Allari Naresh: కామెడీ చేయడం ఇప్పుడు అంత ఈజీ కాదు : అల్లరి నరేష్

Allari Naresh: అల్లరి నరేష్‌ అంటే కామెడీ సినిమాలకు పెట్టింది పేరు. తన కెరీర్‌లో ఎక్కువగా కామెడీ, ఎంటర్‌టైనర్‌ సినిమాలతోనే ప్రేక్షకులను అలరించారు. ఈ జోనర్‌లో ఎన్నో విజయాలు, బ్లాక్‌బస్టర్లు అందుకున్నారు. ఆ తర్వాత కొంతకాలంగా సీరియస్‌ కథలు, విభిన్నమైన పాత్రలపై దృష్టి పెట్టిన ఆయన.. ఇప్పుడు మళ్లీ పూర్తి స్థాయి కామెడీ సినిమాతో ప్రేక్షకుల ముందుకు వస్తున్నారు. ఆయన నటించిన రంభ ఊర్వశి మేనక ఈ వారాంతంలో ప్రేక్షకుల ముందుకు రానుంది.

అయితే ప్రస్తుతం పూర్తి స్థాయి కామెడీ సినిమా తీయడం గతంలో ఉన్నంత సులభం కాదని అల్లరి నరేష్‌ అభిప్రాయపడ్డారు. కాలంతో పాటు కామెడీని చూసే విధానం కూడా మారిపోయిందని చెప్పారు. ప్రస్తుతం ప్రేక్షకులు రోజూ సోషల్‌ మీడియాలో ఎన్నో రకాల కామెడీ కంటెంట్‌ను చూస్తున్నారని తెలిపారు.

ముఖ్యంగా మీమ్స్‌, వాట్సాప్‌ ఫార్వర్డ్స్‌, సోషల్‌ మీడియా వీడియోలు వంటి వాటి ద్వారా ప్రేక్షకులకు నిత్యం కామెడీ అందుబాటులో ఉంటోందని అల్లరి నరేష్‌ అన్నారు. దీంతో థియేటర్‌లో ప్రేక్షకులను నవ్వించాలంటే సాధారణమైన కామెడీ సరిపోదని చెప్పారు. కొత్తగా, ఇంతకుముందు చూడని పరిస్థితులు, సరికొత్త ఆలోచనలతో కూడిన కామెడీ సన్నివేశాలను రాయాల్సిన అవసరం ఉందన్నారు.

మరోవైపు ప్రస్తుతం పెరిగిన ‘పొలిటికల్‌ కరెక్ట్‌నెస్‌’ కూడా కామెడీ రాయడంపై ప్రభావం చూపుతోందని ఆయన అభిప్రాయపడ్డారు. ఒక జోక్‌ రాసే ముందు అది ఏ వ్యక్తినైనా, ఏదైనా వర్గాన్ని, సమాజంలోని ఒక సెక్షన్‌ను లేదా ఒక లింగానికి చెందిన వారిని బాధపెడుతుందా అనే విషయాన్ని ఆలోచించాల్సి వస్తోందన్నారు. ఈ జాగ్రత్తలు కూడా పూర్తి స్థాయి కామెడీ సినిమాలు తగ్గడానికి ఒక కారణంగా మారాయని చెప్పారు.

ఇక రంభ ఊర్వశి మేనక సినిమాలో కొన్ని కామెడీ సన్నివేశాల కోసం తాను కొంతమంది హీరోలను అనుకరించినట్లు అల్లరి నరేష్‌ తెలిపారు. అయితే ఆ అనుకరణ ఎవరినీ బాధపెట్టేలా ఉండకుండా జాగ్రత్తలు తీసుకున్నానని చెప్పారు. ముఖ్యంగా ఆయా నటులను, వారి అభిమానులను ఇబ్బంది పెట్టకుండా కామెడీని రూపొందించినట్లు వెల్లడించారు.

చాలా కాలం తర్వాత అల్లరి నరేష్‌ మళ్లీ పూర్తి స్థాయి కామెడీ సినిమాతో ప్రేక్షకుల ముందుకు వస్తున్నారు. దీంతో రంభ ఊర్వశి మేనకపై ఆయన అభిమానుల్లో, కామెడీ సినిమాలను ఇష్టపడే ప్రేక్షకుల్లో ఆసక్తి నెలకొంది.