది. మార్చి 19న విడుదలైన ఈ చిత్రం కేవలం ఏడు రోజుల్లోనే రూ. 1,006 కోట్ల వసూళ్లను సాధించి, భారతీయ సినిమా చరిత్రలో సరికొత్త రికార్డును నెలకొల్పింది. అయితే, ఒకవైపు వసూళ్ల వర్షం కురుస్తుండగా, మరోవైపు ఈ సినిమాను వివాదాల్లోకి నెట్టేందుకు జరుగుతున్న ప్రయత్నాలపై దర్శకుడు ఆదిత్య ధర్ తీవ్రంగా స్పందించారు.

ఏఐ సృష్టించిన నకిలీ చిత్రంపై ఆగ్రహం:

గత కొద్ది రోజులుగా సోషల్ మీడియాలో ఈ సినిమాలోని జస్కీరత్ అనే సిక్కు పాత్రకు సంబంధించిన ఒక ఫోటో వైరల్ అవుతోంది. ఆ ఫోటోలో సదరు పాత్ర తలపాగా ధరించి సిగరెట్ తాగుతున్నట్లుగా ఉంది. దీనిపై స్పందించిన ఆదిత్య ధర్, అది పూర్తిగా ఆర్టిఫిషియల్ ఇంటెలిజెన్స్ తో సృష్టించిన ఫేక్ చిత్రమని స్పష్టం చేశారు.

దర్శకుడు ఆదిత్య ధర్ ఏమన్నారంటే..?

"మా సినిమాలో కానీ, అధికారిక ప్రోమోల్లో కానీ అలాంటి అభ్యంతరకర సన్నివేశాలు ఎక్కడా లేవు. సిక్కు సమాజం పట్ల మాకు అత్యున్నతమైన గౌరవం ఉంది. ఉద్దేశపూర్వకంగా అలజడులు సృష్టించేందుకు ఇలాంటి మార్ఫింగ్ ఫోటోలను వైరల్ చేస్తున్న వారిని గుర్తించాం. వారిపై చట్టపరమైన చర్యలు తీసుకోవడానికి వెనకాడం. ఇలాంటి తప్పుడు సమాచారాన్ని, ఫేక్ ఫోటోలను ఎవరూ నమ్మవద్దు" అని ఆయన ప్రేక్షకులను కోరారు.

రికార్డుల వేటలో ధురంధర్ 2:

స్పై థ్రిల్లర్‌గా వచ్చిన ఈ చిత్రంలో రణ్‌వీర్ సింగ్ పర్ఫార్మెన్స్‌కు ప్రేక్షకులు బ్రహ్మరథం పడుతున్నారు. 2026లో అత్యంత వేగంగా 1000 కోట్ల మార్కును అందుకున్న చిత్రంగా ఇది నిలిచింది. ఒకవైపు అద్భుతమైన ఆదరణ, మరోవైపు ఇలాంటి సాంకేతిక పరమైన దాడులు ఎదురవుతుండటం సినీ వర్గాల్లో చర్చనీయాంశంగా మారింది.