Dhanashree: నేను లేడీ సల్మాన్‌లా ఉండాలనుకుంటున్నా - ధన శ్రీ

Dhanashree: ప్రముఖ కొరియోగ్రాఫర్, సోషల్ మీడియా స్టార్ ధనశ్రీ వర్మ - భారత క్రికెటర్ యజువేంద్ర చాహల్‌తో విడాకుల తర్వాత మొదటిసారిగా తన వ్యక్తిగత జీవితంపై స్పందించారు. ప్రస్తుతం తాను ఎవరితోనూ సంబంధం పెట్టుకోవడానికి ఆసక్తిగా లేనని.. ఇకపై లేడీ సల్మాన్ ఖాన్ లాగా ఉండాలనుకుంటున్నానని ఆమె స్పష్టం చేశారు. అష్నీర్ గ్రోవర్ హోస్ట్ చేస్తున్న రైజ్ అండ్ ఫాల్ అనే రియాలిటీ షోలో ఆమె ఈ వ్యాఖ్యలు చేశారు. తోటి కంటెస్టెంట్లతో మాట్లాడుతూ.. "ప్రస్తుతానికి నా జీవితంలోకి ఎవరూ వద్దు. నా గత సంబంధంలో నేను చాలా చూశాను. అందుకే ఇకపై నేను ఈ ఇండస్ట్రీకి లేడీ సల్మాన్ ఖాన్‌లా ఉంటాను" అని ఆమె తెలిపారు.

ఈ సందర్భంగా తనకొచ్చిన ఓ కల గురించి కూడా ఆమె పంచుకున్నారు. 'దిల్‌వాలే దుల్హనియా లే జాయేంగే' సినిమాలోని పచ్చని పొలాల్లో తాను ఉన్నట్లు కల వచ్చిందని, ఆ కలలో ప్రేమ ప్రస్తావనే లేదని, తన దృష్టి అంతా ప్రకృతిపైనే ఉందని వివరించారు. ఈ మాటల ద్వారా ఒంటరి జీవితాన్ని ఆస్వాదిస్తున్నానని ఆమె పరోక్షంగా తెలియజేశారు.

ధనశ్రీ వర్మ, యజువేంద్ర చాహల్ డిసెంబర్ 2020లో వివాహం చేసుకున్నారు. నాలుగేళ్ల తర్వాత వారి మధ్య మనస్పర్థలు రావడంతో ఈ ఏడాది ఫిబ్రవరిలో విడాకుల కోసం దరఖాస్తు చేసుకున్నారు. కొద్ది నెలల క్రితమే వారి విడాకులు అధికారికంగా పూర్తయ్యాయి. అనవసర డ్రామాకు పోకుండా గౌరవప్రదంగా విడిపోయామని ధనశ్రీ గతంలోనే తెలిపారు. ప్రస్తుతం యజువేంద్ర చాహల్ కంటెంట్ క్రియేటర్ ఆర్జే మహ్వష్‌తో డేటింగ్‌లో ఉన్నట్లు వార్తలు వస్తుండగా.. ధనశ్రీ మాత్రం తన కెరీర్‌పై పూర్తిగా దృష్టి సారించారు.