ED Raids on Malayalam Star Heroes' Homes and Offices: మలయాళ స్టార్ హీరోల ఇళ్ళు , ఆఫీసుల పై ఈడీ దాడులు: వాహన అక్రమ రవాణా కేసులో మమ్ముట్టి, దుల్కర్ సల్మాన్, పృథ్వీరాజ్ నివాసాలపై సోదాలు
వాహన అక్రమ రవాణా కేసులో మమ్ముట్టి, దుల్కర్ సల్మాన్, పృథ్వీరాజ్ నివాసాలపై సోదాలు
ED Raids on Malayalam Star Heroes' Homes and Offices: కేరళలోని ప్రముఖ మలయాళ సినిమా నటులైన మమ్ముట్టి, దుల్కర్ సల్మాన్, పృథ్వీరాజ్ సుకుమారన్‌ల ఇళ్లు, ఆఫీసులపై ఎన్‌ఫోర్స్‌మెంట్ డైరెక్టరేట్ (ఈడీ) అధికారులు బుధవారం ఉదయం సోదాలు నిర్వహించారు. వాహనాల అక్రమ రవాణా కేసులో తప్పుడు పత్రాలతో కొనుగోలు-విక్రయాలు జరిపిన ఆరోపణలపై ఈ చర్యలు తీసుకున్నారు. ఫారిన్ ఎక్స్‌చేంజ్ మేనేజ్‌మెంట్ యాక్ట్ (ఫెమా) ఉల్లంఘనలు కూడా ఈ కేసులో భాగంగా ఉన్నాయని అధికారులు తెలిపారు.
భూటాన్ నుంచి లగ్జరీ కార్ల స్మగ్లింగ్: సిండికేట్ రహస్యం బయటపడింది
కొన్ని నెలలుగా ఈడీ వాహనాల అక్రమ దిగుమతి, రవాణా కేసులను లొంగిపోకుండా దర్యాప్తు చేస్తోంది. భూటాన్, నేపాల్ మార్గాల ద్వారా ప్రీ-ఓన్డ్ లగ్జరీ వాహనాలను అనధికారంగా దేశంలోకి తీసుకురావడం, విదేశీ మారక లావాదేవీలతో కొనుగోలు చేయడం వంటి ఆరోపణలు ఈ కేసులో కీలకం. గత సెప్టెంబర్ 23న కొచ్చి కస్టమ్స్ (ప్రివెంటివ్) కమిషనరేట్ రాష్ట్రవ్యాప్తంగా 30 చోట్ల ఏకకాలంలో దాడులు చేసింది. ఆ సందర్భంగా 37 సెకండ్‌హ్యాండ్ కార్లను స్వాధీనం చేసుకున్నారు.
ఈ సిండికేట్ భారత సైన్యం, అమెరికా రాయబారి కార్యాలయం, విదేశాంగ మంత్రిత్వ శాఖ పేర్లతో నకిలీ పత్రాలు తయారు చేసి, అక్రమ రవాణాను నడుపుతోందని ప్రాథమిక విచారణలో తేలింది. ల్యాండ్ క్రూజర్, డిఫెండర్ వంటి లగ్జరీ కార్లను అరుణాచల్ ప్రదేశ్, హిమాచల్ ప్రదేశ్‌లో మోసపూరిత ఆర్‌టిఓ రిజిస్ట్రేషన్‌లతో రిజిస్టర్ చేసి, తక్కువ ధరలకు ప్రముఖులకు, సినిమా హీరోలకు విక్రయిస్తున్నారని ఆరోపణ. రోడ్ ట్రాన్స్‌పోర్ట్ అండ్ హైవేస్ మంత్రిత్వ శాఖ దర్యాప్తులో 150 నుంచి 200 వాహనాలు ఇలా అక్రమంగా రవాణా అయ్యాయని తెలిసింది. కోయంబత్తూరు కేంద్రంగా పనిచేసే ఈ సిండికేట్ కేరళకు కార్లను స్మగ్లింగ్ చేసినట్టు అనుమానం.
మలయాళ స్టార్లు, వాహన యజమానులపై 17 చోట్ల సోదాలు
ఫెమాలోని 3, 4, 8 సెక్షన్ల ఉల్లంఘనలపై ఈడీ చర్యలు తీసుకుంది. దీని బట్టి, మమ్ముట్టి, పృథ్వీరాజ్ సుకుమారన్, దుల్కర్ సల్మాన్‌ల కేరళ, తమిళనాడు నివాసాల్లోనూ 17 ప్రదేశాల్లో సోదాలు జరిగాయి. వీరితో పాటు వాహన యజమానులు, ఆటోమొబైల్ వర్క్‌షాప్‌లు, వ్యాపార కేంద్రాలపై కూడా దాడులు చేశారు. తృశ్శూర్, కోజికోడ్, మలప్పురం, కోట్టాయం, కోయంబత్తూర్‌లో ఈ దాడులు నిర్వహించారు