‘Lenin’ Locks Release Date: జెండా పట్టి డేట్ ఫిక్స్ చేసిన 'లెనిన్'!

‘Lenin’ Locks Release Date: అక్కినేని అఖిల్ పుట్టినరోజు సందర్భంగా ఆయన నటిస్తున్న కొత్త సినిమా ‘లెనిన్’ నుంచి ఒక అదిరిపోయే అప్‌డేట్ వచ్చింది. ఈ చిత్ర బృందం అఖిల్ పుట్టినరోజును పురస్కరించుకుని కొత్త పోస్టర్‌ను విడుదల చేస్తూ, సినిమా విడుదల తేదీపై క్లారిటీ ఇచ్చింది.

ఈ సినిమాలో అఖిల్ మునుపెన్నడూ చూడని విధంగా ఒక పక్కా మాస్, రూరల్ లుక్‌లో కనిపిస్తున్నారు. చిత్తూరు నేపథ్యంలో సాగే ఈ కథలో ఆయన ఒక సామాన్యుడి పాత్రలో నటిస్తున్నారు. తాజాగా విడుదలైన పోస్టర్‌లో అఖిల్ గడ్డంతో, సాధారణ దుస్తులు ధరించి, చేతిలో జెండా మరియు మట్టిని పట్టుకుని కనిపిస్తున్నారు. అఖిల్ తన కెరీర్‌లో పూర్తిస్థాయి గ్రామీణ పాత్రలో నటించడం ఇదే మొదటిసారి.

ముఖ్యంగా ఈ పోస్టర్ ద్వారా సినిమా విడుదల తేదీని 2026, జూన్ 26గా చిత్ర యూనిట్ మరోసారి ధృవీకరించింది. అంతకుముందు ఈ సినిమాను మే 1న విడుదల చేయాలని భావించినప్పటికీ, కొన్ని కారణాల వల్ల జూన్‌కు వాయిదా పడింది. అదే సమయంలో రామ్ చరణ్ ‘పెద్ది’ సినిమా కూడా జూన్ చివరలో వచ్చే అవకాశం ఉందనే వార్తలు వినిపిస్తున్నా, ‘లెనిన్’ మేకర్స్ మాత్రం తమ నిర్ణయానికే కట్టుబడి ఉన్నట్లు ఈ పోస్టర్ ద్వారా స్పష్టం చేశారు.

మురళీ కిషోర్ అబ్బురు దర్శకత్వం వహిస్తున్న ఈ చిత్రాన్ని అన్నపూర్ణ స్టూడియోస్ మరియు సితార ఎంటర్‌టైన్‌మెంట్స్ బ్యానర్లపై అక్కినేని నాగార్జున, సూర్యదేవర నాగవంశీ నిర్మిస్తున్నారు. భాగ్యశ్రీ బోర్సే కథానాయికగా నటిస్తుండగా, ఎస్.ఎస్. థమన్ సంగీతాన్ని అందిస్తున్నారు.